އިތުބާރުނެތްކަމުގެ މައްސަލައިގެ ނޯޓިސް ރައީސް ނަޝީދަށް ފޮނުވައިފި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރުނެތްކަމުގެ މައްސަލައިގެ ނޯޓިސް އެމަނިކުފާނަށް ފޮނުވާފައިވާކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.
މަޖިލިސް އިދާރާއިން ބުނީ ރައީސް ނަޝީދުގެ އިތުބާރުނެތްކަމުގެ މައްސަލައިގެ ނޯޓިސް މަޖިލީހުން އެމަނިކުފާނަށް ފޮނުވީ އިއްޔެކަމަށެވެ. މަޖިލީހުގެ ގަވާއިދުގައި ބުނާ ގޮތުން، މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ލިބުމުން، އެކަމުގެ ނޯޓިސް މަޖިލީހުގެ ރައީސަށާއި މެމްބަރުންނަށް ރަސްމީ ބަންދު ނޫން ތިން ދުވަހުގެ ތެރޭގައި ދޭންޖެހެއެވެ.
ރައީސް ނަޝީދަށް ފޮނުވާފައިވާ އިތުބާރު ނެތް މައްސަލައިގެ ނޯޓިސްގެ މުއްދަތު ހަމަވާނީ މިމަހުގެ 25 ވަނަ ދުވަހަށެވެ.
ނަޝީދުގެ އިތުބާރު ނެތްކަމުގެ މައްސަލަ ހުށަހެޅުމަށް އެމްޑީޕީ ޕީޖީ ގްރޫޕުން ނިންމާ 54 މެމްބަރުންގެ ސޮޔާއި އެކު އެމައްސަލަ މަޖިލީހަށް ވެއްދީ މިމަހުގެ ހަތް ވަނަ ދުވަހުއެވެ.
ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވަނީ ޕާޓީތަކުގެ މެމްބަރުންގެ އަދަދަށް އަންނަ ބަދަލާއިއެކު މަޖިލީހުގެ ދާއިމީ ކޮމިޓީތައް އެކުލަވައި ނުލައި މަސައްކަތް ހުއްޓުވާފައި އޮތުމާއި، ރިޔާސަތުގައި އިންނަވައިގެން މަޖިލީހުގައި ހިނގާ ބަހުސްތަކުގައި ބައިވެރިވުމާއި، ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލަ އަށް ހުރަސް އެޅުއްވުމާއި، ސަބަބެއް އިއުލާން ނުކުރައްވައި ކޮންމެ ދުވަހު ހެނދުނުގެ ބްރޭކަށްފަހު މަޖިލީހުގެ ރިޔާސަތު ދޫކުރެއްވުމާއި، މަޖިލީހުގެ ނިޒާމް ގެއްލުވާލަން މަސައްކަތް ކުރާ މެންބަރުންނަށް ވާގިވެރިވުމާއި، ވަކި ފަރާތަކަށް ޖެހިވަޑާއިގެން މެންބަރުންނާ ޒާތީ ތައައްސުބެއް ބާއްވާތީއެވެ.
Ads by STO
