މޭޔަރާމެދު ހިތްހަމަނުޖެހިގެން ޕީޕީއެމް ހިމެނޭހެން 9 މެންބަރަކު ޖަލްސާ ދޫކޮށް ނުކުމެވަޑައިގެންފި
މާލެ ސިޓީ ކައުންސިލްގެ މޭޔަރު މުޙައްމަދު މުޢިއްޒުއާމެދު ހތްހަމަނުޖެހިގެން މެމްބަރުންތަކެއް ޖަލްސާ ދޫކޮށް ނުކުމެވަޑައިގެންފިއެވެ.
މިއަދު އެ ކައުންސިލުގައި ބޭއްވި ކައުންސިލްގެ އާންމު ޖަލްސާގައި ޕީޕީއެމްގެ މެމްބަރުންތަކެއް ހިމެނޭހެން ގިނަ މެމްބަރުންތަކެއް އެ ޖަލްސާ ދޫކޮށް ނުކުމެވަޑައިގަތީ، އެ ޖަލްސާއަށް ޕީޕީއެމް ކައުންސިލަރަކު ހުށަހެޅުއްވި މައްސަލަ އެޖެންޑާކޮށްފައި ނުވާތީކަމަށް މަޢުލޫމާތުލިބެއެވެ.
ޕީޕީއެމްއަށް ނިޞްބަތްވާ ކައުންސިލަރު އަޙްމަދު އައިފާން ވަނީ މިއަދުގެ ޖަލްސާގެ އެޖެންޑާގައި، ބައެއް ކައުންސިލަރުން އެމްޑީޕީން ވަކިވެފައިވާތީ، ދާއިމީ ކޮމިޓީތަކަށް ބަދަލުގެނައުމުގެ މައްސަލައާއި 35،000ރ އަށްވުރެ މަތީގެ ތަކެތި ޕްރޮކިޔޯ ކުރާނަމަ، ކޯޕަރޭޓް އެފެއާޒް ކޮމިޓީން ފާސްކޮށް، އެ މައުލޫމާތު ކައުންސިލަށް ދިނުން ލާޒިމްވާ ގޮތަށް ހެދުމަށް ހުށަހަޅާ މައްސަލަ ހިމެނުމަށް އެދިފައިކަމަށް މަޢުލޫމާތުލިބެއެވެ.
ސިޓީ ކައުންސިލުގައި ޖުމްލަ 18 ކައުންސިލަރުން ތިބޭއިރު މިއަދުގެ ޖަލްސާ ފަށްޓަވަމުން ޖަލްސާގެ އެޖެންޑާ ފާސްކުރުމަށް ވޯޓަށް އެހުމުން، އެޖެންޑާގައި ޕީޕީއެމް މެމްބަރު ހުށަހެޅުއްވި މައްސަލަ ނެތުމުން، އައިފާން ވަނީ އޭނާގެ ދެ ހުށަހެޅުން އެޖެންޑާ ކޮށްފައިނުވާތީ އެކަމުގެ ހިތްހަމަނުޖެހުން ފާޅުކުރައްވާފައި، ޖަލްސާ ދޫކޮށް ނުކުމެވަޑައިގެންފައެވެ. އައިފާންގެ ފަހުން ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވެސް އެ މާލަމުން ނުކުމެވަޑައިގެންނެވި އެވެ.
ހަމައެއާކު، އައިފާނު ހުށަހެޅުއްވި ދެ ކަންތައް އެޖެންޑާގައި ނެތުމުން، އެޖެންޑާއަށް ވޯޓަށް އެހެމުން އެހެން ބައެއް މެންބަރުން ވެސް ތާއިދު ނުކުރައްވާ ކަމަށް ވިދާޅުވެ، ޖަލްސާ ދޫކުރައްވައި ނުކުމެވަޑައިގެންނެވި އެވެ. އޭގެ ތެރޭގައި ޕީޕީއެމްގެ ބައެއް މެންބަރުން ވެސް ހިމެނޭ ގޮތަށް ނުވަ މެންބަރަކު ޖަލްސާ ދޫކޮށް ނުކުމެވަޑައިގެންނެވުމުން، މިއަދުގެ ޖަލްސާ ކުރިއަކަށް ނުގެންދެވުނެވެ.
ޤާނޫނުގައި އޮންނަ ގޮތުން ކައުންސިލް ޖަލްސާ ބޭއްވުމުގެ 48 ގަޑިއިރު ކުރިން އެޖެންޑާ ހުރިހާ މެމްބަރުންނަށް ފޯރުކޮށްދޭން އޮންނާތީ، އެކަން އެގޮތަށް ކުރުމަށްޓަކައި ކައުންސިލްގެ ހިންގާ ގަވާޢިދަށް މާއްދާއެއް ހިމަނާފައިވާނެކަމަށް މުއިއްޒު ވަނީ އޮންލައިން ނޫހަކަށް މަޢުލޫމާތު ދެއްވާފައެވެ. އަދި އެޖެންޑާގައި ހުށަހަޅަން ބޭނުންވާ ކަންތައްތައް 72 ގަޑިއިރު ކުރިން ފޮނުވަންޖެހޭ ގޮތަށް އެ މާއްދާގައި އޮންނާނެކަމަށް މޭޔަރު ވިދާޅުވިއެވެ.
