އަންހެނުންނަށް ހައްޤު މަގާމު ހޯދައިނުދެވޭނަމަ މުޖްތަމައު ކުރިޔަށް ނުދާނެ: ނާޒިމް
މުޖްތަމައުގެއެއްގެ ހައިސިއްޔަތުން އަންހެނުންގެ ހައްޤުތައް ކަށަވަރު ކުރުމުގައި ފެއިލްވެގެން ނުވާނެކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެނޑިޑޭޓު މުޙައްމަދު ނާޒިމް ވިދާޅުވެއްޖެ އެވެ.
އެމްއެންޕީން މިރޭ ސަލްޓަން ޕާކުގައި ކުރިޔަށް ގެންދިޔަ، އަންހެނުންގެ ލީޑާޝިޕް ފޯރަމްގައި ވާހަކަ ދައްކަވަމުން ނާޒިމް ވަނީ ސިޔާސީ މައިދާނުގައި އަންހެނުން ބާރުވެރި ކުރުވުމަށް ކުރަންޖެހޭ މަސައްކަތް ފާހަގަކޮށް، އެމްއެންޕީގެ ތެރެއިން ހުރި ފުރުސަތުތައް ހާމަކުރައްވާފަ އެވެ. ނާޒިމް ވިދާޅުވީ އެމްއެންޕީއަކީ ފިރިހެނުންނާއި އެއް ހަމައެއްގައި މަސައްކަތް ކުރާ އަންހެނުން ތިބި ޕާޓީއެއްކަމަށާއި ކޮންމެ ހަރަކާތަކާއި އިވެންޓަކުން ވެސް އެކަން ސާބިތުވާނެ ކަމަށެވެ.
އަންހެނުންގެ ހައްޤުތައް ކަށަވަރު ކުރުމަށް ކުރަންޖެހޭ މަސައްކަތްތައް ގިނައިރު، ނާޒިމް ވިދާޅުވިގޮތުގައި އެ މީހުންގެ ހައްޤު ހޯދައިނުދެވޭނަމަ މުޖްތަމައުއެއް ކުރި ނާރާނެ އެވެ. މިއީ އޭނާގެ ވިސްނުމަށް ނާޒިމް ވިދާޅުވީ ކުރެވުނު އެކި ކެމްޕެއިން ދަތުރުތަކާއި ބައްދަލުވުންތައް އަދި ކަންބޮޑުވުންތަކުގެ ގޮތުގައި އައި ކޮންމެ ޝަކުވާއެއް ވެސް އަޑުއަހައި ފާރަވެރިވާނެކަމުގެ ވައުދާއި އެކު އެވެ.
ކުރަންޖެހޭ މަސައްކަތްތައް ގިނަ ނަމަވެސް، އެކަންކަން ހައްލުކޮށް ކާމިޔާބުކަމާއި އެކު އަންހެނުން ކުރިއެރުމަށް މަގުފަހިކޮށްދީ، އަންހެނުންގެ ރައްކާތެރިކަން ކަށަވަރުކޮށްދޭ މުޖްތަމައުއެއް އޮތް ތަނަކަށް މި ރާއްޖެ ބަދަލު ކުރައްވާނެކަމަށް ނާޒިމް ވިދާޅުވި އެވެ.
