ޚިޔާލު ތަފާތުވުމުން ޕީޕީއެމް-ޕީއެންސީ އާއި ޑިމޮކްރެޓްސްގެ މަޝްވަރާތައް ހުއްޓައިލައިފި
ޕްރޮގްރެސިވް ކޮންގްރެސް ކޯލިޝަނުން، އައު ސިޔާސީ ޕާޓީ "ދަ ޑިމޮކްރެޓްސް" އާއިއެކު ކުރަމުން އައި މަޝްވަރާތައް މެދުކެނޑިފައިވާކަން ހާމަކުރައްވައި، ދެ ފަރާތުގެ ބައްދަލުވުންތަކުން އެއްވެސް ނަތީޖާއެއް ނުނެރެވުނު ސަބަބު، ޕީއެންސީގެ ރައީސް ޢަބްދުއްރަޙީމް ވިދާޅުވެދެއްވައިފިއެވެ.
ޗެނަލް13ގައި ރޭ ވާހަކަ ދައްކަވަމުން، ޢަބްދުއްރަޙީމް ވިދާޅުވި ގޮތުގައި، ޑިމޮކްރެޓްސް އާއިއެކުގައި ކުރެވުނު މަޝްވަރާތަކުގެ ތެރޭގައި ރާއްޖޭގެ މަސްކަނޑު ވިއްކައިލުމާއި، އިންޑިއާގެ ސިފައިން މި ތަނުގައި ޤާއިމުވެ ތިބޭ މައްސަލައާއި، ސަރުކާރުން ހިންގާ ކޮރަޕްޝަނުގެ ބޮޑެތި މައްސަލަތައް ހިމެނެއެވެ.
"އަޅުގަނޑުމެން ދެންނެވިން، ހިނގާށޭ، އެންމެންނަށް އެއްބަސްވެވޭ ކަންކަމުގައި ގުޅިގެން މަސައްކަތް ކުރަން. ކަނޑު ވިއްކާލުމަކީ ގޯހެއް ކަމަށް ވަންޏާ، ހިނގާށޭ އަޅުގަނޑުމެންނާއި އެކުގައި ނުކުންނަން. އިންޑިއާގެ ސިފައިން މިތާ ތިބުމަކީ ޤަބޫލު ނުކުރެވޭ ކަމެއް ކަމަށް ވަންޏާ، ހިނގާށޭ އަޅުގަނޑުމެންނާއެކީގައި އަޗު އުފުލަން ނުކުންނަން."
ޢަބްދުއްރަޙީމް ވިދާޅުވީ، އެ ޕާޓީން މިކަން ކަމަށް އެއްބަސް ނުވި ކަމަށާއި، ދައްކަމުން ދިޔައީ "ކޮމަން ކެންޑިޑޭޓެއް"ގެ ވާހަކަ ކަމަށެވެ.
ޕީޕީއެމް-ޕީއެންސީ އާއި ޑިމޮކްރެޓްސް ގުޅިގެން، އެއް ކެންޑިޑޭޓަކު ނެރެން ބޭނުން ނުވާތީ، ރިޔާސީ އިންތިޚާބުގެ ވާހަކަ ނުދެއްކޭނެ ކަމަށް ބުނެފައިވާނެ ކަމަށް ވެސް ޢަބްދުއްރަޙީމް ވިދާޅުވިއެވެ.
ޢަބްދުއްރަޙީމް ވަނީ ޑިމޮކްރެޓްސް އާއިއެކު އިދިކޮޅުން ކުރިއަށް ގެންދަމުން އައި މަޝްވަރާތައް މިވަގުތަށް މެދުކަނޑައިލައިފައިވާކަން ފާހަގަކުރައްވައި، އިތުރަށް އެހެން ސިޔާސީ ޕާޓީއަކާ މަޝްވަރާ ކުރެވޭނީ، ޕީޕީއެމް ޕީއެންސީން ޤަބޫލު ކުރާ ބޮޑެތި މައްސަލަތަކުގައި ގުޅިގެން ކުރިއަށް ދިޔުމަށް އެއްބަސްވުމުން ކަމަށް ވިދާޅުވެފައެވެ.
ސަޅި.. 2023 ގެ އިންތިހާބުގައި ޕީޕީއެމްއަށް ލިބޭނެ ހުރިހާއެއްޗެއް ލިބި ހަމަވީ ތި ދެން.. ޔާމީނު ޖަލުގައި ބައިތިއްބައިގެން ތިބޭ ދެން ކަލޭމެން