އެއާޕޯޓު އަޅާނެ ވަކިތަނެއް ނިންމާފައި ލ. އަތޮޅުގައި އަދި އިތުރު އެއާޕޯޓެއް އަޅާނަން: ރައީސް ޞާލިޙް
ލ. އަތޮޅުގައި ދެވަނަ އެއާޕޯޓެއް އަޅާނެ ތަނެއް ކަނޑައަޅުއްވާފައި އިތުރު އެއާޕޯޓެއް އެ އަތޮޅުގައި އަޅުއްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިޚާބުގެ ކެމްޕޭނަށް ލ. ކަލައިދޫއަށް ވަޑައިގެން އެ ރަށުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ ދެވަނަ ދައުރަކަށް އިންތިހާބުވެއްޖެ ނަމަ، އެ އަތޮޅުގައި މަދުވެގެން އަދި އިތުރު އެއް އެއާޕޯޓް އަޅައިދެއްވާނެކަމަށާއި އެކަމުގެ މަޝްވަރާތައް ވެސް މިހާރު ކުރިއަށް ގެންދާކަމަށެވެ.
އެ އެއާޕޯޓް އަޅާނީ އަތޮޅުގެ ކޮން ތަނެއްގައި ކަމެއް އަދި ނިންމަވާފައި ނުވާކަމަށް ރައީސް ޞާލިޙް ފާހަގަކުރައްވާފައިވާއިރު ލ. އަތޮޅުގައި އިތުރު އެއާޕޯޓެއް އަޅާނެ ކަން އެމަނިކުފާނު އެންމެ ފުރަތަމަ އިއުލާންކުރެއްވީ އެމްޑީޕީގެ ޕްރައިމަރީގެ ކެމްޕެއިނަށް މިއަހަރު ޖެނުއަރީ މަހު އެ އަތޮޅަށް ކުރެއްވި ދަތުރުފުޅުގަ އެވެ.
"ލ. އަތޮޅަށް އިތުރު އެއާޕޯޓެއް އެބަ ބޭނުންވޭ. އެކަމަށް އަޅުގަނޑުމެން މަޝްވަރާ ކުރަމުން މި ދަނީ. އެއާޕޯޓެއް އަޅަން އެންމެ ރަނގަޅު ތަނެއް ހޯދައި، ކުރިއަށް މި އޮތް ދައުރުގެ ތެރޭގައި އިތުރު އެއާޕޯޓެއްވެސް އަޅުގަނޑުމެން އަޅައިދޭނަން،" ރައީސް ޞާލިޙް ވިދާޅުވި އެވެ.
ލ. އަތޮޅުގައި މިހާރު ހިންގަމުން އަންނަ ކައްދޫ އެއާޕޯޓް އިންޓަނޭޝަނަލް ފެންވަރަށް ތަރައްގީކުރަން ވެސް ސަރުކާރުން ވަނީ ނިންމައިފަ އެވެ. އަދި އެކަމަށް ބޭނުންވާ ބިން ހިއްކަން މި މަހު ވަނީ އެމްޓީސީސީއާ ވެސް ހަވާލުކޮށްފަ އެވެ.
އެ އަތޮޅުގައި ޓޫރިޒަމްގެ ވިޔަފާރި ފުޅާކުރުމަށް ފޮނަގާދޫ ޓޫރިޒަމަށް ހުޅުވާލިކަން ފާހަގަކުރައްވަމުން ރައީސް ޞާލިޙް ވިދާޅުވީ ކަލައިދޫގައި ސިޓީ ހޮޓަލެއް އަޅަން އަންނަ ދައުރުގައި ހުޅުއްވާލައްވާނެކަމަށެވެ.
މީގެ އިތުރުން ރައީސް ޞާލިޙް ވިދާޅުވީ، މަޝްރޫއުތައް ހިންގަންވާނީ ދިގު މުއްދަތަކަށް ދެމިގެންދާނެ ގޮތަށް ކަމަށާއި ދައުލަތުގެ ފައިސާ ބޭނުންކުރަންވާނީ އޭގެ އެންމެ ބޭނުންތެރި ގޮތުގައި ކަމަށެވެ. އަދި މި ސަރުކާރުން ހިންގާފައިވާ މަޝްރޫއުތަކުގެ ފައިދާ މިހާރު ލިބެން ފަށާފައިވާ ކަމަށް ވިދާޅުވިއެވެ.