"އަޅުގަނޑު ގަބޫލު ކުރަމޭ ދިވެހިރާއްޖޭގައި އަންހެނުންގެ ހައްޤުތައް ހިމާޔަތްކޮށްދީ، އެކަނބަލުންގެ ހައްޤު މަގާމް މުޖްތަމައުގައި ހޯދައިދީ، ކުރިއެރުމަށް މަގު ފަހިކޮށްދީ އަދި ރައްކާތެރިކަން ކަށަވަރުކޮށް ދިނުމަށްޓަކައި ވަރަށް ގިނަ ކަންތައްތަކެއް ކުރަންޖެހޭނޭ ކަމުގައި... އެކަންކަން ފުރިހަމަކޮށް، ދިވެހިރާއްޖެއަކި އަންހެނުންގެ ކުރިއެރުމަށް މަގުފަހިކޮށްދޭ، އަންހެނުންނާއި އަންހެން ކުދިންގެ ރައްކާތެރިކަން ކަށަވަރުކޮށްދޭ ޤައުމަކަށް އިރާދަކުރެއްވިއްޔާ އަޅުގަނޑު ހަދާނަމޭ..." ނާޒިމް ވިދާޅުވި އެވެ
މީގެއިތުރުން ނާޒިމް ވިދާޅުވީ ހައްގުތައް ކަށަވަރު ކުރެވޭނީ ގާނޫނުތަކުގައި ލިޔެ، އެކަންތައް މާނަކޮށްގެން ނޫން ކަމަށެވެ. އަންހެނުންގެ ހައްގުތަކަކީ އެއީ އިންސާނީ ހައްގުތަކަށްވާއިރު، ގައުމުގެ އިސް ސަފުގައި ތިބޭ މީހުންގެ ކޮނޑުގައި އެޅުވިފައިވާ ވާޖިބަކަށް ވާނީ އިސްލާމް ދީނުގައި އަންހެނުންނަށް ދެއްވާފައިވާ ހައްގު މަގާމު ހޯދައިދީ، އެންމެ ފުރިހަމަ މާނައިގައި މުޖްތަމައު ބައްޓަން ކުރުންކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ ސަރުކާރުގެ ޒިންމާއަކަށް ވާން ޖެހޭނީ، އަންހެނުންނަށް ކުރިޔަށް ދިއުމަށް ހުރި ހުރަސްތައް ގިރާކޮށް ތަޢުލީމާއި އަދި ވަޒީފާގެ ބާޒާރުގައި ކާމިޔާބު ހޯދުމަށް މަސައްކަތް ކުރަމުން ގެންދާ ޒުވާން އަންހެން ކުދިންގެ މުސްތަގުބަލުގެ އުންމީދުތައް ފުރިހަމަކޮށްދިނުމެވެ.
ދިވެހިންގެ ތެރޭގައި ތަފާތު އެކި ވޭނީ ދިރިއުޅުމެއްގައި އުޅޭ، ހާލަތު ގޯސް އެތައް ބަޔަކު ތިބިއިރު އެ މީހުންގެ މުސްތަގުބަލުގެ އުންމީދުތައް ފުރިހަމަކޮށްދިނުން އެއީ ސަރުކާރުގެ ޒިންމާއެއްކަމަށް ނާޒިމް ވިދާޅުވި އެވެ. ނާޒިމް ފާހަގަކުރެއްވި ގޮތުގައި އޭގެ ތެރޭގައި ތައުލީމާއި، އަދި ވަޒީފާގެ ބާޒާރުގައި ކާމިޔާބު ހޯދުމަށް މަސައްކަތް ކުރަމުން ގެންދާ ޒުވާން އަންހެން ކުދިން ހިމެނެ އެވެ.
"ހަމައެއާއެކު، ދިރިއުޅުމުގެ ހަނގުރާމައިގެ ތެރެއިން ވަރި އާއި އަދި ހުވަފަތްވުމުގެ ސަބަބުން، ކުދިންނާ އެކު ވަޒީފާ އަދާކުރަމުން ކުދިން ބަލަމުންގެންދާ އެކަނިވެރި މައިންގެ ދިރިއުޅުން ފަސޭހަކޮށްދީ އެ ކަނބަލުންނަށް ޚަރަދު ހޯދުމާއި އަދި ރައްކާތެރިކަން ކަށަވަރުކޮށްދިނުމަކީ ކޮންމެހެން ކުރަންޖެހޭ ކަންތައްތަކުގައިވެސް އަޅުގަނޑު ގަބޫލު ކުރަނީ. ރޭޕް އަދި ޖިންސީ ގޯނާއާއި، ގެވެށި އަނިޔާއަކީ އަޅުގަނޑުމެންގެ ގިނަ އަދަދެއްގެ އަންހެންކުދިންނާއި އަންހެން ބޭފުޅުން ތަހައްމަލު ކުރައްވާ އަނިޔާއެއްކަން ގަބޫލުކޮށް އެބޭފުޅުންގެ ރައްކާތެރިކަން ކަށަވަރުކޮށްދީ، އިންސާފު ގާއިމުކޮށް ދިނުމަކީ ކޮންމެހެން ކުރަންޖެހޭ ކަމެއްކަމުގައިވެސް އަޅުގަނޑު ގަބޫލު ކުރަނީ." ނާޒިމް ވިދާޅުވި އެވެ
ނާޒިމް ވިދާޅުވީ އޭނާގެ ވެރިކަމެއްގައި، އަންހެނުންނަށް އަނިޔާކުރާ ނުވަތަ ކުޑަކުއްޖަކަށް ޖިންސީ ގޯނާކޮށް އަނިޔާ ކުރާ މީހަކަށް ލިބޭނެ މައާފެއް ނެތް ކަމަށެވެ.
