ޑިމޮކްރެޓްސް އުފެއްދުމުގެ ހުއްދަ ދިނުމުން ޤާސިމް މަރުހަބާ ދަންނަވައިފި

ދަ ޑިމޮކްރެޓްސް އުފެއްދުމުގެ ޖަލްސާ ބޭއްވުމުގެ ހުއްދަ ދޭން އިލެކްޝަންސް ކޮމިޝަނުން ނިންމުމުން، ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ރައީސް ނަޝީދަށް މަރުހަބާ ދަންނަވައިފިއެވެ.

Ads by STELCO

ޤާސިމް ކުރެެއްވި ޓްވީޓެއްގައި ވިދާޅުވީ ޑިމޮކްރަޓްސް ⁦‪ އުފެއްދުމުގެ ޖަލްސާ ބޭއްވުމަށް އިލެކްޝަންސް ކަމިޝަނުން މިއަދު ހުއްދަދެއްވުމާ ގުޅިގެން ރައީސް     ⁦‪‬⁩ ނަޝީދަށާއި ދި ޑިމޮކްރެޓްސް އުފެއްދެވުމުގައި އުޅުއްވާ އެންމެހާބޭފުޅުންނަށާއި، ރާއްޖޭގެ އިޞްލާޙަށާއި ޑިމޮކްރަސީ އާއި ހެޔޮވެރިކަމަށްޓަކައި މަސައްކަތް ކުރައްވާ އެންމެހާ ފަރާތްތަކަށް މަރުޙަބާ ދަންނަވާ ކަމަށެވެ. 

އަދި އެ ހުއްދަ ދެއްވުމަކީ އިލްކްޝަންސް ކޮމިޝަނުން ޤާނޫނީ ވާޖިބު އަދާކުރެއްވުމުގައި ކުރިއަށް އެޅުއްވި ހަރުދަނާ ފިޔަވަޅެއް ކަމުގައި ދެކި، ކޮމިޝަނުގެ ވެރިންނަށްވެސް މަރުޙަބާ ދަންނަވާ ކަމަށް ޤާސިމް ވިދާޅުވިއެވެ. 

ޑިމޮކްރެޓްސް އަކީ ރައީސް މުޙައްމަދު ނަޝީދަށް ތާއީދު ކުރައްވާ ފަރާތްތައް ގުޅިގެން އުފައްދާ ސިޔާސީ ޕާޓީއެކެވެ. އެމްޑީޕީގެ ރިޔާސީ ޕްރައިމަރީން ރައީސް ނަޝީދަށް ލިބިވަޑައިގެންނެވި ނާކާމިޔާބީއަށް ފަހުގައި، އެ ޕާޓީގެ ތެރޭގައި ދެ ފެކްޝަން އުފެދި، ރައީސް ނަޝީދުގެ ފަޅީގައި ތިއްބެވި މެމްބަރުން އެންމެ ފަހުން އެމްޑީޕީ ދޫކޮށްލެއްވީއެވެ.

އެގޮތުން ރައީސް ނަޝީދުގެ ފަޅީގައި ތިއްބެވި މަޖިލީހުގެ 12 މެމްބަރަކު ވަނީ އެމްޑީޕީން ވަކިވެވަޑައިގެންފައިވެއެވެ. މި މެމްބަރުން އެމްޑީޕީން ވަކިވެވަޑައުގަތުމާ ގުޅިގެން އެމްޑީޕީ އަށް ވަނީ މަޖިލީހުގެ ސުޕަ މަޖޯރިޓީ ގެއްލިފައެވެ. ރައީސް ނަޝީދު ވެސް ވަނީ މިމަހުގެ 21 ވަނަ ދުވަހު އެމްޑީޕީން ވަކިވެވަޑައިގެންފައެވެ.