މަޖިލީހުގެ މެމްބަރުންގެ އަދަދު ހައްދެއްނެތް މިންވަރަށް އިތުރުވާގޮތަށް އޮތުމަކީ ތާއީދުކުރެވޭ ކަމެއް ނޫން: ނާޒިމް
މަޖިލީހުގެ މެމްބަރުންގެ އަދަދު ހައްދެއްނެތް މިންވަރަށް އިތުރުވާގޮތަށް އޮތުމަކީ ތާއީދުކުރެވޭ ކަމެއް ނޫންކަމަށް ކަމަށް އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމް ވިދާޅުވެއްޖެއެވެ.
ނާޒިމް ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ މެންބަރުންގެ އަދަދު ހައްދެއްނެތް މިންވަރަށް އިތުރުވާގޮތަށް އޮތް އޮތުމަށް ތާއީދުނުކުރެވޭނެކަމަށާއި އެކަމަށް ނިމުމެއް ގެނައުމަށް އެ ޕާޓީން މަސައްކަތްކުރާނެކަމަށެވެ.
އެގޮތުން، ރައްޔިތުންގެ މަޖިލީހުގެ ދެންފެށޭ ދައުރުގައި ޤާނޫނޫ އަސާސީ އިޞްލާހުކުރުމަށް އެމްއެންޕީން ހުށަހަޅާނެކަމަށް ނާޒިމް ވިދާޅުވިއެވެ.
ނާޒިމް މިހެން ވިދާޅުވެފައިމިވަނީ، އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބަށް، ހަ ދާއިރާއެއް އިތުރުވާނެ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނުމާއި ގުޅިގެންނެވެ. އެގޮތުން 2024 ވަނަ އަހަރުގެ ރައްޔިތުންގެ މަޖިލީހަށް މާލޭ ސިޓީ އަށް 2 ގޮނޑި، އައްޑޫ ސިޓީ އަށް 1 ގޮނޑި، މާޅޮސްމަޑުލު ދެކުނުބުރިއަށް 1 ގޮނޑި، މާލެއަތޮޅަށް 1 ގޮނޑި އަދި ހުވަދުއަތޮޅު އުތުރުބުރިއަށް 1 ގޮނޑި އިތުރުވާނެކަމަށް އިލެކްޝަންސް ކޮމިޝަންގެ ނައިބުރައީސް އިސްމާއިލް ހަބީބު މިއަދު ކުރެއްވި ޓްވީޓެއްގައި ވިދާޅުވެފައިވެއެވެ.
