މި ވައުދުތައް މިވަނީ މިއީ ސަރުކާރުން ކޮށްދޭންޖެހޭ ކަންކަމަށްވާތީ، އިންތިޚާބަށް ވާ ވައުދުތަކެއް ނޫން މިއީ: ރައީސް ޞާލިޙް
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ކެމްޕޭން ޖަލްސާތަކުގައި ވެވަޑައިގަންނަވާ ވައުދުފުޅުތަކަކީ އިންތިޚާބަކަށް ކުރިމަތިލައްވާތީ ވެވަޑައިގަންނަވާ ވައުދުތަކެއްނޫންކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ކުރިއަށް އޮތް އިންތިޚާބުގެ ކެމްޕޭނަށް މިއަދު ލ. އިސްދުއަށް ވަޑައިގެން ބޭއްވި ޖަލްސާގައި ވިދާޅުވީ ކުރީ ސަރުކާރުން އެއްވެސް ރޭވުންތެރިކަމެއް ނެތި، އިންތިހާބަށް ހަތަރު ދުވަސްވީމާ ރަށްރަށަށް އަރައި ވައުދުތައް ވަމުންދިޔަ ކަމަށާއި އެމްޑީޕީން ވައުދުވަމުންދަނީ ރޭވުންތެރިކަމާއެކު ކަމަށެވެ.
އަދި އެމަނިކުފާނު ވައުދުތައް ވެވަޑައިގަންނަވަމުން ގެންދަވަނީ އިންތިޚާބެއް ކުރިމަތިވީމަ ނޫން ކަމަށާއި އެއީ ސަރުކާރަކުން ރައްޔިތުންނަށް ކޮށްދޭން މަޖުބޫރުވާ ކަންތައްތަކެއް ކަމެއް ކަމަށެވެ.
"މިއީ އިންތިހާބަކަށް ކުރިމަތިލީމަ ވާ ވައުދުތަކެއް ނޫން. މިއީ ސަރުކާރަށް މަޖުބޫރުވާ ކަމަކަށް ވާތީ ވާ ވައުދުތަކެއް. މި ކަންކަން ކުރެވޭނީ މިކަމުގެ ތަޖުރިބާ ހުރި ބަޔަކަށް. އަޅުގަނޑުމެން ވެރިކަމަށް ކުރިމަތިލައިގެން މި އުޅެނީ އަނެއްކާވެސް އަމާޒުތަކެއް އޮވެގެން، ވައުދުތަކެއް ވެގެން. މިހާރު މިއޮތް ލެވެލުން އަނެއްކާވެސް އެހެން ލެވަލަކަށް ތަރައްގީ ގެނެސްދޭން،" ރައީސް ޞާލިޙް ވިދާޅުވިއެވެ.
އާބާދީގެ ކުޑަބޮޑު މިނެއް ބެލުމެއްނެތި ރައްޔިތުންނަށް ކަންކަން ކޮށްދެއްވަން ބޭނުންފުޅުވާ ކަމަށާއި ރައްޔިތުންނަށް ހިދުމަތްކޮށްދިނުން ފިޔަވައި އެއްވެސް އެދުމެއް މި ސަރުކާރުން ނުގެންގުޅޭނެ ކަން ފާހަގަކުރައްވަމުން ރައީސް ޞާލިޙް ވިދާޅުވީ ކޮވިޑުގެ ދުވަސްވަރު ރައްޔިތުންގެ މަޖިލީހުގެ ތެރެއިން ގިނަ އުނދަގޫތަކަކާ ކުރިމަތިލާން ޖެހުނު ކަމަށާއި އެގޮތުން ވެކްސިން ނުޖެހުމަށް ބައެއް ފަރާތްތަކުން ގޮވާލަމުންދިޔަ ކަމަށެވެ. އަދި ވެކްސިން ނުޖެހުމަށް ގޮވާލަމުން ދިޔައީ، އެހެން ގޮވަމުންދިޔަ މީހުން އަމިއްލައަށް ވެކްސިން ޖެހުމަށްފަހު ކަމަށްވެސް އެމަނިކުފާނު ވިދާޅުވިއެވެ.
"އިރާދަކުރެއްވިއްޔާ އަޅުގަނޑުމެން ވައުދުތައް ފުއްދުމުގައި ކުރިއަށް އޮތް ފަސް އަހަރުވެސް ދެމިތިބޭނަން. އަޅުގަނޑުމެންނަށް މިދިޔަ އަހަރުތަކުގައި ގިނަ އުނދަގޫތަކާއި ދަތިތަކެއް ކުރިމަތިވި، ކޮވިޑާ ގުޅިގެން ހީނުކުރާ ވަރުގެ ދަތި އުނދަގޫތަކެއް ކުރިމަތިވި. އެހެންނަމަވެސް ގިނަ ބައެއްގެ ބުރަ މަސައްކަތުން އެކަން ހުރަސްކުރެވިއްޖެ. ދުނިޔޭގެ އެހެން ގައުމުތަކުގެ އޮތް ގާތް ގުޅުމުގެ ސަބަބުން އުނދަގޫތަކުން އަރައިގަނެވުނު،" ރައީސް ޞާލިޙް ވިދާޅުވިއެވެ.
"އޭރު އަޅުގަނޑުމެންނަށް ކޮންމެ ދެ ހަފުތާއަކުން ސަރުކާރުގެ ހަރަދުތަކާއި ތަފްސީލުތައް ފޮނުވަން ރައްޔިތުންގެ މަޖިލީހުން އެންގި. އެ ދަތި އުނދަގުލުގައި ވެސް އަޅުގަނޑުމެން އެކަން ކުރިން،" ރައީސް ޞާލިޙް ވިދާޅުވިއެވެ.
ރައީސް ޞާލިޙް އިތުރަށް ވިދާޅުވީ މި ސަރުކާރަކީ އޮޅުވާލައިގެން ނާޖާއިޒު ފައިދާތަކެއް ނަގާނެ ސަރުކާރެއް ނޫންކަމަށެވެ.
