ރައީސް ޞާލިޙުގެ ކެންޑިޑެސީ ފޯމު ހުށަހަޅައިފި
ސެޕްޓެންބަރު 9 ވަނަ ދުވަހު އޮންނަ ރިޔާސީ އިންތިޚާބުގައި ވާދަކުރައްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ކެންޑިޑެސީ ފޯމު މިއަދު އިލެކްޝަންސް ކޮމިޝަން (އީސީ) އަށް ހުށަހަޅައިފިއެވެ.
ދަރުބާރުގޭގައި ހުންނަ އިންތިހާބީ މައި މަރުކަޒަށް މިއަދު ރައީސް ޞާލިޙުގެ ކެންޑިޑެސީ ފޯމު ހުށަހަޅާފައިވާއިރު އެމްއެންޕީން ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް އަދި ޑިމޮކްރެޓްސް އިން ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބުގެ ކެންޑިޑެސީ ފޯމުވެސް މިއަދު ހުށަހަޅަންވަނީ ނިންމާފައެވެ.
ރައީސް ޞާލިޙުވަނީ މި އިންތިހާބުގައި އެމަނިކުފާނުގެ ރަނިން މޭޓަކަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އިއްޔެ ހަމަޖައްސަވާފަ އެވެ. އަދި ނާޒިމްވެސް ވަނީ އެބޭފުޅާގެ ރަނިން މޭޓަކަށް ޑރ. އަހުމަދު އަދީލް ނަސީރު ހަމަޖައްސަވާފަ އެވެ.
ކެންޑިޑެސީ ފޯމު ހުށަހެޅުމުގެ މުއްދަތު މާދަމާގެ މެންދުރުފަހު 2:00 އަށް ހަމަވާއިރު މިހާތަނަށް ފޯމު ހުށަހަޅާފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓު އަދި ކުރީގެ ރައީސް، ރައީސް އަބްދުﷲ ޔާމީނެވެ.
އެހެންނަމަވެސް، އެމަނިކުފާނުގެ ފޯމު އީސީން ބަލައިނުގަނެއެވެ. އެ މައްސަލަ ޔާމީނުގެ ފަރާތުން ސުޕްރީމް ކޯޓަށް ވައްދާފައިވާއިރު މައްސަލާގެ ހުކުމް އިއްވުން މިއަދު ހެނދުނު 10:00 ގައި އޮންނާނެ އެވެ.
