ރައީސް ޞާލިޙުގެ މެނިފެސްޓޯ: ދަރިމައިވުމުގެ މައްސަލައަށް އާސަންދައިގެ ތެރެއިން ފަރުވާ ހޯދައިދޭނަން
ދަރިމައިވުމުގެ މައްސަލައަށް އާސަންދައިގެ ތެރެއިން ފަރުވާ ހޯދައި ރާއްޖެއިން އެކަމަށް ހާއްސަ ފަރުވާތައް ލިބޭގޮތް ހަދައިދެއްވުމަކީވެސް ރައީސުލްޖުމްހޫރިއްޔާގެ މެނިފެސްޓޯގައި ހިމެނޭ ކަމެއްކަަމާއި، އެފަދަ ސިޔާސަތެއް އެމަނިކުފާނުގެ ވާދަވެރިންނަށް ހާމަނުކުރެއްވޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ
ރިޔާސީ އިންތިޚާބުގެ ކެމްޕޭންތަކަށް ރާއްޖެތެރެއަށް އެމަނިކުފާނު ކުރައްވާ ދަތުރުފުޅުތަކުގައި ނ އަތޮޅަށް ވަޑައިގެން އެ އަތޮޅު މަނަދޫގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، ސިޔާސީ ބޭނުމެއްގައި އެމަނިކުފާނު ދެން ކުރައްވަންޖެހޭ މާބޮޑު ކަމެއް ނެތްކަމަށާއި، އަރުއްވަންޖެހޭ އުސް ހަރުފަތެއްވެސް ނެތްކަމަށެވެ. އަދި ދެން އޮތީ އެމަނިކުފާނު ކުރައްވަން ފެށްޓެވި މަސައްކަތްތައް ނިންމުންކަމަށްވެސް ރައީސް ޞާލިޙް ވިދާޅުވިއެވެ.
މަނަދޫގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވަނީ އެމަނިކުފާނުގެ ސިޔާސަތުތައް ހާމަކުރައްވަމުންދާއިރު އެ ސިޔާސަތުތަކާއި އެމަނިކުފާނާއި ވާދަކުރައްވާ ބޭފުޅުންގެ ސިޔާސަތުތަކާއި "ކޮމްޕެއަރ" ކުރެއްވުމަށް ރައްޔިތުންގެ ކިބައިން އެދިވަޑައިގެންފައެވެ.
އެގޮތުން، ދަރިމައިވުމުގެ މައްސަލައަށް އާސަންދައިގެ ތެރެއިން ފަރުވާ ހޯދައި ރާއްޖެއިން އެކަމަށް ހާއްސަ ފަރުވާތައް ލިބޭގޮތް ހަދައިދެއްވާނެކަމަށް އެމަނިކުފާނު ވިދާޅުވާ ކަމަށާއި، ހައުސިންގ ލޯނު 6 ޕަސެންޓަށްވުރެ ބޮޑު ނުވާގޮތަށް ހުރިހާ ބޭފުޅުންނަށް ފޯރުކޮށްދެއްވާނެކަމަށާއި، ސުޓޫޑެންޓް ލޯނު ވަކި އުސޫލެއްގެ ދަށުން މާފުކޮށްދެއްވާނެކަމަށާއި، ފަތުރުވެރިކަމަށް ހާއްސަ ތަމްރީނު ދޭން އިންޓަނޭޝަނަލް ކެމްޕަހެއް ރާއްޖޭގައި އަޅާއިދެއްވާނެކަމަށްވެސް އެމަނިކުފާނު ވިދާޅުވާކަމަށެވެ. އަދި އެފަދަ މެނިފެސްޓޯތަކަކީ ކޮން އިރަކު ކޮން ބޭފުޅުންނެއް ކޮށްދެއްވިކަމެއްތޯ ރައީސް ޞާލިޙްވަނީ އައްސަވާފައެވެ. އެހެންކަމުން އެކަންކަމާ ދޭތެރޭ ރައްޔިތުން ވިސްނަވަން އެމަނިކުފާނު އެދިވަޑައިގަތެވެ.
