ކުރީ ސަރުކާރުތަކުން މަޝްރޫއު ހިންގާފައި އޮތީ ތަރުތީބެއް ނެތި, އެހެންވެ ޚަރަދުތައް ޑަބަލްވޭ: ރައީސް ޞާލިޙް
ކުރީ ސަރުކާރުތަކުން މަޝްރޫއު ހިންގާފައި އޮތީ ތަރުތީބެއް ނެތި, އެހެންވެ މަޝްރޫއުތައް ހިންގުމަށްދާ ޚަރަދުތައް ޑަބަލްވާ ކަމަށް ރައީސް ޞާލިޙް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލީޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ, ށ. ފުނަދޫއަށް މިއަދު ކުރެއްވި ކެންޕެއިން ދަތުރުފުޅުގައި އެމަނިކުފާނަށް ތާއީދުކުރައްވާ މެންބަރުންނާއެކު ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ.
ފުނަދޫގެ ރައްޔިތުންނަކީ އެ ރަށުގެ ތަރައްޤީއަށްޓަކައި އޭރުގައި އޮންނަ ސަރުކާރަކަށް ތާއީދުކުރާ ބަޔެއްކަން ފާހަގަކުރައްވަމުން ރައީސް ޞާލިޙް ވިދާޅުވީ، ތަފާތުކުރުމެއްނެތި އެ ރަށަށްވެސް ކޮށްދޭނެކަމަށް އެމަނިކުފާނު ވެވަޑައިގެންނެވި ވަޢުދުތައް މިހާރުވެސް ފުއްދަވަމުންދާކަމަށެވެ.
އެގޮތުން، ފުނަދޫގެ ރައްޔިތުންގެ އެދުމުގެ މަތިން އެރަށުގައި އަލަށް އާބަދުވެފައިވާ ސަރައްދުގައި ނަޒުދަމާ ނިޒާމު ޤާއިމުކުރުމާއި، އެ ރަށު މިސްކިތް އަޅައިދީ ފެނުގެ ޚިދުމަތް ފޯރުކޮށްދީ، ފުނަދޫ ސުކޫލުގައި ހުރި ދަތިތައް ހައްލުކޮށް އެ ސުކޫލުގައި 15 ކްލާސްރޫމް އިތުރުކޮށް އަދި އެ ރަށު ހޮސްޕިޓަލުގެ ފެންވަރު ރަނގަޅުކުރުމަކީ އެމަނިކުފާނު ކުރިން ވެވަޑައިގެންނެވި ވައުދުފުޅުތަކެއްކަމަށާއި އޭގެ ތެރެއިން ގިނަ ކަންކަން މިހާރު ނިމި އަނެއްބައި މަސައްކަތް ފެށިފައިވާކަމަށް ރައީސް ޞާލިޙް ވިދާޅުވިއެވެ.
މީގެ އިތުރުން، ފުނަދޫގެ ތަރައްޤީއަށް ކުރީގެ ސަރުކާރުތަކުން މަސައްކަތްތަކެއް ކޮށްދިން ކަމަށާއި ނަމަވެސް އޭގެ ތެރެއިން ބައެއް ކަންކަމަކީ "ތަރުތީބެއްނެތި" ކޮށްފައި ހުރި ކަންތައްތަކެއްކަން ފާހަގަކުރައްވަމުން ރައީސް ޞާލިޙް ވިދާޅުވީ އެރަށު ތާރު އަޅައި ނިންމައިފައި ހުރީ އަޑިއަށް ވަޅުލަންޖެހޭ އެއްޗެހި ވަޅުނުލައި، ފެނާއި ނަޒުދަމާ ނާޅާ ކަމަށެވެ. އެހެން އެކަން ކޮށްފައިވުމުން މި ސަރުކާރުން ޖެހުނީ އިތުރަށް ޚަރަދުކޮށްގެން އެކަން ކުރަންކަމަށާއި އެކަންކަން ކުރުމަށް މި ސަރުކާރުން ރަނގަޅު ޕްލޭންތަކެއް ކޮށްގެން މިހާރު މަސައްކަތްތައް ފަށާފައިވާކަމަށެވެ.
