ފޭކް އައިޑީ ހަދައިގެން، ފޮރެކްސް ޓްރޭޑިންގެ ނަމުގައި ހިންގާ ޖަރީމާއަށް ސަމާލުވާާން އެދިއްޖެ
ސޯޝަލް މީޑިއާގައި ފޭކް އެކައުންޓުތަކެއް ހަދައިގެން ފޮރެކްސް ޓްރޭޑިންގެ ނަމުގައި ބޮޑު ސްކޭމެއް ހިންގާތީ، އެފަދަ ސްކޭމްތަކަށް ސަމާލުވާން މޯލްޑިވްސް ޕޮލިސް ސަރވިސްއިން އެދިވަޑައިގެންފިއެވެ.
ފުލުހުން ވިދާޅުވީ ސޯޝަލް މީޑިއާގައި "ހުދާ ހީފަމް" އަދި އެހެންވެސް ނަންނަމުގައި ފޮރެކްސް ޓްރޭޑްކޮށްދޭނެ ކަމަށް ބުނެ ފައިސާ އިންވެސްޓް ކުރުމަށް އެދި ސްކޭމެއް ހިންގަމުންދާ ކަމަށާއި، އަސްލު މީހުންގެ ފޮޓޯ ބޭނުންކޮށްގެން ފޭކް އައިޑީތައް ހަދައިގެން މި ސްކޭމް ހިންގަމުންދާކަން ފާހަގަވާ ކަމަށެވެ.
ސްކޭމަރުން ކަންތައް ކުރަމުންދާ ގޮތަކީ އަސްލު މީހެއްގެ ފޮޓޯ ޕްރޮފައިލްގައި ބޭނުން ކޮށްގެން ފޭކް އެކައުންޓްތައް ހަދައި އެއީ އަސްލު މީހެއް ކަމަށް އިތުބާރު ހޯދުމަށްފަހު ފައިސާ އިންވެސްޓް ކުރުމަށް އެދެނީ ކަމަށާއި ގިނަ ފަހަރަށް ޕްރޮފައިލްގައި ފޮޓޯ ބޭނުން ކުރާ ފަރާތައް އެމީހެއްގެ ފޮޓޯ ބޭނުންކޮށް ސްކޭމެއް ހިންގާކަން ވެސް ނޭނގޭ ކަމަށް ފުލުހުން ވިދާޅުވެއެވެ.
ސްކޭމް ހިންގާ ފަރާތްތަކުން އެ މީހުންނަކީ ފޮރެކްސް ޓްރޭޑް ކުރާ ބައެއް ކަމަށް ބުނެ، ފޮރެކްސް ޓްރޭޑް ކޮށްގެން ލިބިފައިވާ ފައިދާކަމަށް ބުނެ، ފޭކް ބޭންކް ޓްރާންސްފާ ސްލިޕްތަކެއް ދައްކައި މީހުންގެ އިތުބާރު ހޯދައެވެ.
އަދި އެއަށްފަހު މީހުންގެ އަތުން ފައިސާ ނަގައި އެ ފައިސާ އިންވެސްޓްކޮށްގެން ލިބޭ ލާރި ދޭނެ ކަމަށް ބުނި ނަމަވެސް ފައިސާ ނެގުމަށްފަހުު ދެން އެމީހުންގެ ހަބަރެއް ނުވާ ކަމަށް ވެސް ފުލުހުން ވަނީ ވިދާޅުވެފައެވެ.
ސްކޭމްގެ އެކައުންޓުތައް އާންމުކޮށް ހިންގަނީ އިންސްޓަގްރާމް އަދި ފޭސްބުކްގައިކަން ފާހަގަކޮށް ފުލުހުން ބުނީ މިހާރު ވެސް ބައެއް މީހުން މި ސްކޭމްގެ ޝިކާރައަކަށްވެފައިވާ ކަމަށެވެ.
އަދި މި ސްކޭމްގައި ޖެހިފައިވާ މީހުން ލަސްނުކޮށް އެކަން ފުލުހުންނަށް ރިޕޯޓް ކުރުމަށް ވެސް ފުލުހުން ވަނީ އެދިވަޑައިގެންފައެވެ.
Ads by STO
