ދެން ތިބި ކެނޑިޑޭޓުންގެ އޮތީ އަމިއްލަ އެޖެންޑާއެއް, ރައްޔިތުންނަށް ކޮށްދެވޭނެ ކަމެއް ނެތް: ރައީސް ޞާލިޙް

އަންނަ މަހު ނުވައެއްގައި އޮންނަ ރިޔާސީ އިންތިހާބުގައި ވާދަކުރައްވާ އެހެން ހުރިހާ ކެންޑިޑޭޓުން ކުރަން އުޅެނީ އަމިއްލަ ކަންތައްތަކެއް ކަމަށާއި އެބޭފުޅުން ރައްޔިތަކަށް ކޮށްދޭނެ ކަމެއް ނެތް ކަމަށް ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

Ads by STELCO

މިއަދު ނ. މާފަރަށް ވަޑައިގެން ސަޕޯޓަރުންނާ ބައްދަލުކުރައްވާ ވާހަކަ ދައްކަވަމުން ރައީސް ޞާލިޙް ވިދާޅުވީ ނ. އަތޮޅުގެ މީހުން ދިރިއުޅޭ ހުރިހާ ރަށަކަށް ކެމްޕޭންގައި ދެވިއްޖެ ކަމަށާއި، ގިނަ ރައްޔިތުން ތިބީ "އުފާވެރި އަމާން ރާއްޖެ"އެއް ހޯދުމަށް ކުރާ މަސައްކަތުގައި ބައިވެރިވެގެން ކަމަށެވެ.

މީގެކުރިން ރިޔާސީ އިންތިހާބަކާ ކުރިމަތިލާއިރު ރައްޔިތުން އެއްކޮށް ނިކުންނަނީ އެ ވެރިކަމެއް ބަދަލުކުރުމަށް ކަމަށާއި އެހެންނަމަވެސް މި ފަހަރު އެ މަންޒަރު ތަފާތު ކަމަށް ވިދާޅުވިއެވެ. ރައީސް ސޯލިހް ވިދާޅުވި މިފަހަރު އެ މަންޒަރު ބަދަލުވެފައިވަނީ މިދިޔަ ފަސް އަހަރު ކުރެވުނު މަސައްކަތްތައް ރައްޔިތުން ގަބޫލުކޮށް ސަރުކާރަށް އިތުބާރު ކުރާތީ ކަމަށެވެ. ސަރުކާރުން ވެފައިވާ ވައުދުތައް ފުއްދަމުންދާތަން ހުރިހާ ރައްޔިތުންނަށް ފެންނަމުންދާކަމަށްވެސް ރައީސް ސޯލިހް ވިދާޅުވިއެވެ.

މަސައްކަތް ކުރެވުމުގެ ނަތީޖާއެއްގެ ގޮތުން އިންތިހާބުގައި ކޯލިޝަނެއް ހަދައިގެން ނިކުތުމުގެ ފުރުސަތު ލިބުނީ އެމްޑީޕީއަށް އެކަނިކަން ފާހަގަކޮށް ރައީސް ސޯލިހް ވިދާޅުވީ އެހެން ޕާޓީތަކުން ބަޔަކާއެކު ކޯލިޝަން ހެދޭތޯ ވަރަށް މަސައްކަތް ކުރިކަމަށެވެ.

"ރެޔާދުވާލު އެއްރަށުން އަނެއް ރަށަށް، ރިސޯޓްތަކަށް ގޮސް މަޝްވަރާކޮށް، ފޮޓޯތައް ފެނޭ އަޅުގަނޑުމެނަށް. ޕްރެސް ކޮންފަރެންސްތައް ބޭއްވި، ދެޕާޓީ ތިން ޕާޓީ ވެގެން. މާދަމާ ސޮއިކުރާނެހެންވެސް ހީވި. ނަމަވެސް ކޮންމެ މީހަކު ވަކިވަކިން، ބައިވެރިވާނެ އެކަކުވެސް ނެތް." ރައީސް ސޯލިހް ވިދާޅުވިއެވެ.

ރައީސް ސޯލިހް ވިދާޅުވީ އެއިން ބޭފުޅަކަށް ވެރިކަން ލިބުނަސް ރައްޔިތަކަށް ކޮށްދޭނެ ކަމެއް ނޯންނާނެ ކަމަށެވެ. އެމަނިކުފާނު ފިޔަވައި މިއަހަރު އިންތިހާބުގައި ވާދަކޮށްފައިވަނީ ހައްތަހާވެސް އަމިއްލައަށް ބޭނުންވާ ކަންތައްތައް ކުރާނެ މީހުން ކަމަށެވެ.

ސިޔާސީ ގޮތުން ދެން ބޭނުންވާ އެއްވެސް ކަމެއް ނެތްކަން ތަކުރާރު ކުރައްވާ ރައީސް ސޯލިހް ވިދާޅުވީ ސިޔާސީ ހުރިހާ ކަމެއް ފުރިހަމަ ވެއްޖެ ކަމަށެވެ. މިހާރު އޮތް ހަމައެކަނި މަގުސަދަކީ ފަށާފައި ހުރި މަސައްކަތްތައް ނިންމުން ކަމަށް ވިދާޅުވިއެވެ. އަދި ރައްޔިތުންނަށް ބޭނުންވެފައިހުރި މަސައްކަތްތައް ކޮށްދިނުމަކީ ހަމައެކަނި ބޭނުންވާ ކަންތައްކަމަށްވެސް ވިދާޅުވިއެވެ.