މީގެ އިތުރުން، ހިލޭ ޑިގްރީން ލިބޭ ލުޔާ މެދުވެސް ވިސްނެވުމަށާއި ނުކުޅެދުންތެރިކަން ހުންނަ ފަރާތްތަކުގެ ތެރަޕީ މާލެއަށް ބަރޯސާނުވެ ލިބެން ހުންނާނެކަމަށާއި، ދޮށީ އުމުރުގެ މީހުންނަށް އެމީހުންނަށް ލިބެންޖެހޭ ގަދަރާއެކު އުފަލުގައި މުޖްތަމައުގައި އުޅެވޭނެކަމުގެ ވާހަކަ ރައީސް ޞާލިޙް ދައްކަވާއިރު ކުރިއަށް އޮތް ރިޔާސީ އިންތިހާބުގައި ގޮތެއް ނިންމަވާއިރު މިހުރިހާ ކަމަކަށް ވިސްނެވުމަށާއި އެމްޑީޕީގެ މެނިފެސްޓޯގައި ހިމެނެނީ ހުރިހާ ރައްޔިތުން ބޭނުންވާ ކަންތައްތައް ކަމަށް ރައީސް ޞާލިޙް ވިދާޅުވިއެވެ.
"އަޅުގަނޑަށް ހަމަ ޔަގީން އަޅުގަނޑާ ވާދަކުރަން ނިކުމެ އެތިއްބެވި އެއްވެސް ބޭފުޅަކަށް މީން ކަމަކާ ބެހޭ ސިޔާސަތެއް ހާމައެއް ނުކުރެވޭނެ. އާދެ ސިޔާސަތުތައް ހާމަކުރަމުންދާއިރު ކޮންމެ ރަށަކަށް ތަރައްގީއަށް ބޭނުންވާ ލިސްޓެއް އަޅުގަނޑުމެން އެބަ ހާމަކުރަން. މީވެސް އެބޭފުޅުންނަށް ކުރެވޭނެ ކަމެއް ނޫން. ރައްޔިތުންނާއި ބައްދަލުކޮށްގެން ނޫންތޯ އެކަން ކުރެވޭނީ. ރައްޔިތުންގެ އަޑު އަހައިގެން ނޫންތޯ އެކަން ކުރެވޭނީ" ރައީސް ޞާލިޙް ވިދާޅުވިއެވެ.
އެމްޑީޕީގެ މެނިފެސްޓޯ ތައްޔާރުކޮށްފައި ވަނީ ކޮންމެ ރަށަކަށް ޒިޔާރަތްކޮށްގެންކަމަށާއި އެގޮތުން، ކައުންސިލްތަކާއި ބައްދަލުކޮށް، ރައްޔިތުންގެ މަޝްވަރާއާއެކު ރައްޔިތުން އެދޭގޮތަށް އެ ލިސްޓު ތައްޔާރުކުރެއްވިކަމަށް ރައީސް ޞާލިޙް ވިދާޅުވިއެވެ.
ދެން އަންނަ ދައުރެއްގައި މަނަދޫއަށް ކޮށްދެއްވާނެ ކަންތައްތަކުގެ ތެރޭގައި އެރަށުގައި އިތުރު މަގު ހިމެނޭގޮތަށް މަގުތައް ހަދައިދިނުން، ނަރުދަމާގެ މައްސަލައަށް ރަނގަލު ހައްލެއް ގެނެސްދިނުން، މަސްވެރިންނަށް ފަސޭހައިން އައިސް ލިބޭނެހެން އައިސް ޕްލާންޓެއް ގާއިމްކޮށްދިނުން، ލޯކަލް މާކެޓެއް އަޅާއިދިނުން، ޒުވާނުންނަށާއި ކުޑަކުދިންނަށް ސްކޭޓް ޕާކެއް ގާއިމްކޮށްދިނުން، ބަނދަރު ހަދާ ނިމޭއިރު ދެކުނު ފަރާތުގައި ޖެޓީއެއް އަޅާއިދިނުން، މަނަދޫ އިރުމަތީކޮޅު ފަޅުތެރޭގައި ޕިކްނިކް ދެވޭނެ ކުޑަ ރަށެއް ހިއްކައިދިނުމާއި އެ ރަށުގެ ރަށްގިރުމުގެ މައްސަލައަށް ހައްލެއް ގެނެސްދިނުން ހިމެނޭކަމަށް ރައީސް ޞާލިޙް ވިދާޅުވިއެވެ.
