ޝިފާޒު އެމްޑީޕީގެ މެމްބަރުންނަށް: އެއްވެސް މިސްރާބެއް ނެތް ޕާޓީއެއްގައި ތިބެންވީ ކީއްވެ؟

އެއްވެސް އަމާޒެއް، މިސްރާބެއް ނެތް ސިޔާސީ ޕާޓީއެއްގައި، އެމްޑީޕީގެ މެންބަރުން ތިބެންވީ ސަބަބާއިމެދުގައި ވިސްނައިލުމަށް، ރައީސް އޮފީހުގެ ކުރީގެ މިނިސްޓަރު މުޙައްމަދު ޝިފާޒު، އެމްޑީޕީގެ މެމްބަރުންނަށް ގޮވައިލައްވައިފިއެވެ.

Ads by Hajj Corporation

ޝިފާޒަކީ އެމްޑީޕީގެ ކުރީގެ ނައިބު ރައީސްވެސް މެއެވެ. އޭނާ އަކީ އެމްޑީޕީން ވަކިވި ފެކްޝަނުން އުފެއްދުމަށް މަސައްކަތް ކުރަމުން އަންނަ އައު ސިޔާސީ ޕާޓީ "ދަ ޑިމޮކްރެޓްސް" އުފެއްދުމުގައި އިސްކޮށް އުޅުއްވާ ފަރާތެކެވެ. އެ ޕާޓީން ރޭ ބޭއްވި ހަރުގެ ޖަލްސާގައި އޭނާ ވަނީ، ރައީސް ރައީސް މުޙައްމަދު ނަޝީދު އެމްޑީޕީން ވަކިވެވަޑައިގެންނެވި ޚަބަރު، ދުނިޔޭގެ މީޑިއާތަކުގެ ސަމާލުކަމަށް އައިކަން ފާހަގަކުރައްވައިފައެވެ.

ޝިފާޒު އިތުރަށް ވިދާޅުވީ، ރައީސް ނަޝީދު، އެމްޑީޕީން ވަކިވެވަޑައިގަތުމަކީ، އެ އެމްޑީޕީގައި މިހާރު ތިބި މެމްބަރުން ވަރަށް ބޮޑަށް ވިސްނައިލަން ޖެހޭ ކަމެއް ކަމަށާއި، އެމަނިކުފާނު ވަކިވެވަޑައިގަތީ، ޕާޓީގެ އަސާސްތައް ނެތިކޮށްލައި، ޕާޓީ އުފެއްދި މަޤްސަދާ ޚިލާފަށް މަސައްކަތް ކުރަމުންދާތީ ކަމަށެވެ.

"ރީނދޫ ކުލަ އެބަހުރި. ތިލަފަތްވެސް އެބަ ފެނޭ، އެކަމަކު އެ ތިލަފަތުގެ ހަމަހަމަކަމެއް ނެތް. އެ ކުލަ ބަދަލުވެއްޖެ." އޭނާ ވިދާޅުވިއެވެ.

އޭނާ އިތުރަށް ވިދާޅުވީ، އެމްޑީޕީއަށް 18 އަހަރުވީއިރު، ތިލަވެގެން ދިޔައީ "އިސް ލީޑަރު" ކަމަށާއި، އެމަނިކުފާނަށް ކުރި އިޙްތިރާމަށް، ގައްދާރުވެފައިވާ ކަމަށެވެ. ޝިފާޒު އެ އިޝާރާތް ކުރެއްވީ، ރައީސް އިބްރާހީމް މުޙައްމަދު ޞާލިޙަށެވެ. އެމަނިކުފާނަކީ، ވެރިކަމުގައި ހުންނެވީތީ، އެމްޑީޕީގެ އެންމެ އިސް ލީޑަރެވެ.