މަޖިލިސް ހަމައަކަށް އަޅުވާނީ އަޅުގަނޑު: އަސްލަމް

ރައްޔިތުންގެ މަޖިލީހުގެ ޖަލްސާތައް ކުރިއަށް ނުގެންދެވި ހުއްޓިފައި އޮތް މައްސަލަ ހައްލުކޮށް މަޖިލީހުގެ މަސައްކަތްތައް ހަމައަކަށް އަޅުވާނެކަމަށް އެމްޑީޕީ ޕާލަމެންޓަރީ ގްރޫޕުގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.

Ads by STELCO

ރައްޔިތުންގެ މަޖިލީހުގެ ރިޔާސަތު ބަލަހައްޓަވާނެ ބޭފުޅަކު ނެތިގެން މިއަދުގެ ޖަލްސާވެސް ވަނީ ކެންސަލްކޮށްފަ އެވެ. މަޖިލީހުގައި މަރުތަޅު އެޅުވިފައި މިވަނީ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލަ އެއްފަހަރާ މަޖިލީހަށް ހުށަހެޅުމުންނެވެ.

ރިޔާސަތު ބަލަހައްޓަން އުޒުރުވެރިވާކަމަށް އިދާރާއަށް އަންގާފައިވަނިކޮށް އީވާގެ އިތުބާރު ނެތްކަމުގެ މައްސަލަ މިއަދަށް އެޖެންޑާ ކުރިނަމަވެސް ގަވާއިދު ތަން ނުދޭތީ ޖަލްސާ ޖެހުނީ ކެންސަލް ކުރާށެވެ. މިމައްސަލައިގައި އަސްލަމް ވިދާޅުވީ ގަވާއިދުން ރައީސް ނަޝީދަށް ދޭ 14 ދުވަހުގެ މުއްދަތުގެ ތެރޭގައި އެމަނިކުފާނު ރިޔާސަތުގައި އިންނަވަން ޖެހިވަޑައިގަންނަވާނެ ކަމަށެވެ. އެހެންނަމަވެސް އެކަން އެގޮތަށް ނުކުރައްވަނީ އީވާ މަގާމުން ދުރުކުރަން ބޭނުންފުޅު ނުވާތީ ކަމަށް އަސްލަމް ވިދާޅުވި އެވެ.

މަޖިލީހުގައި ހިމެނިވަޑައިގަންނަވާ އެމްޑީޕީގެ 13 މެމްބަރަކު އެޕާޓީން ވަކިވުމާއި ގުޅިގެން ކޮމިޓީތައް އެކުލެވިގެންވާ ގޮތަށްވެސް ވަނީ ބަދަލު ގެންނަން ޖެހިފަ އެވެ. އެކަމާއި އެއްބަސްވުމަކަށް ނާދެވި ކޮމިޓީތައްވެސް ވަނީ ހުއްޓިފަ އެވެ.

އަސްލަމް ވިދާޅުވީ މިކަން ހައްލު ކުރުމަށް އެމްޑީޕީ ޕީޖީ ގްރޫޕުން މަޖިލިސް އިދާރާގެ ބޭފުޅުންނާއިއެކު މިހާރު އަންނަނީ މަޝްވަރާ ކުރަމުންނެވެ. އަދި މައްސަލަ ވަރަށް އަވަހަށް ހައްލުކޮށް އިއުލާން ކުރައްވާނެކަމަށްވެސް އަސްލަމް ވިދާޅުވި އެވެ.

ރައީސް ނަޝީދު މަޖިލިސް ރައީސްގެ މަގާމުން ދުރުކޮށް އެމަގާމަށް އެމްޑީޕީން ނަން ހުށަހަޅާނެ ކަމަށް ބެލެވެނީ އަސްލަމްގެ އެވެ. އަދި އީވާގެ މަގާމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ނަން ހުށަހަޅާނެކަމަށް ވާހަކަތަކެއް ދެކެވެ އެވެ.

މަޖިލީހުގެ 85 މެމްބަރުންގެ ތެރެއިން 56 މެމްބަރުން ނިސްބަތްވަނީ އެމްޑީޕީއަށެވެ. އެހެންނަމަވެސް އޭގެ ތެރޭގައި ރައީސް ނަޝީދު މަގާމުން ދުރުކުރުމަށް ރުހުން ނުދޭ 5 މެމްބަރަކު އެބަ ތިއްބެވި އެވެ. ގާނޫނު އަސާސީގައި މަޖިލިސް ރައީސް މަގާމުން ދުރުކުރުމަށް ބޭނުންވާ އަގުލަބިއްޔަތު އެމްޑީޕީގައި އެބަ އޮތެވެ. އެހެންކަމުން މަޖިލީހުގައި މައްސަލަ ކުރިއަށް ގެންގޮސް ވޯޓަށް އަހައިފިނަމަ ރައީސް ނަޝީދާއި އީވާވެސް މަގާމުން ދުރުކުރާނެކަމަށް ބެލެވެ އެވެ.