ނާޒިމް ވިދާޅުވީ އަންހެން ކުދިންނަށް ކުރިމަތިވާ ޖިންސީ ގޯނާގެ އަޑުއެއްސެވުމަށް ފަހު، އެކަމަށް ފިޔަވަޅު އަޅުއްވާނެކަމަށް ވިދާޅުވެ އޭގެ ޖެހިގެން އަންނަ ދުވަހު އަދަބު ނުދެވޭނަމަ އެއީ ހައްގުތައް ނިގުޅައިގަތުންކަމަށެވެ.
"ޖިންސީ ގޯނާގެ ޝިކާރައަކަށް ވެފައިވާ އަންހެންކުދިން އެކުދިންގެ އައިޑެންޓިޓީ ހާމަވާނޭހެން، އޮފީހަށް ގެންދަވައިގެން، އެކުދިންނާއެކު ކީރިތި ކުރައްވާފައި، އަނެއް ދުވަހު އެއީ ނުވާ ކަމަކަށް ހައްދަވައި ކުށްކުރި ކަމަށްވާ މީހާއަށް ޤައުމުގައި އެންމެ މަތީ ފަންތީގައި އުޅުމުގެ ފުރުސަތު ދިނުމަކީ އަންހެނުންގެ ރައްކާތެރިކަން ނިގުޅައިގަތުން. އެކުދިންގެ އިހުތިރާމް ކަނޑުވާލުން..." ނާޒިމް ވިދާޅުވި އެވެ.
ނާޒިމް ވިދާޅުވީ ސިޔާސަތުތައް ރާވާ ހިސާބުގައި އާއި، ކަންކަން ނިންމާ ހިސާބުގައި އަންހެނުން އިތުރު ކުރުމަކީ ކޮންމެހެން ކުރަންޖެހޭ މަސައްކަތެއް ކަމަށެވެ. އަދި ވިދާޅުވީ ސަރުކާރުގެ އިސް މަގާމުތަކުގައި އަންހެނުން ގިނަވުމަކީ މުޖްތަމައުގެ ދުޅަހެޔޮކަމަށް އެކަށައެޅޭ ސިޔާސަތުތަކާއި އަދި ކުރެވޭ އިންވެސްޓުމެންޓުތައް އިތުރުވާނެ ސަބަބެއްކަމަށެވެ.
ނާޒިމް ވިދާޅުވީ މިއަދުގެ ރާއްޖޭގެ ހަގީގަތަކީ އަންހެނުންކަކީ ތައުލީމީ ގޮތުންނާއި، ގާބިލުކަމުގެ ގޮތުން ކުރިއަރާފައިވުމެވެ. އެކަމަކު ބާރުވެރިކަމުގެ ގޮތުން އަދިވެސް އަންހެނުން ތިބެން ޖެހިފައިވަނީ ފަހަތުގައިކަމަށާއި، އެކިއެކި ދުނިޔަވީ ސަބަބުތަކާއި ހުރެ ރާއްޖޭގެ ހާލަތަކީ ވެސް މިއީކަމަށް ނާޒިމް ވިދާޅުވި އެވެ.
Ads by STO
