ރައީސް ޞާލިޙް އަފީފަށް: ވަޑައިގަންނަވާ, ކުރީ ގޮނޑިބަރިން ޖާގަ ލިބޭނެ
އެމްޑީޕީން ވަކިވެވަޑައިގެން ދަ ޑިމޮކްރެޓްސް އާ ޕާޓީ އާ ގުޅިވަޑައިގެން ހުންނެވި ހަސަން އަފީފް އަނބުރާ އެމްޑީޕީއާ ގުޅިވަޑައިގަތުމުގެ ދައުވަތު ރައީސް އިބްރާހިމް މުހައްމަދު ޞާލިޙް މިއަދު ދެއްވައިފިއެވެ.
ރިޔާސީ އިންތިހާބުގެ ކެމްޕެއިނަށް ވިލުފުއްޓަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ އަފީފު އަކީ އެމަނިކުފާނު ވަރަށް އިހްތިރާމް ކުރާ ބޭފުޅެއް ކަމަށެވެ. ނަމަވެސް ޕާޓީގެ ތެރޭގައި އުފެދުނު ހަލަބޮލިކަމުގެ ތެރެއިން އެމްޑީޕީ ދޫކޮށް އަފީފު ވަޑައިގެންފައިވާ ކަމަށާއި އެކަމަކީ ވިސްނަން ޖެހޭ ކަމެއް ކަމަށް ރައީސް ވިދާޅުވިއެވެ.
އަދި އެމްޑީޕީއަށް ވަޑައިގެންފި ނަމަ ކުރީ ގޮނޑިބަރިން ޖާގަ އޮންނާނެ ކަމަށާއި އެއީ އަފީފަކީ އެ ޕާޓީ އަށް ވަރަށް ހިދުމަތް ކުރެއްވި ބޭފުޅެއް ކަމަށް ރައީސް ވިދާޅުވިއެވެ. މުސްތަގްބަލް އޮތީވެސް އެމްޑީޕީއާއެކު ކަމަށް ރައީސް ވިދާޅުވިއެވެ.
"ކުރީ ގޮނޑިބަރިން ޖާގަ އޮންނާނެ އެއީ ހިދުމަތް ކުރެއްވި ބޭފުޅުން. އަޅުގަނޑު ދަންނަވާނީ ވަޑައިގަންނަވާށޭ، އަޅުގަނޑުމެންނާ އެކީގައޭ މުސްތަގުބަލު އޮތީ" ރައީސް ޞާލިޙް ވިދާޅުވިއެވެ.