ހަމައެއާއެކު، ކުރިއަށް އޮތް ދައުރުގައި އެ ރަށުގައި ދެންހުރި މަގުތަކުގައިވެސް ތާރު އަޅުއްވައިދެއްވާނެކަމަށާއި، މި ވެރިކަމުގައި މިހާތަނަށް އައިއިރު ކުރީގެ އަހަރާއި އަޅާބަލާއިރު ތަރައްޤީގެ މަސައްކަތްތަކަށް ބޮޑު ޚަރަދުތަކެއްކުރެވިއްޖެކަމަށާއި، އެއީ ރައްޔިތުންނަށް ބޭނުންވާ ކަންކަން ފޯރުކޮށްދިނުމަށް ރައްޔިތުންނަށް ހިދުމަތްކުރުމަށް ކުރާ ހަރަދުތަކެއްކަމަށް ރައީސް ޞާލިޙް ވިދާޅުވިއެވެ.
ރައްޔިތުންނަށް ބޭނުންވާ އުމްރާނީ ތަރައްޤީތަކާއި އަސާސީ ހިދުމަތްތައް ފޯރުކޮށްދިނުމަށް މި ސަރުކާރުން ބޮޑެތި މަސައްކަތްތައް ކުރައްވާކަން ފާހަގަކުރައްވަމުން ރައީސް ޞާލިޙް ވިދާޅުވީ ކުރިއަށް އޮތް ރިޔާސީ އިންތިޚާބުގައި ގޮތެއް ނިންމަވާއިރު ވާދަވެރިންނަކީ ކޮބައިތޯ ފުނަދޫ ރައްޔިތުންވެސް ރަނގަޅަށް ވިސްނަވަން އެމަނިކުފާނު އެދޭކަމަށެވެ.
"އެހެންނަމަވެސް، ރާއްޖޭގެ ސިޔާސީ މަސްރަހު މިހާރު އޮތް ގޮތުން ހަމަ ވާދަ ކުރާނީ އެމްޑީޕީއާ ޕީޕީއެމް. އެނޫން ބަޔަކަށެއް އެބުނާ ވަރުގެ ތާއިދެއް އޮތް ތަނެއް އަޅުގަނޑަކަށް ނުފެނޭ. އެހެންވީމާ ތިބޭފުޅުން ނިންމަންވަނީ 2018 ގެ ކުރީގެ އެ އޮތް ހާލަތަށް އަޅުގަނޑުމެން އެނބުރި ދާނީތޯ. ނޫނިއްޔާ ފެށިފައި މިއޮތް ތަރައްޤީގެ މަޝްރޫއުތަކާއެކީގައި މިރަށްވެސް ހިމެނޭގޮތަށް މިއަތޮޅުވެސް ހިމެނޭގޮތަށް ކުރިއަށް ދާނީތޯ..ތަރައްގީއާއެކީ ކުރިއަށް ދާނީތޯ ނުވަތަ އެ އަނިޔާވެރިކަމާއެކި ބިރުވެރިކަމަށް އެނބުރި ދާނީތޯ" ރައީސް ޞާލިޙް ވިދާޅުވިއެވެ.
ކުރީގެ ސަރުކާރުގައި ރައްޔިތުން 5 އަހަރު ތަޖުރިބާކޮށްފައިވާކަމަށާއި، އެ 5 އަހަރު ރައްޔިތުނާ ކުރިމަތިވި ދަތި އުދަނގުލާ ތަހަމަލު ކުރަންޖެހުނު ދަތި ހާލަތު އަބަދުވެސް ހަނދާނުގައި ބަހައްޓަން ވާނެކަމަށާއި، ކުރިއަށް އޮތް ރިޔާސީ އިންތިޚާބުގައި ރައްޔިތުން ނިނަމަވާ ނިންމުން އެއީ ރާއްޖޭގެ މުސްތަޤުބަލާއި ގުޅިފައިވާ ނިންމުމެއްކަން ވިސްނުމަށް ރައީސް ޞާލިޙް ވަނީ އެދިވަޑައިގެންފައެވެ.
