ނަން އޮޅިގެން ކަމަށްބުނެ ދިން ރަށްނޫން އެހެން ރަށްރަށުގައި ރިސޯޓު ހަދައި ޖަރީމާހިންގި: ރައީސް ޞާލިޙް
ކުރީގެ ދައުރުގައި ރަށްތައް މީހުންނަށް ދޫކޮށްފައިވާ ގޮތަށް ބަލާއިރު، ނަން އޮޅިގެން ކަމަށްބުނެ ދިން ރަށްނޫން އެހެން ރަށްރަށުގައި ރިސޯޓު ހަދައި ޖަރީމާ ހިންގާފައިވާކަމަށް ރައީސް އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.
2023 ވަނަ އަހަރުގެ ރިޔާސީ އިންތިހާބުގެ ކެމްޕެއިން ތެރެއިން މ އަދި ވ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މ ކޮޅުފުށްޓަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ ކޮޅުފުއްޓަކީ އެއް އިރެއްގައި މަސްވެރިރަށެއް ނަމަވެސް ސުނާމީއަށްފަހު ދިރިއުޅުމަށް އައި ބަދަލުތަާއި ގުޅިގެން މަސްވެރިކަން ހީނާރުވެފައިވާކަމަށެވެ.
މަސްވެރިކަން ހީނައުވެފައިވީ ނަމަވެސް އެ ރަށުގެ މީހުންނަށް ރަށުގައި ތިބެ ވަޒީފާ ލިބޭގޮތް ހޯދަދޭންޖެހޭކަމަށް ފާހަގަކުރައްވަމުން ރައީސް ޞާލިޙް ވިދާޅުވީ އެރަށް ކައިރިން ރިސޯޓު ހެދުމަށްޓަކައި ކުރީ ދައުރުގައި ވަކި ފަރާތަކަށް އެއް ރަށުގެ ގޮތުގައި 3 ރަށް ދީފައިވާ ކަމަށާއި އަދި އަދަށްދާންދެންވެސް އޭގެ އެއްވެސް މަސައްކަތެއް ކޮށްފައިނުވާކަމަށެވެ.
މީގެ އިތުރުން، އޭރު ރަށްތައް ދޫކުރަމުންދާ ގޮތް އެންމެންނަށްވެސް އެނގޭނެކަަމަށައި، ބައެއް ރަށްރަށް ދެމީހުންނަށް ދީފައި ހުރިއިރު ދިން ރަށްނޫން އެހެން ރަށްރަށުގައިވެސް ރިސޯޓު ހަދާފައިވާކަމަށެވެ.
"މިއީ އެއް ރަށެއްގޮތުގައި 3 ރަށް ދީފައި އޮތް ދާއިރާއެއް. ބައެއް ރަށްރަށް އެބަހުރި ދެމީހުންނަށް ދީފަ. އަނެއްކާ ދިން ރަށްނޫން އެހެން ރަށްރަށުގައި ރިސޯޓު ހަދާފައިވެސް އެބަހުރި. ކައިރިވެއްޖިއްޔާ، އޮޅިގެން، ނަން އޮޅިގެން ކަމަށް. ތ އަތޮޅުގައި އެބައޮތް އޭގެ ރަށެއް. މިހެން ގޮސް މިކަހަލަ އެތައް އެތައް އަޅުގަނޑު ދަންނަވާނީ ޖަރީމާއެއް އެބަހުރި ހިންގާފަ" ރައީސް ޞާލިޙް ވިދާޅުވިއެވެ.
އަދި ދެން އަންނަ ދައުރުގައި ކޮޅުފުށީ ރައްޔިތުން އެދޭގޮތަށް އެރަށް ކައިރިން ރިސޯޓު ތަރައްޤީކުރުމުގެ މަޝްރޫއެއް ހިންގައިދޭނެކަމަށްވެސް ރައީސް ޞާލިޙް ވިދާޅުވިއެވެ.
މި ސަރުކާގެ އަމާޒަކީ ރައްޔިތުން އަމާންވެއްޓެއްގައި ތަރައްގީގެ މުޖްތަމައެއްގައި ދިރިއުޅެން ފުރުސަތު ހޯދައިދިނުންކަން ފާހަގަކުރައްވަމުން ރައީސް ޞާލިޙް ވިދާޅުވީ، ރާއްޖެ ތަރައްޤީ ކުރުމަށް މަސައްކަތް ކުރަން ޖާގަ ލިބުނުކަމަށާއި، މުޅި ރާއްޖޭގެ އެކި ކަންކޮޅުތަކުގައި 141 ރަށެއްގައި ފެނާއި ނަރުދަމާގެ ނިޒާމު ހިނގަމުން ނިމެމުން ދާކަމަށެވެ.
އަދި 158 ރަށެއްގެ އިންޖީނުގެ ޖަނެރޭޓު ބަދަލުކޮށް ނިމިފައިވާއިރު، ބިން ހިއްކުމުގެ 21 މަޝްރޫއެއް ކުރިއަށްދާކަމަށާއި އޭގެ ތެރެއިން 8 މަޝްރޫއުނިމި ބާކީ 13 މަޝްރޫއުގެ މަސައްކަތް މިހާރުވެސް ކުރިއަށްދާ ކަމަށެވެ.
މީގެ އިތުރުން، 410 ގެދޮރުވެރިންނަށް ދުއިސައްތަ ބައްތިރީސް މިލިއަން ރުފިޔާ އެޕްރޫވްކޮށް، މިހާރު ނިމި އޭގެތެރެއިނ ސަތޭކަ ހަތަރު މިލިއަން ރުފިޔާ ދޫކުރެވިއްޖެކަމަށްވެސް ރައީސް ޞާލިޙް ފާހަގަކުރެއްވިއެވެ.
Ads by STO
