ޗައިނާއާއެކު އޮތް ގުޅުން ވަރަށް ރަނގަޅު، މިހާރުވެސް ވަރަށް ގިނަ އެހީ ލިބޭ: ރައީސް ޞާލިޙް
މި ސަރުކާރާއި ޗައިނާއާއެކު އޮތް ގުޅުން ވަރަށް ރަނގަޅުކަމަށާއި މިހާރުވެސް ވަރަށް ގިނަ އެހީތައް ލިބޭކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ މިރޭ ސަންގު ޓީވީއިން ކުރިއަށް ގެންދިޔަ ރިޔާސީ ކެނޑިޑޭޓުންގެ ބަހުސްގައި، ޗައިނާއާއެކު އޮތް ގުޅުންތަކާއި ގުޅުވައި ކުރެއްވި ސުވާލަކަށް ޖަވާބު ދެއްވަމުންނެވެ.
"އަޅުގަނޑުމެން އައްޑޫގައި ހިންގަން މިއުޅޭ ޓޫރިޒަމް ޕްރޮޖެކްޓަކީ ޗައިނާގެ ކުންފުންޏަކުން ހިންގާ ޕްރޮޖެކްޓެއް"
"އަޅުގަނޑުމެންގެ ސިޔާސަތަކީ އިންޑިއާ ފަސްޓް، ވަން ޗައިނާ ޕޮލިސީ، އެއީ ހެނދުނު ފުރައްސާރަކޮށް، ހަވީރު ފިރުމާގޮތަށް އޮތް ސިޔާސަތެއް ނޫން" ރައީސް ވިދާޅުވިއެވެ.
ކެނޑިޑޭޓުންގެ ޚާރިޖީ ސިޔާސަތު ހުރި ގޮތާމެދު ކުރެއްވި ސުވާލަށް ޖަވާބު ދެއްވަމުން ރައީސް ވިދާޅުވީ އެކަނިކުފާނުގެ ސަރުކާރުގެ ޚާރިޖީ ސިޔާސަތު މިހާރުވެސް ބައްޓަންވެފައި އޮތީ ޑިމޮކްރަސީ ކުރިއެރުވުމަށާއި، އިންސާނީ ޙައްޤުތައް ކުރިއެރުވުމަށާއި، ތިމާވެށި ހިމާޔަތްކުރުމަށް މަސައްކަތްކުރުމަށް ކަމަށެވެ.
ދެވަނަ ދައުރަކަށް ވާދަކުރައްވާ ރައީސް ޞާލިޙް ވިދާޅުވީ ފާއިތުވެދިޔަ ފަސް އަހަރުގެ ތެރޭގައި 189 ޤައުމަކާއެކު ޑިޕްލޮމެޓިކް ގުޅުން ޤާއިމުކުރެވިއްޖެކަމަށާއި، 80 އަށް ވުރެ ގިނަ ޤައުމުތަކަށް ވިސާ ނުލާ ދަތުރުކުރެވޭނެ ގޮތް ހަމަޖައްސައިދެވިއްޖެކަމަށެވެ.
މީގެ އިތުރުން، އަރަބި ޤައުމުތަކާއި ކޮމަންވެލްތާއެކު ކަނޑާލާފައި އޮތް ގުޅުން އަލުން ރުޖޫޢަކުރެވިއްޖެކަމަށާއި ޔޫރަޕިއަން ޔޫނިއަންއާއެކު ވަރަށް ބަދަހި ގުޅުމެއް ޤާއިމްކުރެވިއްޖެކަމަށް ރައީސް ވިދާޅުވިއެވެ.
"އަޅުގަނޑުމެންގެ ޚާރިޖީ ސިޔާސަތު ބައްޓަންކުރެވިގެންދާނީ މިގޮތަށް، އަދި އިސްއުފުލޭ ޚާރިޖީ ސިޔާސަތެއްގެ ގޮތުގައި އަޅުގަނޑުމެން އޮންނާނީ، ބަސް ކިޔާނެ ބަޔަކީ އަޅުގަނޑުމެން" ރައީސް ޞާލިޙް ވިދާޅުވިއެވެ.
