އެއް ބިލިއަން ޑޮލަރުގެ ދަރަނި ދައްކާނެ ގޮތްތައް އެބަހުރި: ރައީސް ޞާލިޙް
2026 ވަނަ އަހަރު ރާއްޖެއިން ބޭރުގެ ދަރަނީގެ ގޮތުގައި ދައްކަންޖެހޭ 1 ބިލިއަން ޑޮލަރު ދައްކާނެ ގޮތްތަކާއި، ސިޔާސަތުތައް އެބަހުރިކަމަށް މިއަހަރު ދެވަނަ ދައުރަކަށް ކުރިމަތިލައްވާފައިވާ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ މިރޭ ސަންގު ޓީވީއިން ކުރިއަށް ގެންދިޔަ ރިޔާސީ ކެނޑިޑޭޓުންގެ ބަހުސްގައި، ކުރެއްވި ސުވާލަކަށް ޖަވާބު ދެއްވަމުންނެވެ.
ސަންގު ޓީވީގެ ނޫސްވެރިޔާ ސުވާލު އަމާޒުކޮށްފައިވަނީ މިހާރު ރާއްޖެއިން ނަގާފައިވާ ބޭރު ލޯނުތަކާއި އަދި 2026 ވަނަ އަހަރު ރާއްޖެއިން ދައްކަންޖެހޭ އެއްބިލިއަން ޑޮލަރުގެ ލޯނާއި ގުޅޭގޮތުން ކެނޑިޑޭޓުންގެ ސިޔާސަތު ހުރިގޮތާއި، މި ލޯނުތައް ދެއްކުމަށް ކެނޑިޑޭޓުން މަސައްކަތްކުރާނެ ގޮތްތަކާއި އަދި އެ ކެނޑިޑޭޓެއްގެ ވެރިކަމެއްގައި އިތުރު ޓެކްސްއެއް ނެގުމަށް ވިސްނުން ހުރި ގޮތާއިމެދުގައެވެ.
ރައީސް ވިދާޅުވީ 2026 އަށް މުއްދަތު ހަމަވަަނީ 800 މިލިއަން ޑޮލަރުގެ ދަރަންޏެއްކަމަށާއި އެއީ އަބޫދާބީ ފަންޑް ފޯ ޑިވެލޮޕްމަންޓް (އޭޑީއެފްޑީ) ގެ 100 މިލިއަން ޑޮލަރާއި ކޮވިޑުގެ ދުވަސްވަރު ނެގި 500 މިލިއަން ޑޮލަރުގެ ސުކޫކެވެ. އަދި މި 500 މިލިއަން ޑޮލަރުގެ ސުކޫކުގެ ތެރެއިން، 250 މިލިއަން ޑޮލަރު ދައްކާފައިވަނީ ކުރީގެ ސަރުކާރުން ނަގާފައިވާ ބޮންޑްއަކަށް ފައިސާ އަނބުރާ ދެއްކުމަށާއި އަދި ބާކީ ހުރި ބައި ޚަރަދުކޮށްފައިވަނީ ސަރުކާރުގެ އެކި ކަންތައްތަކަށް ކަމަށެވެ.
ރައީސް ޞާލިހު ވިދާޅުވީ 2026 ވަނަ އަހަރު ރާއްޖެއިން ދައްކަންޖެހޭ ބޭރު ދަރަނީގެ ދެބައިކޮށްފައި އެއްބައި ރީފައިނޭންސް ކުރައްވާނެކަމަށާއި މި ލޯނު އަނބުރާ ދެއްކޭނެ ގޮތްތަކާއި ސިޔާސަތު ހަމަޖައްސާފައިވާކަމަށް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ ސޮވެރިން ޑިވެލޮޕްމަންޓް ފަންޑުގައި މިހާރުވެސް 6 ބިލިއަން ރުފިޔާ އެބަހުރިކަމަށާއި އެމަނިކުފާނުގެ އަމާޒަކީ 2026 ވަނަ އަހަރު އަންނައިރު، 350-400 މިލިއަން ޑޮލަރާ ދެމެދަށް ފަންޑު ބޮޑުކުރުންކަމަށެވެ.
ދައުލަތަށް ލިބޭ އާމްދަނީ މިދަނީ ދުވަހެއް ދުވަހަކަށް އިތުރުވަމުން، އަޅުގަނޑުމެން ވެރިކަމަށް އައިއިރު ދައުލަތަށް ލިބެނީ 22 މިލިއަން ރުފިޔާ، މިއަހަރު 34 މިލިއަން ރުފިޔާ އަދި 2026 ވަނަ އަހަރު އަންނައިރު 46 ބިލިއަން ރުފިޔާ ދައުލަތަށް ވަންނާނެ"
ފަހު ކަމަށް ރައީސް ވިދާޅުވީ އެމަނިކުފާނުގެ މެނިފެސްޓޯގައި ރައްޔިތުންނަށް ވެފައިވާ ވައުދުތަކާއި، ލޯނު ދެއްކުމަށް އެއްވެސް ދަތިކަމެއް ނެތްކަމަށާއި އެމަނިކުފާނަށް ވެރިކަން ލިބިއްޖެނަމަ އިތުރު ޓެކްސްއެއް ނެގުމަށް ވިސްނުންފުޅު ނުގެންގުޅުއްވާކަމަށެވެ.
Ads by STO
