"ދަ ޑިމޮކްރެޓްސް" ގެ ހަރުގެއަށް ކަޅުތެޔޮ ޖެހި މައްސަލަ މިދަނީ ބަލަމުން، މީހެއް ހައްޔަރެއް ނުކުރޭ: ފުލުހުން

ރައީސް ނަޝީދު އިސްވެ ހުންނަވައިގެން އަލަށް އުފެއްދުމަށް މަސައްކަތް ކުރަމުން އަންނަ ދަ ޑިމޮކްރެޓްސްގެ ޖަގަހައަށް ރޭ ބަޔަކު ކަޅުތެޔޮ ޖެހި މައްސަލަ ދަނީ ބަލަމުން ކަމަށާއި އެމައްސަލައިގައި މިހާތަނަށް މީހަކު ހައްޔަރުކޮށްފައި ނުވާކަމަށް ފުލުހުން ބުނެފިއެވެ.

Ads by MWSC

ފުލުހުން ބުނިގޮތުގައި އެމައްސަލަ ފުލުހުންނަށް ހުށައެޅިފައިވަނީ ރޭގެ ވަގުތެއްގައެވެ.

އެ ޖަގަހައަށް ކަޅުތެޔޮ ޖަހާފައިވަނީ ދަ ޑިމޮކްރެޓްސްގެ ރިޔާސީ ކެންޕެއިންގެ އޮނިގަނޑު އެކުލަވާލުމުގެ މަޝްވަރާ ބައްދަލުވުން ކުރިޔަށް ދަނިކޮށެވެ.

ޑިމޮކްރެޓްސްގެ ޖަގަހައަކީ ކުރިން އެމްޑީޕީ ހިންގަމުން އައި ޖަގަހައެވެ. އެ ބިމުގެ ވެރި ފަރާތުން އެމްޑީޕީ އަތުން ޖަގަހަ އަތުލާ, ޑިމޮކްރެޓްސްއަށް ވަނީ ދީފައެވެ. އެމްޑީޕީން މިމައްސަލަ ކޯޓަށް ވެސް ހުށަހެޅިއެވެ. ނަމަވެސް ކާމިޔާބުވާގޮތް ނުވިއެވެ.