ޑިމޮކްރެޓްސްއަށް ސޮއިކުރި މީހުންނަށް ސަރުކާރުން ބިރުދައްކާ ކަމަށް ބުނެ މަޖިލީހަށް މައްސަލައެއް
އެމްޑީޕީގެ ރައީސް މުޙައްމަދު ނަޝީދުގެ އިރުޝާދުގެ ދަށުން އުފައްދަން މަސައްކަތް ކުރަމުންދާ "ދަ ޑިމޮކްރެޓްސް" އަށް ސޮއިކުރި 3،500 މެމްބަރުންނަށް ގުޅައި ރައީސް އިބްރާހިމް މުހައްމަދު ޞާލިހުގެ ސަރުކާރުން އިންޒާރު ދީ ބިރުދައްކާތީ އެކަން ވަގުތުން ހުއްޓައިލުމަށް ގޮވާލައި ރައްޔިތުންގެ މަޖިލީހަށް މައްސަލައެއް ހުށަހަޅުއްވައިފިއެވެ.
"ދަ ޑިމޮކްރެޓްސް" ގެ މުއައްސިސް ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފު ހުށަހެޅުއްވި މައްސަލައިގައި، ވަނީ ޕާޓީއަށް 3،000 މެމްބަރުން ހަމަކުރުމަށް ދީފައިވާ މުއްދަތުގެ މާ ކުރިން އެއަދަދަށްވުރެއް ގިނައިން މެމްބަރުން ހަމަކޮށް ޕާޓީ ރަޖިސްޓްރީ ކުރަން ހުށަހަޅާފައިވާ ކަމަށެވެ. މިއީ ރާއްޖޭގެ ރެކޯޑެއްކަން ފާހަގަކޮށް އެމައްސަލައިގައި ބުނީ ޕާޓީއަށް ސޮއިކުރި މީހުންގެ ތަފްސީލު ސަރުކާރުން ވަގަށް ހޯދާފައިވާ ކަމަށެވެ.
"...އެ މަޢުލޫމާތު ބޭނުންކޮށްގެން ފޯމު ހުށަހެޅި މީސްމީހުންނަށް ގުޅައި ބިރުދައްކަން ފަށައިފައެވެ. ސަރުކާރުން އެކަން ހިންގަނީ ފުޅާ ދާއިރާއެއްގައެވެ. ސަރުކާރުގެ މިނިސްޓަރުންނާއި ސަރުކާރު ހިއްސާވާ ކުންފުނިތަކުގެ ވެރިންނާއި، ސަރުކާރުގެ އެކިއެކި މަގާމުތަކުގައި ތިއްބެވި ބޭބޭފުޅުން ވަޑައިގަންނަވަޏީ އެ މުޑުދާރު ޢަމަލު ހިންގަވަމުންނެވެ." މައްސަލައިގައިވެއެވެ.
މީގެ އިތުރުން ބިރު ދައްކައި ނުފޫޒު ފޯރުވުމުގެ ގޮތުން ޑިމޮކްރެޓްސްއަށް ސޮއިކުރި މީހުންނާއި އެމީހުންގެ އާއިލާގެ މެމްބަރުން ސްޑޫޑެންޓް ލޯނަށް ނުވަތަ ގޯއްޗަށް ހުށަހަޅާފައިވޭތޯ ބަލައި އެކަން ވާން ބޭނުންނަމަ ސޮއި އަނބުރާ ނެގުމަށް ސަރުކާރުން އަންގަމުން ދާކަމަށް ބުނެފައިވެ އެވެ. އަދި ސޮއިކުރި މީހުން އީސީއަށް ގުޅައި ސޮއިކޮށްފައި ނުވާނެކަމަށް އެންގުމަށް އެމީހުން ގާތު ބުނަމުންދާކަމަށްވެސް ވަނީ ބުނެފައެވެ.
ރައީސް ޞާލިހުގެ ސަރުކާރުން ހިންގަމުންދާ މި ހުތުރު އަމަލުތަކަކީ އެމްޑީޕީ އުފެއްދި މަޤުސަދުތަކާއި އެޕާޓީން ވަކާލާތު ކުރަމުންދިޔަ ހަމައާއި އުސޫލުތަކާއި ދިމާ އިދިކޮޅު އަމަލުތަކެއްކަމަށް ހަސަން ލަތީފު ހުށަހެޅި މައްސަލައިގައި ވަނީ ބުނެފަ އެވެ. އަދި ހާއްސަކޮށް އެމްޑީޕީގެ ރައީސަކު އިސްވެ ހުންނަވައި މިފަދަ ކަމެއް ހިންގަވާތީ މައްސަލައިގައި އެކަމުގެ ހުތުރުކަން ވަނީ ފާހަގަކޮށްފައެވެ.
ޑިމޮކްރެޓްސްއިން ވަނީ ސަރުކާރުން އެޕާޓީއަށް ސޮއިކުރި މެމްބަރުންނަށް ކުރާ ކޯލްތަކަށް ނުސިހުމަށް ގޮވާލައިފައެވެ. އަދި އެކަކު އަނެކެއްގެ ކިބައިން ހިތްވަރު ލިބިގަނެ ބިރު ފަހަނަ އަޅާ ދިޔުމަށް މަޖިލީހަށް ހުށަހެޅި މައްސަލަގައި ގޮވާލާފައިވެއެވެ.