މޭޔަރު އިތުރަށް ވިދާޅުވީ ކައުންސިލަރު އައިފާނުގެ ހުށަހެޅުންތައް ލިބުނީ ލަހުންކަމަށާއި މިއަދުގެ ޖަލްސާގައި އެ ދެ ހުށަހެޅުން އެޖެންޑާ ނުކުރެވުނު ނަމަވެސް، ދެން އޮންނަ ޖަލްސާއެއްގައި އެޖެންޑާކުރާނެކަމަށް އަންގާފައިވާނެކަމަށެވެ. އަދި މިއަދުގެ އެޖެންޑާގައި އެ ދެ ހުށަހެޅުން އެޖެންޑާ ނުކުރީ އެކަމާ ދެކޮޅުވާތީ ނޫންކަމަށާއި މިހާތަނަށް ކައުންސިލްގެ 109 ބައްދަލުވުން ބޭއްވިއިރުވެސް މިކަހަލަ ކަމެއް ދިމާވެފައިނުވާކަމަށެވެ. އެކަމުން ދޭހަވަނީ ކައުންސިލްގެ ޖަލްސާތައް ބާއްވަމުން އައީ ރަނގަޅަށް ކަމަށާއި ކައުންސިލަރުން ފޮނުވާ ހުރިހާ ކަމެއްވެސް ގަވާއިދުން އެޖެންޑާ ކުރަމުން ގޮސްފައިވާނެކަމަށް މުއިއްޒު ވިދާޅުވިއެވެ.
މިއަދުގެ ޖަލްސާ ދޫކޮށްވަޑައިގެންނެވުމާ ގުޅިގެން އޮންލައިން ނޫހަކަށް މަޢުލޫމާތުދެއްވަމުން އެ ކައުންސިލްގެ މެމްބަރު މުޙައްމަދު ސައިފް ފާތިޙު ވިދާޅުވީ ކޮމިޓީތައް އެކުލަވާލުމަށް މޭޔަރު ދެކޮޅު ހައްދަވާކަމަށާއި އެގޮތަށް ކަންތައްކުރައްވަނީ ކޮމިޓީތަކުގެ ކޮންޓްރޯލް ގެއްލިދާނެތީކަމަށެވެ. އަދި ކައުންސިލަރުން އެޖެންޑާއަށް ކަމެއް ހުށަހެޅުމުން އެޖެންޑާ ނުކުރެއްވުމަކީ މޭޔަރަށް އޮތް ބާރެއް ނޫންކަމަށާއި މޭޔަރުގެ ޢަމަލުތައް ބައްޓަންވެފައިވަނީ ގަވާއިދާ ޚިލާފަށް ކަމަށެވެ. ކައުންސިލަރުން ނިސްބަތްވާ ޕާޓީ ބަދަލުވުމާއެކޮ ކޮމިޓީތައް އެކުލެވިގެންވާ ގޮތް ބަދަލުވާނެ ކަމަށާއި އެކަން އެގޮތަށް ވީއެންމެ އަވަހަކަށް ކުރަންޖެހޭނެ ކަމަށްވެސް މުޙައްމަދު ސައިފު ފާހަގަކުރެއްވިއެވެ.
މީގެ އިތުރުން، އައިފާނުގެ ހުށަހެޅުންތަކުގައި ދެވަނައަށް އޮތް ހުށަހެޅުމަކީ ކޮރަޕްޝަނަށް މަގުފަހިވާގޮތަށް ސިޓީ ކައުންސިލުގައި ގިނަ ކަންތައްތައް ހިނގާތީ، އެކަމަށް ހައްލެއް ހޯދުމަށް ގެންނަ ބަދަލަކާ ގުޅޭ ހުށަހެޅުމެއްކަމަށާއި ފައިސާގެ ބޮޑެތި އަދަދުތައް ހިމެނޭ ކަންކަން ކުޑަ ކޮމިޓީއެއްގެ ތެރޭގައި، ކައުންސިލަރުންނަށް ނޭނގި މޭޔަރު ނިންމަވަމުންދާކަމަށްވެސް ސައިފް ތުޙުމަތުކުރެއެވެ. އޭގެ ތެރޭގައި ބައެއް މައިޒާންތަކުން ކެފޭ ތަންތަން ހެދުމަށް ކައުންސިލުން ނިންމީވެސް ހުރިހާ ކައުންސިލުން ތިއްބެވި ޖަލްސާއަކަށް ހުށަހަޅައިގެން ފާސްކޮށްގެން ނޫންކަމަށާއި ޕާކިންނަށް ބިންތައް ދޫކުރުމުގައި އަމަލުކޮށްފައިވަނީ އެގޮތަށް ކަމަށެވެ.
އަލަށް އުފެއްދި ދަ ޑިމޮކްރެޓްސްއަށް ނިސްބަތްވާ ސައިފް ވިދާޅުވީ މޭޔަރު މުއިއްޒު އަމަލުކުރައްވަމުންދާ ގޮތާ ގުޅޭ ޝަކުވާ ލޯކަލް ގަވަރެމެންޓް އޮތޯރިޓީ (އެލްޖީއޭ)އަށް ހުށަހަޅާނެކަމަށާއި ދެން ޖަލްސާތަކުގައި ބައިވެރިވާނީ މޭޔަރު ކަންކަން އިސްލާހު ކުރެއްވުމުން ކަމަށެވެ.
މުއިޒަކީ މުއިޒެވެ. މުއިޒް ވާނީ މުއިޒަށެވެ. ކޮރަޕްޝަނަކީ ކޮރަޕްޝަނެވެ. ކަމިޝަން ވާނީ ކަމިޝަނަށެވެ. މާލޭގައި ދެމި ބޮކިފައްޗާއި ގިޑިގެވާނީ ހަމަ އެއަށެވެ. އަދިވެސް މިއުޅެނީ ހުޅުމާލެވެސް ނުލިބިގެންނެވެ.