ގިނަ އަދަދެއްގެ ސަޕޯޓަރުންނާއެކު، މުޢިއްޒުގެ މެނިފެސްޓޯ ލޯންޗު ކޮށްފި
ޕީޕީއެމް-ޕީއެންސީގެ ރިޔާސީ ކެންޑިޑޭޓް، ޑރ.މުހައްމަދު މުއިއްޒުގެ "ދިވެހީންގެ ރާއްޖެ" މެނިފެސްޓޯ މިރޭ އިފްތިތާހު ކޮށްފިއެވެ.
19 ބާބުގެ މައްޗަށް އެކުލެވިގެންވާ މި މެނިފެސްޓޯގައި އެންމެ ބޮޑު އިސްކަމެއް ދީފައި ވަނީ، މުއިއްޒު ވިދާޅުވި ގޮތުގައި، ދިވެހީންނަށް ދިމާވެފައިވާ އެންމެ ބޮޑު މައްސަލަ ކަމުގައިވާ، ގެދޮރުވެރިކަމުގެ މައްސަލަ ހައްލު ކުރުމަށެވެ. މުއިއްޒު މިރޭ ވަނީ ޕީޕީއެމް-ޕީއެންސީގެ ވެރިކަމެއްގައި ގެދޮވެރިކަމުގެ މައްސަލަ ހައްލު ކުރަން ރާވައިފައިވާ ގޮތް ވަރަށް ތަފްސީލުކޮށް، ޕްރެޒެންޓޭޝަނެއް ބޭނުންކުރައްވައި ވިދާޅުވެދެއްވައިފައެވެ.
މުއިއްޒު ވިދާޅުވީ ރައްޔިތުންނަށް ދިމާވެފައިވާ ގެދޮރުގެ މައްސަލަ އެހެން މައްސަލަތަކާއި ވަރަށް ބޮޑަށް ގުޅިފައިވާ ކަމަށާއި، އާއިލީ މައްސަލަތަކާއި، ކުށް ކުރުން އިތުރުވުމާއި، މަސްތުވާތަކެތީގެ މައްސަލަތައް ވެސް ގެދޮރުގެ މައްސަލައާއި އެކުގައި ހައްލުވާނެ ކަމަށެވެ.
މިރޭ ލޯންޗުކުރި މެނިފެސްޓޯގައި، ގޯއްޗެއް ނުވަތަ އެޕާޓްމަންޓަކަށް އެދޭ އަދި ޝަރުތު ހަމަވާ 18 އަހަރުން މަތީގެ ކޮންމެ ރައްޔިތަކަށް ކަށަވަރު ކޮށްދިނުމާއި، ކުރިޔަށް އޮތް 20 އަހަރަށް އަމާޒުކޮށް، 65 ހާސް ގެދޮރު ޔަޤީންވާނެގޮތަށް، ޤައުމީ ތަރައްޤީގެ މައި ތަނބުގެ ގޮތުގައި ގްރޭޓަރ މާލޭ ރީޖަން އިތުރަށް ތަރައްޤީކުރުމާއި، އަލަށް ގެދޮރު އިމާރާތްކުރާ ހުރިހާ ފަރާތްތަކަށް، ފަސޭހައިން ދައްކާ ޚަލާސްކުރެވޭނެ ގޮތަށް، 5 އިންސައްތައިގެ އިންޓްރެސްޓް ރޭޓުގައި، ގެދޮރުވެރިކަމުގެ ބޭންކް ލޯނު ލިބޭނެ އިންތިޒާމު ފަހިކޮށްދިނުން ވެސް ހިމަނައިފައިވެއެވެ.
އަދި ގެދޮރު އިމާރާތްކުރަން އަމިއްލަ ފަރުދުން ފަށާ، އެކި ސަބަބުތަކާހުރެ ކުރިއަށްނުގެންދެވި ހުއްޓިފައިހުރި މަސައްކަތްތައް ނިންމާލުމަށްޓަކައި ލުއި ބޭންކް ލޯނު ސްކީމެއް އަލަށް ތަޢާރަފުކުރުމާއި، މާލެއާއި، ހުޅުމާލެއާ، ވިލިމާލެއާއި އެއްގަމު މަގުން ގުޅިގެންދާގޮތަށް ގުޅީފަޅާއި، ގިރާވަރުފަޅު ހިއްކާ ތަރައްޤީކޮށް، ފުށިދިއްގަރުފަޅު ހައި ސްޕީޑް ފެރީ ނިޒާމަކުން ގުޅާލުމާއި، މާލެއާއި، ހުޅުމާލެއާ، ވިލިމާލެއާއި އެއްގަމު މަގުން ގުޅިގެންދާގޮތަށް ގުޅީފަޅާއި، ގިރާވަރުފަޅު ހިއްކާ ތަރައްޤީކޮށް، ފުށިދިއްގަރުފަޅު ހައި ސްޕީޑް ފެރީ ނިޒާމަކުން ގުޅާލުމާއި، ސޯޝަލް ހައުސިންގ ފޯރުކޮށްދޭ ޑިވެލޮޕަރުންނާއި އިންވެސްޓަރުންނަށް ބޭނުންވާ ފައިސާ، ކުޑަ އިންޓެރެސްޓް ރޭޓެއްގައި ލިބޭނެ ގޮތް ހަމަޖެއްސުމަށް ޑިވެލޮޕްމަންޓް ބޭންކެއް ޤާއިމު ކުރުން ވެސް ވަނީ ހިމަނައިފައެވެ.
