އަމާޒަކީ ރިޔާސީ އިންތިހާބުގެ ކުރިން އެމްޑީޕީ ކޯލިޝަނަށް 90،000 މެންބަރުން ހަމަކުރުން: ރައީސް ޞާލީޙް
އަމާޒަކީ ރިޔާސީ އިންތިހާބުގެ ކުރިން އެމްޑީޕީ ކޯލިޝަނަށް 90،000 މެންބަރުން ހަމަކުރުން ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ސާލިޙް ރިޔާސީ އިންތިހާބުގެ ކެމްޕެއިނަށް މިހާރު ށ. އަތޮޅަށް ކުރައްވަމުންދާ ކެމްޕެއިންގެ ދަތުރުގެ ތެރެއިން މިއަދު މެނދުރު ވަނީ ށ. މަރޮށި އަށް ވަަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ އެ ކޯލިޝަންގައި 77،700 އަށް ވުރެ ގިނަ މެންބަރުން މިއަދު އެބަތިބި ކަމަށެވެ.
އަދި އަމާޒަކީ ކުރިއަށް އޮތް ދެމަސް ދުވަހުގެ ތެރޭގައި އެ އަދަދު 90،000 އަށް އިތުރު ކުރުން ކަމަށާއި މިފަހަރު އިންތިހާބަށް ނިކުންނަނީ އެންމެ ބޮޑު ކޯލިޝަނާއި އެކު ކަމަށް ރައީސް ޞާލިޙް ވިދާޅުވިއެވެ.
"އަޅުގަނޑުމެންގެ އަމާޒަކީ ކުރިއަށް އޮތް ދެމަސް ދުވަހުގެ ތެރޭގައި މި 90،000 އަށް އިތުރު ކުރުން. އިންތިހާބަށް 9 ސެޕްޓެމްބަރަށް އަންނައިރު އިރާދަ ކުރެއްވިއްޔާ މި ކޯލިޝަނުގައި ރެޖިސްޓަރޑް 90،000 މެންބަރުންނަށް އަޅުގަނޑުމެން ފުރުސަތު ދޭނަން" ރައީސް ޞާލިޙް ވިދާޅުވިއެވެ.
މީގެ އިތުރުން ރައީސް ވިދާޅުވީ ހަމަޖެހޭ ތަނަކަށް ރާއްޖެ ހެދުމަށްޓަކައި ސަރުކާރުން ކުރި މަސައްކަތުގެ ހެޔޮ ނަތީޖާ މާލެ އާއި މުޅި ރާއްޖެ އިން މިއަދު ފެންނަމުންދާ ކަމަށެވެ. އަދި އެކަން ދިވެހި ރައްޔިތުން މިއަދު ދެކެމުން އަންނަ ކަމަށް އެމަނިކުފާނު ވިދާޅުވިއެވެ.
