ރައީސް ނަޝީދުގެ އިމްތިޔާޒުގެ މައްސަލަ އެއްފަރާތް ކޮށްފި
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު މަޖިލީހުގެ އިމްތިޔާޒަށް އަރައިގަތް ކަމަށް ބުނެ، ވެރިކަން ކުރާ މައި ޕާޓީ، އެމްޑީޕީން ހުށަހެޅި މައްސަލާގައި ބަހުސްކުރަން ކަނޑައަޅާފައިވާ މެމްބަރުން ތަޅުމުގައި ނެތް ކަމަށް ބުނެ، މަޖިލީހުގެ ރިޔާސަތުން އެ މައްސަލަ މިއަދު އެއްފަރާތްކޮށްފިއެވެ.
ނަޝީދުގެ އިމްތިޔާޒުގެ މައްސަލަ މިއަދު ހުށަހެޅުއްވީ، މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ)އެވެ.
އެ މައްސަލަ އަށް ބަހުސް ކުރުމަށް މިއަދު ތަޅުމުގައި ނެގި ވޯޓުގައި ބައިވެރިވެވަޑައިގެންނެވި 37 މެންބަރުންގެ އަޣުލަބިއްޔަތުން ފާސްކޮށް ބަހުސް ފެށިއެވެ. އެ މައްސަލައަށް ބަހުސްކުރަން ނުފެންނަ ކަމަށް ވޯޓު 13 މެންބަރުން ވޯޓު ދެއްވިއެވެ.
ސައިގެ ވަގުތަށް ބަހުސް މެދުކަނޑާލުމަށް ފަހު، ވިލުފުށި ދާއިރާގެ މެމްބަރު ހަސަން އަފީފް ވިދާޅުވީ ބަހުސްގައި ވާހަކަ ދައްކަވަން އަދި ހަތަރު މެމްބަރުން ތިއްބެވި ކަމަށާއި ނަމަވެސް، އޭގެ ތެރެއިން މެމްބަރަކު ނެތްކަން ފާހަގަކުރައްވައި، އެހެން އައިޓަމެއްގެ ބަހުސް ފައްޓަވައިފައެވެ.
އެ ބަހުސް ފެއްޓެވުމާއެކު، އެމްޑީޕީގެ މެމްބަރުން ނިޒާމީ މައްސަލަ ނަންގަވައި، ރިޔާސަތުގެ ނިންމުމަށް އިއުތިރާޒު ކުރެއްވިއެވެ.
އެގޮތުން، އިމްތިޔާޒްގެ މައްސަލައެއް ހުށަހަޅައި، ބަހުސްކުރަން އަޣުލަބިއްޔަތު ލިބިއްޖެ ނަމަ ވަކި ގޮތަކަށް އެ މައްސަލަ ނިންމަންޖެހޭނެ ކަމަށް މަޖިލީހުގެ ގަވާއިދުގައި ބަޔާންކޮށްފައިވާ ކަމަށް މެމްބަރުން ފާހަގަކުރެއްވިއެވެ.
