އަޅުގަނޑެކޭ އެއްފަދައިން ރައްޔިތުން ކުރިއަރައި ދިޔުން އެދެން: ޤާސިމް
އޭނާއެކޭ އެއްފަދައިން، ދިވެހި ރައްޔިތުން ވެސް ކުރިއަރައިދިޔުން އެދިވަޑައިގަންނަވާ ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް، ޤާސިމް އިބްރާހީމް މިއަދު ވިދާޅުވެއްޖެއެވެ.
ޤާސިމް މިހެން ވިދާޅުވީ ށ.ފޭދޫގައި ސަޕޯޓަރުންނާއި ބައްދަލުކުރައްވައި، ވާހަކަ ދައްކަވަމުންނެވެ. ޤާސިމް ވިދާޅުވީ 2018 ވަނަ އަހަރުގައި އޭނާ ރާއްޖޭގެ ވެރިކަމަށް ކުރިމަތިލައްވަން ބޭނުންފުޅުވިޔަސް، އެ ފުރުސަތެއް ނުލިބުނު ކަމަށާއި، އޭރު ވެރިކަމަށް ކުރިމަތިލާފާނެހެން ހީވާ އެންމެން ވެސް ލާފައިވަނީ ޖަލަށް ކަމަށެވެ.
"އަޅުގަނޑުގެ ޕާޓީގަ ތިބިހާ މީހުން ވެސް ޖަލަށް، އެނގިވަޑައިގަންނަވާނެ، މިކަން." ޤާސިމް ވިދާޅުވިއެވެ.
ޤާސިމް ވަނީ މި ސަރުކާރަށް ވެސް ވަރަށް ބޮޑަށް ފާޑުވިދާޅުވެފައެވެ. އޭނާ ވިދާޅުވީ މި ސަރުކާރުން އެތައް ލޯނެއް ނަގާފައިވާއިރު، ރައްޔިތުންނަށް ފައިދާހުރި އިޤްތިޞާދީ މަސައްކަތަކަށް މި ފައިސާއިން ޚަރަދު ނުކުރާކަމަށެވެ.
އެ ފައިސާ އެހެން ކަންކަމަށް ޚަރަދުކުރިއިރު، ކޯލިޝަން ޕާޓުނަރުންނާއިއެކު ސަރުކާރުން ހަދާފައިވާ އެއްބަސްވުމާއި ޚިލާފުވެފައިވާކަމަށް ވެސް ޤާސިމް ވިދާޅުވިއެވެ.
ޤާސިމް ވިދާޅުވީ ސަރުކާރުން ރައްޔިތުންގެ އަތުން ނަގާ ޓެކްސް ބޮޑުކުރަމުން އަންނައިރު، ޤައުމުގެ ހާލަތު ރަނގަޅުނުވާ ކަމަށެވެ.
