ޕާޓީ އުފެއްދުމުގެ ޖަލްސާ ބޭއްވުމުގެ ހުއްދަ ނުލިބެނީސް އިލެކްޝަންސް ކޮމިޝަނުން ޑިމޮކްރެޓްސްއިން ނުނިކުންނާނެ
“ދަ ޑިމޮކްރެޓްސް” އުފެއްދުމުގެ ޖަލްސާ ބޭއްވުމުގެ ހުއްދަ ނުލިބެނީސް އިލެކްޝަންސް ކޮމިޝަނުން ނުނިކުންނާނެ ކަމަށް އެ ޕާޓީގައި އިސްކޮށް ހަރަކާތްތެރިވާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ރައީސް ނަޝީދު އިސްވެ ހުންނަވައިގެން އަލަށް އުފެެއްދި ޕާޓީ “ދަ ޑިމޮކްރެޓްސް”ގެ ރެޖިސްޓްރީ ދޫނުކޮށް އިލެކްޝަން ކޮމިޝަނުން ލަސްކުރާތީ އެ ޕާޓީގެ މެމްބަރުން މިހާރު ވަނީ ކޮމިޝަނަށް ވަޑައިގެންފައެވެ.
އެ ސަރަހައްދުން ނޫސްވެރިންނާ ބައްދަލުކުރައްވާ ދެއްކެވި ވާހަކަފުޅުގައި ލަތީފް ވިދާޅުވީ ޕާޓީ ރެޖިސްޓްރީ ކުރުމަށް ބާއްވާ ޖަލްސާ ބޭއްވުމުގެ ހުއްދަ ލިބެންދެން މަޑުކޮށްގެން ތިބޭނެ ކަމަށާއި ތަކުރާރުކޮށް ކޮމިޝަންގެ މެމްބަރުންނަށް އެކަން ކޮށްދެއްވުމަށް ދަންނަވާނެ ކަމަށް ލަތީފް ވިދާޅުވިއެވެ.
”މިރޭ އެކަންޏެއް ނޫން. މިކަން ނުނިމެންޏާ ހަމަ ތިބޭ ގޮތަށް އަޅުގަނޑުމެން މިތިބީ. އެއީ މާދަމާ ވިޔަސް، އޭގެ އަނެއް ދުވަސް ވިޔަސް، އަޅުގަނޑުމެން މަޑުކޮށްލައިގެން ތިބޭ ގޮތަށް މިތިބީ ކޮމިޝަންގަ” ލަތީފް ވިދާޅުވިއެެވެ.
ލަތީފް އިތުރަށް ވިދާޅުވީ ސަރުކާރުގެ އިސް މަގާމުތަކުގަ ތިއްބެވި އެކި ގުޅުންތައް ހުރި ބޭފުޅުން އިލެކްޝަންގައި އެބަތިބި ކަމަށާއި އެބޭފުޅުންގެ ނުފޫޒު މިކަމުގައި ނޯންނާމެ ކަމަށް ނުދެކޭ ކަމަށެވެ.
އަދި ރައީސް ޞާލިޙްގެ ސަރުކާރު ހިންގާ ގޮތަށް ބަލާއިރު އިލެކްޝަންގެ ބައެްް މަގާމުތަމުގައި ތިއްބެވި ބޭފުޅުންނަކީ ސަރުކާރުގެ ވަޒީރުންނާ ވަރަށް ގާތް ގުޅުން ބާއްވާ ބޭޅުން ކަމަށް ލަތީފް ވިދާޅުވިއެވެ. އަދި އެބޭފުޅުން ކަންކަން ކުރަންވީ ގޮތް އަންގަވާނެ ކަމަށް ގަބޫލުކުރައްވާ ކަމަށް ވެސް ލަތީފް ވިދާޅުވިއެވެ.
Ads by STO
