ދެވަނަ ދައުރު ނިމިގެންދާއިރު ދެން އަންނަ ސަރުކާރަކަށް ލޯނު ދައްކާކަށް ނުޖެހޭނެ، ދައުލަތުގައި ފައިސާ ހުންނާނެ: ރައީސް ޞާލިޙް
ކުރިއަށް އޮތް ރިޔާސީ އިންތިޙާބު ކާމިޔާބުކުރައްވައި އިތުރު ދައުރެއް ލިބިވަޑައިގެންފި ނަމަ ސަރުކާރުން މިހާރު ނަގަމުންދާ ލޯނުތައް އެ ދައުރުގައި ދައްކަވައި ނިންމަވާނެ ކަމަށާއި އެކަމަށް ބޭނުންވާ ފައިސާ ދައުލަތުގައި އެހާތަނުގައި ހުންނާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ޞާލިޙް މިހެން ވިދާޅުވީ އެމަނިކުފާނުގެ ރިޔާސީ ކެމްޕޭނުގައި ށ. މިލަންދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަ ދައްކަވަމުންނެވެ. އެގޮތުން، 2026 އިން ފެށިގެން ދައުލަތުގައި ފައިސާ ހުންނާނެ ކަމަށާއި ދެ ވަނަ ދައުރެއް ލިބިވަޑައިގެންފި ނަމަ އޭގެ ފަހުން އަންނަ ސަރުކާރަކަށް ލޯނު ދައްކަން ނުޖައްސަވާނެކަމަށް އެމަނިކުފާނު ވިދާޅުވިއެވެ.
"2026 ވަނަ އަހަރުގެ ފަހުން ދިވެހި ދައުލަތުގައި ހުންނާނެ ފައިސާ ލޯނު ދައްކާނެ ވަރަށް. އަޅުގަނޑުގެ ދެ ވަނަ ދައުރުގައި އިރާދަކުރެއްވިއްޔާ ނިމިގެންދާނީ މި ދެންނެވި ލޯނު ދައްކަން ދެން އަންނަ ސަރުކާރަކަށް ނުޖައްސައި. އެކަން ވެސް ހަމައަކަށް އަޅުވާނަން،" ރައީސް ޞާލިޙް ވިދާޅުވި އެވެ.
މީގެ އިތުރުން، މިސަރުކާރުން ބެލީ ސިޔާސީ ހަލަބޮލިކަމުން ދުރުވެ ގައުމަށް ތަރައްގީ ގެނައުމަށް ކަމަށާއި މި ސަރުކާރަށް ތަރައްގީއަށް މަސައްކަތްކުރަން ފުރުސަތު ލިބިފައިވާއިރު، އެންމެ މުހިންމު މަސައްކަތަކަށް ކޮށްފައިވަނީ ތަފާތުކުރުމެއްނެތި ރައްޔިތުން ބޭނުންވެފައި ތިބި އަސާސީ ޚިދުމަތްތައް ފޯރުކޮށްދިނުން ކަމަށްވެސް ރައީސް ޞާލިޙްގެ ވާހަކަފުޅުގައި ފާހަގަކުރެއްވިއެވެ.
