ރައީސް ޞާލިޙުގެ ފުރަތަމަ ކެމްޕޭން ދަތުރުފުޅު ނިންމަވައިލައްވައިފި
ކުރިއަށް އޮތް ރިޔާސީ އިންތިޚާބުގައި އެމްޑީޕީއާއި އެ ޕާޓީއާއެކު ކޯލިޝަން ހަދާފައިވާ ޕާޓީތަކުގެ އިސްވެރިންނާއެކު ރައީސް ޞާލިޙް ކުރެއްވި ފުރަތަމަ ދަތުރުފުޅު ނިންމަވައިލައްވައިފިއެވެ.
ރައީސް ޞާލިޙްގެ ކެމްޕޭން ރަސްމީކޮށް ފެއްޓެވުމަށް އިއްޔެ ޝ. އަތޮޅަށް ކުރެއްވި ދަތުރުފުޅު ނިންމަވާލެއްވުމަށްފަހު އެމަނިކުފާނު އެނބުރި މާލެ ވަޑައިގެންނެވީ ރޭގެ މެންދަމުގެ ވަގުތެއްގައިކަމަށް މަޢުލޫމާތު ލިބެއެވެ.
ކެމްޕޭން ފެށްޓެވުމަށް ރައީސް ޞާލިޙް އެންމެ ފުރަތަމަ ވަޑައިގެންނެވީ ށ. އަތޮޅު ކޮމަންޑޫއަށެވެ. އެއަށްފަހު މަރޮށި، ނީމަރާ އަދި ފޯކައިދޫކަށް ވަޑައިގެންވައިފާއިރު، މި 4 ރަށަށް ވަޑައިގެން އެމަނިކުފާނު ވަނީ އެ ރަށްތަކަށް ކޮށްދެއްވާނެ ކަންކަމުގެ ވަޢުދުތައް ވެވަޑައިގެންފައެވެ.
މިގޮތުން، އެންމެ ފުރަތަމަ ވަޑައިގެންނެވި ކޮމަންޑޫގައި އެމްޑީޕީ މެމްބަރުންނާއި އެމަނިކުފާނަށް ތާޢީދުކުރައްވާ މީހުންނާ ވާހަކަފުޅުދައްކަވަމުން ވިދާޅުވީ، މި މަސް ނިމުމުގެ ކުރިން ދެ ކޮމަންޑޫ އާއި އެ ރަށާ ޖެހިގެން އޮތް މަތިކޮމަންޑު ގުޅާލާނެކަމަށެވެ. އަދި ކޮމަންޑޫއާ ޖެހިގެން އޮތް ކުޑަފަރުގައި އެއާޕޯޓެއް ޤާއިމުކުރައްވާނެކަމަށްވެސް ވަޢުދުވެވަޑައިގެންނެވިއެވެ.
ހަމައެއާއެކު، އެ އަތޮޅު ނޫމަރާގެ އެމްޑީޕީ މެމްބަރުންނާއި ރައީސް ޞާލީޙަށް ތާޢީދުކުރައްވާ މީހުންނާ ވާހަކަފުޅުދައްކަވަމުން އެމަނިކުފާނު ވިދާޅުވީ އެ ރަށް ކައިރީގައި އޮތް ނެޔޮ ކިޔާ ފަޅުރަށް ކައުންސިލަށް ހޯއްދަވައިދެއްވާނެކަމަށެވެ.
އަދި މަރޮށި މީހުންނާ މުޚާތަބުކުރައްވަމުން އެމަނިކުފާނު ވިދާޅުވީ އެ ރަށުގެ ބިން ހިއްކައި އެ ރަށުން ގޯޓި ދެއްވާނެކަމަށް ވަޢުދުވެވަޑައިގެންފައެވެ.
ރައީސް ޞާލިޙްގެ މި ދަތުރުފުޅުގައި އެންމެ ފަހުން ވަޑައިގެންނެވީ އެ އަތޮޅު ފޯކައިދޫއަށެވެ. އެރަށުގައި ކެމްޕޭނުގެ ބޮޑު ޖަލްސާއެއް ބާއްވާފައިވާއިރު، އެ ރަށުގެ މަގުތަކުގައި ތާރަ އަޅުއްވާ މަގުތައް ރަނގަޅު ފެންވަރަކަށް ހައްދަވައިދެއްވާނެކަމަށް ރައީސް ޞާލިޙް ވައުދުވެވަޑައިގެންނެވިއެވެ.
