ރިޔާސީ އިންތިޚާބު 2023: ރާއްޖެއާއި ރާއްޖެއިން ބޭރުގައި 604 ވޯޓު ފޮށި ބަހައްޓާނެ
ކުރިޔަށް އޮތް ރިޔާސީ އިންތިޚާބުގައި ރާއްޖެއާއި ރާއްޖެއިން ބޭރުގަ 604 ވޯޓު ފޮއްޓެއް ބަހައްޓަން ހަމަޖެހިފައިވާކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބު ވިދާޅުވެއްޖެއެވެ.
ހަބީބު ކުރެއްވި ޓުވީޓެއްގައި ވިދާޅުވީ 2023 ސެޕްޓެމްބަރ 9 ވަނަ ދުވަހު ބާއްވާ ރިޔާސީ އިންތިޚާބުގައި، ރާއްޖެ އާއި ރާއްޖޭން ބޭރުގައި 604 ވޯޓުފޮށި ބަހައްޓާގޮތަށް ކޮމިޝަނުން މިއަދު ނިންމާފައިވާ ކަމަށެވެ.
އޭގެ ތެރޭގައި ހިމެނެނީ މާލޭސިޓީ ރައްޔިތުންނަށް 61، މާލޭސިޓީ އަތޮޅުތަކުގެ ރައްޔިތުންނަށް 77، ހުޅުމާލެ ފޭސް 1 މާލޭސިޓީ ރައްޔިތުންނަށް 6، ހުޅުމާލެ ފޭސް 1 އަތޮޅުތަކުގެ ރައްޔިތުންނަށް 16، ހުޅުމާލެ ފޭސް 2 މާލޭސިޓީ ރައްޔިތުންނަށް 1، ހުޅުމާލެ ފޭސް 2 އަތޮޅުތަކުގެ ރައްޔިތުންނަށް 16، ވިލިމާލެ، މާލޭސިޓީ ރައްޔިތުންނަށް 6، ވިލިމާލެ، އަތޮޅުތަކުގެ ރައްޔިތުންނަށް 4، އަތޮޅުތަކުގައި 319، ރިސޯޓުތަކުގައި 78 ވޯޓު ފޮއްޓެވެ.
މީގެ އިތުރުން މާފުށީ ޖަލުގައި 2، އައްސޭރި ޖަލުގައި 1، ހުޅުމާލެ ޖަލުގައި 1، ދޫނިދޫގައި 1، ހުޅުލޭގައި 1، ތިލަފުށީގައި 1، އިންޑިޔާގެ ޓްރިވެންޑްރަމްގައި 1، އިންޑިޔާގެ ނިވްދިއްލާގައި 1، މެލޭޝިޔާ ކުއަލަލަމްޕޫރުގައި 2، ސިންގަޕޫރުގައި 1، ސްރީލަންކާ ކޮލަމްބޯ ގައި 4
އިނގިރޭސި ވިލާތް ލަންޑަން ގައި 1، ތައިލެންޑް ބެންކޮކް ގައި 1، ޢަރަބި ޢިމާރާތް އަބޫދާބީގައި 1 ޖަޕާން ޓޯކިޔޯ ގައި 1 ވޯޓު ފޮށި ބެހެއްޓުމަށް ވެސް ވަނީ ނިންމާފައެވެ.
ހަބީބު ވިދާޅުވީ ރީ-ރަޖިސްޓްރޭޝަނަށް ފަހު، ވޯޓުފޮށިތަކުގެ ޢަދަދަށް ބަދަލު އައުމަކީ އެކަށީގެންވާ ކަމެއް ކަމަށާއި ވޯޓުފޮށީގެ ނަންބަރާއި، ވޯޓުފޮށީގެ ކޯޑު، ވޯޓުފޮށީގެ ނަމާއި، ވޯޓުލާ ސަރަޙައްދު އަދި ވޯޓުފޮށި ބަހައްޓާ ރަށާއި، ތަންތަނުގެ ތަފްސީލް މިރޭ އީސީ އިން އިޢުލާން ކުރާނެ ކަމަށެވެ.
