އަޅުގަނޑުނޫން އެހެން އެއްވެސް ކެންޑިޑޭޓަކަށް އެކީގައި ބައިވެރިވެ އިންތިޚާބަށް ނިކުމެލާނެ މީހަކު ނުވި: ރައީސް ޞާލިޙް
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ނޫން އެހެން ކެންޑިޑޭޓަކަށް ކުރިއަށް އޮތް ރިޔާސީ އިންތިޚާބުގައި އެކީގައި ބައިވެރިވާނެ މީހަކު ނުވިކަމަށް ރައީސް ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ އެމަނިކުފާނުގެ ކެމްޕޭން ދަތުރުތަކުގައި ދ އަތޮޅަށް ވަޑައިގެން އެ އަތޮޅު ހުޅުދެލީގައި ބޭއްވި އެމްޑީޕީގެ ޖަލްސާގައި ވާހަކަފުޅުދައްކަވަމުންނެވެ.
އެގޮތުން، ހުރިހާ ޕާޓީއަކުންވެސް އެހެން ޕާޓީތަކާއެކު ގުޅިގެން މަސައްކަތްކުރުމަށް ވަރަށް މަސައްކަތްކުރިކަމަށާއި އެހެންނަމަވެސް، ކޯލިޝަނެއްގެ ގޮތުގައި ނިކުމެ މިތިބީ އެމްޑީޕީ އެކަނިކަމަށް ރައީސް ޞާލިޙް ވިދާޅުވިއެވެ. އެހެން ޕާޓީތަކުން އެވަރަށް މަސައްކަތްކުރި ނަމަވެސް އާޚިރުގައި ވަކިން ނުކުންނަން ޖެހުނުކަން ފާހަގަކުރައްވަމުން ރައީޞް ޞާލިޙް ވިދާޅުވީ، އެމަނިކުފާނު މިފަހަރު ނުކުންނެވީ، އާ ގާނޫނު އަސާސީއަށްފަހު ކުރިމަތިލާ އިންތިހާބެއްގައި، އެކުލަވާލެވުނު އެންމެ ބޮޑު ކޯލިޝަނާއި އެކުގައިކަމަށެވެ.
އެމްޑީޕީ ކޯލިޝަނުގައި 80،000 މެމްބަރުން އެބަތިބި ކަމަށާއި އިންތިޚާބު ފެށެން ވަގުތު ކުޑަތަން ވެފައިވާއިރު ރާއްޖޭގެ ސިޔާސީ ޙާލަތު އޮތް މިންވަރު ރައްޔިތުންނަށް ފަހުމް ވާނެކަމަށް ރައީސް ޞާލިޙް ވިދާޅުވިއެވެ. އަދި އެމްޑީޕީއާއި އެކުގައި ކޯލިޝަން ހަދާފައިވާ އަދާލަތު ޕާޓީ އަދި އެމްޑީއޭ އަދި މިސަރުކާރުގެވެސް އޮތީ އެއް ވިސްނުމެއްކަމަށާއި، އެއްއަޒުމެއްގައި މިކުރާ މަސައްކަތަކީ ރައްޔިތުން ބޭނުންވާ ޚިދުމަތް ތަފާތުކުރުމެއްނެތި ރައްޔިތުންނަށް ފޯރުކޮށްދިނުން ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން ރައީސް ޞާލިޙް ވިދާޅުވީ، މިއީ އެންމެ ކާމިޔާބު ސަރުކާރުކަމަށާއި، އެމްޑީޕީން 2018 ވަނަ އަހަރު ވި ވައުދުތަކުގެ 890 ޕަސެންޓު މިހާރު ނިމިފައިވާކަމަށެވެ. އޭރު ވި ވައުދުތަކުގެ ތެރޭގައި މިނިމަން ވޭޖް ކަނޑައެޅުމާއި، ސިއްޙީ ދާއިރާއާއި ތައުލީމީ ދާއިރާގެ މުވައްޒަފުންގެ މުސާރަ ބޮޑުކުރުމާއި، މީހުން ދިރިއުޅޭ ކޮންމެ ރަށެއްގައި ފެނާއި ނަރުދަމާ ޤާއިމްކުރުމާއި، ދަތުރުފަތުރުގެ ނިޒާމަށް ބަދަލުގެނެސް ފަސޭހައިން ހަލުވިކޮށް އެއް ރަށުން އަނެއް ރަށަށް ދެވޭނެކަމަށް ވިދާޅުވެ ވައުދުވުމުން، އެކަން ނުވާނެޔޭ ބައެއް ބޭފުޅުން ވިދާޅުވިކަމަށް ރައީސް ޞާލިޙް ފާހަގަކުރެއްވިއެވެ.
