މުޢިއްޒު ޕީއެންސީއަށް ސޮއި ކުރައްވައިފި
ޕީޕީއެމްގެ މެމްބަރެއްގެ ގޮތުގައި ހުންނެވި ޑރ.މުޙައްމަދު މުޢިއްޒު ޕީއެންސީއަށް ސޮއި ކުރައްވައިފިއެވެ.
މާލެ ސިޓީގެ މޭޔަރުގެ މަޤާމުގައި ހުންނެވި މުޢިއްޒު ޕީއެންސީއަށް ސޮއި ކުރައްވައިފައިވަނީ، އެޕާޓީން ރިޔާސީ އިންތިޚާބުގައި ވާދަކުރުމަށް މިއަދު ނިންމާ ޓިކެޓަށް ކުރިމަތި ލުމުގެ ފުރުސަތު ހުޅުވައިލުމުންނެވެ.
ޕީއެންސީގެ ރިޔާސީ ޓިކެޓަށް ވާދަކުރުމުގެ ފުރުސަތު މިއަދުގެ މެންދުރު 2:00 އާ ހަމައަށް ވަނީ ހުޅުވައިލައިފައެވެ.
އެ ޕާޓީން ނިންމާފައިވަނީ ވާދަކުރާނެ ކެންޑިޑޭޓަކު ކަނޑައަޅަން މިއަދު ހަވީރު 4:00 ގައި މަޝްވަރާ މަޖިލީހުގެ ބައްދަލުވުމެއް ބޭއްވުމަށެވެ.
ޕީއެންސީގެ ޓިކެޓަށް ކުރިމަތި ލެއްވުމަށް މުއިއްޒު ޕީއެންސީއަށް ގުޅިވަޑައިގެންނެވިއިރު، މަޑުއްވަރީ ދާއިރާގެ މެންބަރު އާދަމް ޝަރީފްވެސް ޓިކެޓަށް ކުރިމަތި ލެއްވުމުގެ ޝައުގުވެރިކަން ގެންގުޅުއްވާކަން، ބައެއް މީޑިއާތަކަށް ވަނީ ހާމަ ކުރައްވައިފައެވެ.
