ރަނިންމޭޓެއްގެ ގޮތުގައި އަސްލަމް ދެއްވީ ޔަޤީންކަން, "ޝައްކު އުފެދޭ އެއްވެސް ކަމެއްވެސް ނުކުރާނަން"
އިހުލާސްތެރިކަމާ މެދު ޝައްކެއް އުފެދޭ އެއްވެސް ކަމެއް ނުކުރައްވާނެ ކަމަށާއި އިތުބާރު ކުރެއްވުމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހުގެ ރަނިން މޭޓު، ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
ދ. އަތޮޅުގެ ރަށްތަކަށް ރައީސް ޞާލިޙް ކުރައްވަމުން ގެންދަވާ ދަތުރުފުޅުގައި ކުޑަހުވަދޫ އަށް ވަޑައިގެން އެ ރަށުގައި ބޭއްވެވި ބޮޑު ޖަލްސާގައި ވާހަކަ ދައްކަވަމުން އަސްލަމް ވިދާޅުވީ، އޭނާ އަށް ފުރިހަމަ އަށް އިތުބާރު ކުރެއްވުމަށް ދަންނަވާ ކަމަށާއި އޭނާގެ އިހުލާސްތެރިކަމާ މެދު ޝައްކެއް އުފެދޭ މިންވަރުގެ ކަމެއް ފެނިގެން ނުދާނެ ކަމަށެވެ.
"އަޅުގަނޑުގެ އިހްލާސްތެރިކަމާއި ތެދުވެރިކަމާ މެދު ފުކެއްގެ ޝައްކެއް އުފެދޭ މިންވަރުގެ ކަމެއް އަޅުގަނޑުގެ ފަރާތުން އިރާދަކުރެއްވިއްޔާ ފެނިގެން ނުދާނެ،" އަސްލަމް ވިދާޅުވިއެވެ.
އަސްލަމް ވިދާޅުވީ ރައީސް ސޯލިހް އެނގިވަޑައިގަންނަވާތާ 30 އަހަރުވެފައިވާ ކަމަށެވެ. މާ ގާތްކޮށް ނޫޅުއްވި ނަމަވެސް ރަހްމަތްތެރިކަން އޮންނަތާ އެހާ ދުވަސްވާނެ ކަމަށް އަސްލަމް ވިދާޅުވިއެވެ. އޭގެ ތެރެއިން ވިހި އަހަރަކީ އެމްޑީޕީ ތެރޭގައި އާއި ރައްޔިތުންގެ މަޖިލިހުގެ ތެރޭގައި ވަރަށް އެކުގައި މަސައްކަތް ކުރެއްވި އަހަރުތަކެއް ކަމަށް ވެސް އަސްލަމް ވިދާޅުވިއެވެ. ރައީސް ސޯލިހްގެ މިޒާޖުފުޅާއި މަސައްކަތްޕުޅު ހުންނަ ގޮތް ވަރަށް ގާތުން ދެކެވަޑައިގެންފައިވާ ކަމަށް ވިދާޅުވިއެވެ.
އަސްލަމް ވިދާޅުވީ ކޮވިޑް-19 ގެ އާލަމީ ވަބާ އިން ރާއްޖެ ސަލާމަތް ކުރެއްވުމަށް ރައީސް ސޯލިހް ކުރެއްވި މަސައްކަތްޕުޅަކީ ފަހުރުވެރިކަމާ އެކީގައި ބަލައިގަންނަން ޖެހޭ ސަބަބެއް ކަމަށެވެ. މީގެއިތުރުން ރާއްޖޭގައި ދިމާވެފައި އޮތް ބޯހިޔާވަހިކަމުގެ މައްސަލައަށް ހައްލު ހޯދައިދެވޭނެ ބޭފުޅަކީ ހަމައެކަނި ރައީސް ކަމަށް ވެސް އޭނާ ވިދާޅުވިއެވެ.
"މިހާރު ވެސް ކުރެއްވި މަސައްކަތްތަކާއި އެ މަސައްކަތްޕުޅު ނިންމަވާލެއްވުމަށް ވަގުތު ދިނުމަކީ މުހިންމު ކަމެއް. ބޭނުންތެރި ކަމެއް. މާލޭގައި ތޮއްޖެހިފައިވާ މީހުންނަށް، ގެދޮރުވެރިކަމުގެ ދަތިކަން ހައްލުކޮށް ދެއްވުމަށް ބިމުގެ ދަތިކަން ހައްލުކޮށް ދިނުމަށް ވޭތުވެދިޔަ އެއްވެސް ސަރުކާރަކުން ނިންމަން ނުކެރުނު ނިންމުން ނިންމައި މިހާރު އެ ވަނީ ގޯތިތައް ހަވާލު ކުރާ ހިސާބުގައި،" އަސްލަމް ވިދާޅުވިއެވެ.