"މުޅިރާއްޖެ އެދަނީ ކަނޑުގެ މަގުންނާއި ވައިގެ މަގުން ހަލުވިކަމާއެކު ގުޅެމުން. މިއީ ނުވާނެއޭ ބުނި ކަންތައްތައް. އެހެންނަމަވެސް ހިތްހަމަޖެހުމާއެކީގައި އަޅުގަނޑު ދަންނަވާނީ މިހުރިހާ ކަމެއް ކޮށް ނިމެމުންދާވަހަކަ. ތިބޭފުޅުންގެ ކުރިމަތީގައި ދެން ކެންޑިޑޭޓަކު އައިސް ވާނީ ކޮން ވައުދެއްތޯ" ރައީސް ޞާލިޙް ވިދާޅުވިއެވެ.
ރައީސް ޔާމީނުގެ ވެރިކަމުގައި 2014 އިން 2018 އަށް ތައުލީމީ ދާއިރާއަށް އެކަނި ބަލާއިރުވެސް އަޅައިދީފައިވަނީ އެންމެ 135 ކްލާސްރޫމާއި 15 މަލްޓިޕާޕޮސް ހޯލްކަމަށް ފާހަގަކުރައްވަމުން ރައީސް ޞާލިޙް ވިދާޅުވީ ކޮވިޑްގެ ވަބާއާއެކު އެކަމަށް އެ ގެެއްލުނު 2 އަހަރު ކަނޑާފައިވެސް މި ސަރުކާރުން މިހާތަނަށް 1578 ކްލާސްރޫމާއި 85 ސުކޫލެއްގައި މަލްޓިޕާޕޮސް ހޯލް އަޅާއިދީ ނިންމައިފިކަމަށެވެ.
މީގެއިތުރުން ކުރިއަށް އޮތް 5 އަހަރު ތެރޭގައި މީދޫ ދާއިރާއަށް ކޮށްދެން ހުރި ކަންކަމަށް ބަލާއިރު އެންމެ ދިގު ލިސްޓެއް ހެދިފައިވަނީ ހުޅުދެއްޔަށްކަމަށް ރައީސް ޞާލިޙް ވިދާޅުވިއެވެ. އަދި 12 ޕްރޮޖެކްޓު ހުޅުދެލިއަށް ޚާއްސާ ކޮށްފައިވާކަމަށްވެސް އެމަނިކުފާނު ވިދާޅުވިއެވެ.
އޭގެ ތެރޭގައި، ޒުވާނުންނަށް ކޮމިއުނިޓީ ސެންޓާރެއް އަޅައިދިނުން، އޭޓިއެމް މެޝިން ބަހައްޓައިދިނުން، ކައުންސިލްގެ އިދާރާ އިމާރާތްކޮށްދިނުން، ރަށުގެ މަސްވެރިނަށް ސްޕޯޓްސް ކަނދުފައްޗެއް އެރަށާ ކައިރީގައި އަޅާއިދިނުން، ރައްޔިތުން ބޭނުންވާ އައިސް ޕްލާންޓު އެ ރަށުގައި ބެހެއްްޓުން، ސިއްޙީ މަރުކަޒު ތަރައްޤީކުރުން، މަގުތައް ޒަމާނީ ފެންވަރަށް ހަދައިދިނުމާއި ރަށުގެ ބިން ބޮޑުކޮށްދިނުން ހިމެނެއެވެ.
Ads by STO
