އެކްސިޓެންޑުވީ ހަފީޒު ޕެނިކްވެގެން ސައިކަލާ ދިމާލަށް ދުއްވައިގަނެވުނީމަ: ސައިކަލު ދުއްވި މީހާ!

އެކްސިޓެންޑުވީ ހަފީޒަށް ޕެނިކްވެގެން ސައިކަލާ ދިމާލަށް ދުއްވައިގަނެވުނީމައި ކަމަށް، އެކްސިޑެންޓްވި ސައިކަލު ދުއްވަން އިން ޝަމްޢާން ޢަބްދުއްޝަކޫރު ބުނެފިއެވެ.

Ads by Sosun Fihaara

މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ ޝަމްއާން ޢަބްދުއްޝުކޫރު (ލެގޫންވިއު، ރ. އިނގުރައިދޫ) ނަމަކަށް ކިޔާ 22 އަހަރުގެ މީހެކެވެ.

މަޢުލޫމާތު ލިބޭގޮތުގައި ޝަމްއާންގެ ފަރާތުން މިހެން ބުނެފައިވަނީ އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޟިރުކުރުމުންނެވެ. ޝަމްޢާނުގެ ފަރާތުން އޭނާގެ ވަކީލު ވާހަކަދައްކާފައިވާއިރު، ވަކީލު ވިދާޅުވީ ޝަމްޢާން ދުއްވަން އިން ސައިކަލުންޖެހި ހަފީޒަށް އަނިޔާވިކަމަށް ޝަމްޢާން އިންކާރު ނުކުރާ ކަމަށެވެ.

"ތުހުމަތުކުރެވޭ ފަރާތުން ސައިކަލުގައި ދަނިކޮށް، އަނިޔާ ލިބުނު ފަރާތް މަގު ހުރަސްކުރުމުން، ސައިކަލް އަންނަ ތަން ފެނިގެން ޕެނިކްވެގެން ސައިކަލާ ދިމާލަށް ދުއްވައިގަނެވުމުން، ސައިކަލުގައި އަނިޔާ ލިބުނު ފަރާތްގޮސް ލައިގަނެގެން އެކްސިޑެންޓުވީ،" ހަފީޒަށް އަނިޔާވީ ކަފި ހުރަސްމަތިން ހުރަސް ކުރަނިކޮށް ނޫންކަމަށް ފާހަގަކޮށް ޝަމްޢާންގެ ދިފާޢީ ވަކީލު ވިދާޅުވިއެވެ.

މިކަންތައް މިހެން ހުރުމުންނާއި، ފުލުހުން ތުހުމަތުކުރާ ޤާނޫނީ މާއްދާތަކަށް ބަލާއިރު ތުޙުމަތަކީ ޤާނޫނީ ބޮޑު ކުށަކަށް ނޫންކަމަށް ވިދާޅުވެ، ޝަމްއާނުގެ ދިފާޢީ ވަކީލު އެދިވަޑައިގަތީ ކަފާލާތުގެ ދަށުން ޝަމްޢާން ދޫކޮށްދެއްވުމަށެވެ.

މި މައްސަލަ ތަޙްޤީޤުކުރައްވާ އިންވެސްޓިގޭޝަން އޮފިސަރު ކޯޓުގައި ވިދާޅުވީ، ޝަމްއާން އަތުގައި ސައިކަލްދުއްވުމުގެ ލައިސަންސް ނެތްކަމަށާއި ސައިކަލު ދުއްވީ ބާރު ސްޕީޑުގައި ކަމަށެވެ. އަދި ބާރު ސްޕީޑުގައި ސައިކަލު ދުއްވިކަމަށް ޝަމްޢާން އިޢުތިރާފުވާކަމަށެވެ.

ނަމަވެސް، ޝަމްޢާނަކީ ކުށުގެ ރެކޯޑު ހުރި މީހަކަށްވެފައި ސައިކަލު ދުއްވީ ލައިސަންސް ނެތި ބާރު ސްޕީޑުގައި ކަމަށްވާތީ، ފުލުހުން އެދިފައިވަނީ އޭނާގެ ބަންދުގެ މުއްދަތު އިތުރުކޮށްދިނުމަށެވެ.

ޝަމްޢާނުގެ ފަރާތުންނާއި ފުލުހުންގެ ފަރާތުން ފާހަގަކުރި ކަންކަމަށް ބަލައި ކްރިމިނަލް ކޯޓުން ނިންމާފައިވަނީ، ޝަމްއާން ހައްޔަރުކޮށްފައިވަނީ އިޖުރާއަތާ އެއްގޮތަށް ކަމަށާއި، އޭނާ ބަންދުން ދޫކޮށްލައިފިނަމަ މުޖްތަމައުގެ ސަލާމަތަށް ނުރައްކާވެ، އޭނާ މައްޗަށް ކުރާ ތުހުމަތު ވުޖޫދުވުމުގެ ފުރުޞަތު އޮތަތީ، ކަފާލާތު ނުދީ 15 ދުވަހަށް އޭނާ ބަންދުކުރުމަށެވެ.

މަޖީދީމަގު ރެޑްވޭވްއާ ހިސާބުގައި ހިނގި މި އެކްސިޑެންޓުގައި އަނިޔާވި ހަފީޒަށް ސީރިއަސް އަނިޔާތަކެއް ލިބިފައިވާއިރު، އިތުރު ފަރުވާއަށް އިންޑިއާގެ ކޮޗިންއަށް މިހާރުވަނީ ފުރުވައިލައިފައެވެ.