ދަރިން ބެލުމަށް ގޭގައި ހުންނަ ބެލެނިވެރިއަކަށް 20،000ރ އަށްވުރެ ކުޑަ ނޫން މުސާރައެއް ހަމަޖައްސައިދޭނަން: ޒަމީލް
ދަރިން ބެލުމާއި ގޭތެރޭގެ ކަންތައްތައް ކުރުމަށް ގޭގައި ހުންނަ ބެލެނިވެރިއަކަށް، 20،000ރ. އަށް ވުރެ ކުޑަ ނޫން މުސާރައެއް ލިބޭނެ ގޮތް ހަމަޖައްސައި ދެއްވާނެކަމަށް ކުރިއަށް އޮތް ރިޔާސީ އިންތިޚާބުގައި އަމިއްލަގޮތުން ވާދަކުރައްވާ ކެންޑިޑޭޓް ހަސަން ޒަމީލް ވިދާޅުވެއްޖެއެވެ.
ކުރިއަށް އޮތް އިންތިޚާބުގައި ޒަމީލް ވާދަކުރައްވާއިރު އެބޭފުޅާގެ އަނބިކަނބަލުން ރަނިންގް މޭޓެއްގެ ގޮތުގައިވަނީ ހަމަޖައްސަވާފައެވެ. އެގޮތަށް ހަމަޖައްސާފައިވަނީ އަނބިކަނބަލުން ނޫން އެހެން ބޭފުޅަކަށް އެ މިންވަރަށް އިތުބާރު ކުރެވެން ނޯންނާނެތީކަމަށް ޒަމީލްވަނީ ވިދާޅުވެފައެވެ.
ޒަމީލް ކެމްޕެއިން މަސައްކަތް ފެއްޓެވިއިރު، ރަށްރަށަށް ޒިޔާރަތްކޮށް ކެމްޕެއިން ކުރުމަކީ އެކަމަށް ބޮޑު ޚަރަދެއް ހިނގާނެ ކަމަކަށްވާތީ އެ ޚަރަދުކުރުމަށް ކުޅަދާނަ ކަމަކަށް ނުވާތީވެ، ކެމްޕެއިންގެ ބޮޑުބައި ކުރިއަށް ގެންދާނީ އޮންލައިކޮށް ސޯޝަލް މީޑިއާގައި ކަމަށް ޒަމީލް ވިދާޅުވިއެވެ.
ސޯޝަލް މީޑިއާ މެދުވެރިކޮށް ޒަމީލް އާންމުކުރެއްވި ވީޑިއޯއެއްގައި ވިދާޅުވެފައިވަނީ ދަރިން ބެލުމާއި ގޭތެރޭގެ ކަންތައްތައް ބެލެހެއްޓުމަކީ ފުލް ޓައިމް ވަޒީފާއެއްކަމަށާއި، ނަމަވެސް ގޭތެރޭގެ ޚަރަދުތައް ހުންނަ ގޮތުން ގިނަ ފަހަރަށް ދެމަފިރިންވެސް ވަޒީފާއަށް ދާންޖެހޭކަމަށެވެ. އެހެން ނޫންނަމަ ދަރިން ބަލަނީ އެކުދިންގެ މާމައިން ނުވަތަ އާއިލާގެ ކޮންމެވެސް އެހެން މެމްބަރެއްކަމަށާއި އެފަދަ ކަންކަމަކީ ދަރިންގެ ތަރުބިއްޔަތަށް ނޭދެވޭ އަސަރުކުރާނެ ކަމެއްކަމަށް ޒަމީލް ވިދާޅުވިއެވެ.
"ކުރިއަށް އޮތް 5 އަހަރަށް ސަރުކާރެއް އެކުލަވާލުމުގެ މަސައްކަތް އަޅުގަނޑާއި ހަވާލުކޮށްފި ނަމަ، ދަރިން ބެލުމާއި ގޭތެރޭގެ ކަންތައްތައް ކުރުމަށް ގޭގައި ހުންނަ ބެލެނިވެރިއަކަށް، ﷲ އިރާދަފުޅާއެކު 20،000ރ. އަށް ވުރެ ކުޑަ ނޫން މުސާރައެއް ލިބޭނެ ގޮތް ހަމަޖައްސައި ދޭނަން " ޒަމީލް ވިދާޅުވިއެވެ.
މީގެ އިތުރުން، ރާއްޖޭގެ އާބާދީ އިތުރުވުން މަޑުޖެހި، ޤައުމުގައި ބިދޭސީން ނުރައްކާވާ މިންވަރަށް އިތުރުވެފައިވާ މައްސަލައަށް އަލިއަޅުވާލައްވަމުން ޒަމީލް ވިދާޅުވީ، މިކަމަށް ހައްލެއް ގެންނަން ރަނގަޅު ސިޔާސަތުތަކެއް ގެންގުޅެން ޖެހޭ ކަމަށެވެ.
އަދި ދިވެހިންގެ އާބާދީ އިތުރު ކުރުމަށް އަޅަން ޖެހޭ ފިޔަވަޅު އެޅުން ވަރަށް ބޮޑަށް ލަސްވެފައިވާކަން ފާހަގަކުރައްވަމުން ޒަމީލް ވިދާޅުވީ މިހާރު މިމަސައްކަތް ފަށައިފިނަމަ ދިވެހީންގެ އާބާދީ އިތުރު ކުރެވި، ރާއްޖޭގެ އިޤްތިޞާދަށް ބޭނުންވާ އިންސާނީ ވަސީލަތް އުފެއްދިދާނެ ކަމަށް ފެންނަ ކަމަށެވެ.
Ads by STO
