ދައުރުން ބޭރުން ޖަލްސާއެއް ބޭއްވުމަށް އެމްޑީޕީން ހުށަހަޅައިފި
ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބޭއްވުމަށް މަޖިލީހުގެ މެޖޯރިޓީ ޕާޓީން ހުށަހަޅައިފިއެވެ.
އެގޮތަށް ހުށަހަޅާފައިވާކަން ހާމަކޮށްފައިވަނީ ރައްޔިތުންގެ މަޖިލީހުގެ އިދާރާގައި އެމްޑީޕީގެ ޕާލަމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގެވެ.
މަޖިލީހުގެ ގަވާއިދު ބުނާގޮތުން ދައުރުން ބޭރު ޖަލްސާއެއް ހުށަހެޅުމަށް މަޖިލީހުގެ 3 ބައި ކޮށްފަ އެއްބައި މެމްބަރުންގެ ސޮޔާއިއެކު މަޖިލީހަށް ހުށަހެޅުމުން އެޖަލްސާ 14 ދުވަސްތެރޭގައި ބާއްވަން ޖެހެއެވެ. 14 ދުވަސް ގުނާނީ ބަންދު ދުވަސްތައްވެސް ހިމަނައިގެންނެވެ.
މަޖިލީހުގެ 29 މެމްބަރަކު ސޮއިކުރައްވައި، ދައުރުން ބޭރު ޖަލްސާއެއް ބާއްވަން މިހާރު ވަނީ ހުށަހަޅާފައެވެ.
މަޖިލީހުގެ މިއަހަރުގެ ދެވަނަ ދައުރު މިއަދު ނިމުނީ މިދައުރު ދަންމައިލަން އެދި އެމްޑީޕީގެ ޕާލަމެންޓްރީ ގްރޫޕުން އިއްޔެ އެދުނެވެ. ނަމަވެސް އެކަމަށް އިޔާދަ ދީފައެއް ނުވެއެވެ.
