ރައީސް ޔާމީނަށް ރިޔާސީ އިންތިހާބުގައި ވާދަނުކުރެވޭނެ ކަމަށް އިލެކްޝަނުން ނިންމައިފި
ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން އަބްދުލްޤައްޔޫމްއަށް ކުރިޔަށް އޮތް ރިޔާސީ އިންތިހާބުގައި ވާދަނުކުރެވޭނެ ކަމަށް އިލެކްޝަންސް ކޮމިޝަނުން ނިންމައިފިއެވެ.
ރައީސް ޔާމީންގެ ކެންޑިޑެސީ ފޯމު، އީސީއަށް ހުށަހަޅާފައިވަނީ މިއަދު ހެނދުނުގެ ވަގުތެއްގައެވެ.
މި ފޯމު އީސީއަށް ހުށަހެޅުއްވުމަށް އެ ޕާޓީ އާއި ޕީއެންސީގެ ލީޑަރޝިޕްގެ ބޭފުޅުންނާއި ސެނެޓު މެމްބަރުން އީސީއަށް ވަޑައިގެންނެވިއެވެ.
ރައީސް ޔާމީންގެ ކެންޑިޑެސީ ބަލައިނުގަންނަން އީސީން ނިންމި ނަމަވެސް އެމަނިކުފާނުގެ ރަނިންމޭޓު އަދި ކުރީގެ ނައިބު ރައީސް ޑރ. މުހައްމަދު ޖަމީލް މިއަދު ވިދާޅުވި ގޮތުގައި އެ މައްސަލަ ސުޕްރީމް ކޯޓަށް ހުށަހަޅަން އެ ޕާޓީ އޮތީ ތައްޔާރަށެވެ.
ފޯމު ހުށަހެޅުއްވުމާއި ގުޅޭގޮތުން ވާހަކަފުޅު ދައްކަވަމުން ޖަމީލު ވިދާޅުވީ، ރައީސް ޔާމީންގެ ކެންޑިޑެސީ ފޯމު ހުށަހެޅުމަކީ ސިޔާސީ އެންމެ ބޮޑު ޕާޓީ، ޕީޕީއެމްގެ އެންމެހައި މެމްބަރުންގެ އިތުރުން، ވަރަށް ގިނަ ރައްޔިތުންގެ ޙައްޤާއި ގުޅިފައިވާ ކަމެއް ކަމަށެވެ.
ޖަމީލު އިތުރަށް ވިދާޅުވީ، ޝަރުޢީ ދާއިރާއަށް ސަރުކާރުގެ ނުފޫޒެއް ނެތް ނަމަ، ރައީީސް ޔާމީންގެ ކެންޑިޑެސީ ފޯމު ހުށަހެޅުމާއި ހަމައަށް، ރައީީީސް ޔާމީންގެ އިސްތިއުނާފު މައްސަލަ ވެސް އޮންނާނީ ނިމިފައި ކަމަށެވެ.
