ބިންވެރިޔާ ސްކީމްގެ ދަށުން ދޫކުރި 4300 ގޯތި އޮތީ ކޮންތާކުތޯ؟: ޢަލީ ޢާޒިމް
މާލެ ރައްޔިތުންނަށް ޚާއްސަކޮށް ސަރުކާރުން ދޫކުރި ގޯތިތަކުގެ ތެރެއިން ހުޅުމާލެއިން ދެވެންއޮތީ 700 ގޯތި ކަމަށާއި އަނެއް 4300 ގޯތި އޮތީ ކޮންތާކުތޯ، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު ޢަލީ ޢާޒިމް ސުވާލު އުފައްދަވައިފިއެވެ.
އޭނާ ވިދާޅުވީ ވެރިކަން ނިމެން ބާކީ އޮތީ 71 ދުވަސް ކަމަށާއި 4300 ގޯތި އޮތީ ކޮންތާކުކަން ސާފުކޮށް ރައްޔިތުންނަށް ބުނެދިނުމަށް އެދޭކަމަށެވެ.
"ވެރިކަން ނިމެން ބާކީ އޮތީ 71 ދުވަސް. ހުޅުމާލެއިން ދެވެންއޮތީ 700 ގޯތި. އަނެއް 4300 ގޯތި އޮތީ ކޮންތާކުތޯއެވެ. ސާފުކޮށް ރައްޔިތުންނަށް ބުނެދީ ބަލާށެވެ. ގޯތިލިބިގެން އުފަލުން ރޮވުނު ފަރާތްތައް ތިޔަ އުޅެނީ މޮޔަ ކޮށްލަންތޯއެވެ." ޢާޒިމް ވިދާޅުވިއެވެ.
މާލެ ރައްޔިތުންނަށް ޚާއްސަކޮށް މާލެ ސަރަޙައްދުން 5000 ގޯތި ދޭނެކަން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު އިޢުލާނު ކުރެއްވީ މިދިޔަ އަހަރުގެ ރިޔާސީ ބަޔާނުގައެވެ. މީގެތެރެއިން ފުރަތަމަ ދޫކުރާ 3000 ގޯތި ދޫކުރަނީ ހުޅުމާލެއާއި ގުޅީފަޅުންނެވެ.
އެހެންނަމަވެސް "ބިންވެރިޔާ ސްކީމް"ގެ ދަށުން 6000 އަށް ވުރެ ގިނަ ގޯތި ދޫކުރުމަށް ވަނީ ނިންމާފައި ކަމަށް ރައީސް އޮފީހުން ވަނީ ދާދި ފަހުން ވިދާޅުވެފައެވެ.
Ads by STO
