އިންތިޚާބުގެ ދެވަނަ ބުރެއްގައި ރައީސް ޞާލިޙާއި އެމްޑީޕީން ޖެހޭނީ އިލްޔާސްގެ ފަހަތަށް އަރަން: ރައީސް ނަޝީދު

ސެޕްޓެންބަރު 9 ވަނަ ދުވަހު އޮންނަ ރިޔާސީ އިންތިޚާބުގެ ދެވަނަ ބުރެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި އެމްޑީޕީން ޖެހޭނީ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބުގެ ފަހަތަށް އަރަން ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by STELCO

ރައީސް ނަޝީދު މިހެން ވިދާޅުވީ، ދަ ޑިމޮކްރެޓްސް ޕާޓީގެ ރިޔާސީ ކެންޑިޑޭޓު އިލްޔާސް ލަބީބުގެ ކެމްޕޭން ދަތުރުފުޅުތަކުގައި ގއ. ކޮލަމާފުށްޓަށް ވަޑައިގެން އެ ރަށުގައި މިއަދު ބޭއްވި އެ ޕާޓީގެ ޖަލްސާއެއްގައި ވާހަކަފުޅު ދައްކަވަމުންނެވެ. އެގޮތުން، އިލްޔާސްގެ ފަހަތަށް ރައީސް ޞާލިޙް އަރުއްވަންޖެހޭނެ ވާހަކައަކީ ވަރަށް ސީރިއަސްކޮށް އެމަނިކުފާނު ވިދާޅުވާ އެއްޗެއްކަމަށް ރައީސް ނަޝީދު ވިދާޅުވިއެވެ.

"އަޅުގަނޑަށް ފެންނަ ފެނުމުގައި މިއަދު އެމްޑީޕީ މެންބަރުން، ހާއްސަކޮށް އެމްޑީޕީ ވެރިން، ރައިސުލްޖުމްހޫރިއްޔާ އާއި އެ ޕާޓީގެ ޗެއާޕާސަން އަދި އެހެން ބޭފުޅުންނަށް އަޅުގަނޑު އިލްތިމާސްކުރަން، ތިބޭފުޅުން ދެ ވަނަ ބުރެއްގައި އަޅުގަނޑުމެންގެ ފަހަތަށް، އިލްޔާސް ލަބީބްގެ ފަހަތަށް ރައީސް އިބްރާހިމް މުހައްމަދު ސޯލިހް އަރުއްވަން ޖެހިވަޑައިގަންނަވާނެ،" ރައީސް ނަޝީދު ވިދާޅުވި އެވެ.

މީގެ އިތުރުން ރައީސް ނަޝީދު ވިދާޅުވީ، ރައީސް ޞާލިޙަށް މިހާރު 5 އަހަރު ދެވިއްޖެކަމަށާއި، އެ 5 އަހަރު މިހާރު ނިމިއްޖެކަމަށެވެ. އަދި ރައީސް ޞާލިޙު ހުންނެވީ 3 ވަނައިގައިކަން އެމަނިކުފާނަށްވެސް މިހާރު އެނގިވަޑައިގަންނަވާނެކަމަށް ރައީސް ނަޝީދު ވިދާޅުވިއެވެ.

"އާދެ 5 އަހަރު ތިބޭފުޅާއަށް އަޅުގަނޑުމެން ދީފިން. ހަމަ އެ ލައްޒަތާއި، ހަމަ އެ އަރާމާއި، އެ މަޑުމައިތިރިކަމާއި، އެ ކެތްތެރިކަމާއެކީގައި މަޑުމަޑުން ރިއެކްޝަނަކާއި ނުލައި އޮންނަވާ. އަޅުގަނޑު މއިަދު މި ދަންނަވާ ވާހަކައަކީ އެ 5 އަހަރި ނިމުނީއޭ. މިހާރު ރައީސް އަށް އެނގިވަޑައިގަންނަވާނެ ރައީސް އެ ހުންނެވީ 3 ވަނައިގައިކަން. ވަރަށް ސާފުކޮށް" ރައީސް ނަޝީދު ވިދާޅުވިއެވެ.

ހަމައެއާއެކު، ރައީސް ނަޝީދަށް އެމްޑީޕީގެ ކެމްޕޭނުގެ ހިސާބު ބަލަހައްޓަވާ ވަޒީރު ރޭގައި ގުޅުއްވިކަމަށާއި، އެ ބޭފުޅާވެސް ވަނީ މިހާރު ހިސާބު ހުރި ގޮތް އެއީކަމަށް ވިދާޅުވެފައިކަމަށް ފާހަގަކުރައްވަމުން ރައީސް ނަޝީދު ވިދާޅުވީ، ދެޕާޓީން ދެވަނަ ބުރުގައި ކަންކުރާނެ ގޮތާގުޅޭ ގޮތުން ވިސްނަވަންޖެހޭކަމަށް އެމްޑީޕީގެ ހިސާބު ބައްލަވާ ވަޒީރު ވިދާޅުވިކަމަށެވެ.

"އެހެންވީމާ އަޅުގަނޑު މި އިލްތިމާސްކުރަނީ ރައީސުލްޖުމްހޫރިއްޔާއަށާއި އެމްޑީޕީއަށް ކުރުމަށް، އަޅުގަނޑުގެ ގާތުގައި ފަށްފަށުން އެމްޑީޕީގެ ހިސާބު ބަލަހައްޓަވާ ވަޒީރު، އެ ބޭފުޅާ އެބަ ވިދާޅުވޭ އެބޭފުޅުންގެ ހާލަތު ހުރި ގޮތް" ރައީސް ނަޝީދު ވިދާޅުވިއެވެ.

މީގެއިތުރުން ރައީސް ޞާލިޙަށް ދެވަނަ ދައުރެއް ދިނުމަކީ ނުރައްކާތެރި ކަމެއްކަން ފާހަގަކުރައްވަމުން ރައީސް ނަޝީދު ވަނީ ރައީސް ރަށްތަކަށް ވަޑައިގަންނަވާއިރު ދަނީ ފުލުހުންގެ ފައުޖުތަކާއެކު ކަމަށާއި އެ ފައުޖުތަކުން ރައްޔިތުން ހަންމަތަ ކުރަމުންދާއިރު ރައީސް ޞާލިޙް އެ ކުޅުއްވާ ފިލްމަކީ މަދު މީސްކޮޅަކާއެކީގައި އެބޭފުޅާ ކުޅުއްވާ ފިލްމެއްކަމަށާއި އެ ފިލްމު ފޭދިގެން ރަށެއްގެ ތެރެއަށް ނުދާކަމަށް ވިދާޅުވެފައެވެ.