މުޅި ރާއްޖެ އެކީގައި ތަރައްގީ ކުރުމަކީ ބޭނުންތެރި ކަމެއްގެ ގޮތުގައި ވާދަވެރިން ނުވިސްނަވާ: ރައީސް ޞާލިޙް
މުޅި ރާއްޖެ އެކީގައި ތަރައްޤީ ކުރުމަކީ ބޭނުންތެރިކަމެއްގެ ގޮތުގައި ވާދަވެރިން ނުވިސްނަވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ، އާލާސްކަންފުޅުގެ ސަބަބުން މެދުކަނޑުއްވައިލައްވައިފައިވާ ރިޔާސީ ކެމްޕެއިންގެ ދަތުރުފުޅުތައް މިއަދު ފައްޓަވައި، ބ.ހިތާދޫގެ ސަޕޯޓަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
އެގޮތުން ތަނެއް ތަރައްޤީ ކުރުމަށް ބޭނުންވާ އެންމެ މުހިއްމު ވަސީލަތަކީ ދަތުރުފަތުރު ކަމަށާއި އާރްޓީއެލް އަދި ވައިގެ މަގުން މުޅި ރާއްޖެ ގުޅިގެން ދިޔުމުން ހީނުކުރާ ވަރުގެ ބޮޑެތި ބަދަލުތައް ރާއްޖެ އަށް އަންނާނެ ކަމަށާއި އޭރުން ހިތާދޫގައި އުފައްދާ ތަކެތި ދުރުގައި ތިބޭ ރަށްތަކަށް ވިއްކުމަކީ އުނދަގޫ ކަމަކަށް ނުވާނެ ކަމަށް ރައީސް ޞާލިޙް ވިދާޅުވި އެވެ.
މީގެ އިތުރުން މި ސަރުކާރުން އަންނަނީ އެ ބިންގާ އަޅަމުން ކަމަށާއި މިހާރު މަސައްކަތް ކުރެވިފައި އޮތް ހިސާބުން އެކަން ހުއްޓުމަކަށް އަތުވެއްޖެ ނަމަ މުޅި ރާއްޖެ އަށް ވެސް ބޮޑެތި ގެއްލުންތަކެއް ލިބޭނެކަން ފާހަގަކުރައްވަމުން ރައީސް ޞާލިޙް ވިދާޅުވީ ވާދަވެރިންގެ ވިސްނުންފުޅު ހުރި ގޮތުން އެކަންތައް ކުރެވޭނެކަމަކަށް ނުބެލެވެއެވެ.
"އަޅުގަނޑުމެންގެ ވާދަވެރިންގެ ވިސްނުން ހުރި ގޮތް ވަރަށް ސާފު. އެމީހުންގެ ވިސްނުމެއް ހުރި ތަނެއް އެއްގޮތަކަށް ވެސް ނުފެނޭ، މި ވޭތުވެދިޔަތަނުގައި މުޅި ރާއްޖެ އެކީގައި ތަރައްޤީ ކުރުމަކީ އެއީ ބޭނުންތެރި ކަމެއްގެ ގޮތުގައެއް،" ރައީސް ޞާލިޙް ވިދާޅުވިއެވެ.
އެހެންނަމަވެސް އެމްޑީޕީއާ ގުޅިފައިވާ ކޯލިޝަނުގެ ސިޔާސަތަކީ ރާއްޖެ ތަރައްޤީ ކުރެވޭނީ ހުރިހާ ރަށެއް ތަރައްޤީކޮށްގެންކަން ގަބޫލުކުރާ ސިޔާސަތެއް ކަމަށާއި ރާއްޖެ ތަރައްޤީ ކުރަން ސިޔާސަތުތަކެއް އެކުލަވާލައިގެން ރިޔާސީ ރޭހަށް ނިކުމެ ތިބީ އެމްޑީޕީން އެކަނި ކަމަށް ރައީސް ޞާލިޙް ވިދާޅުވިއެވެ. އަދި އެހެން ކެންޑިޑޭޓުންގެ ފަރާތުން މިކަން ފެނިގެން ނުދާ ކަމަށްވެސް އެމަނިކުފާނު ވިދާޅުވިއެވެ.
ހަމައެއާއެކު ބައެއް ކެންޑިޑޭޓުން އެމްޑީޕީން މިހާތަނަށް ހާމަކޮށްފައި ހުރި ބައެއް ސިޔާސަތުތައް އެބޭފުޅުންގެ ސިޔާސަތުތަކުގެ ގޮތުގައި ހާމަކުރަމުން ގެންދަވާކަމަށް ރައީސް ޞާލިޙް ވިދާޅުވިއެވެ.
