ވަގުންނަށް ވައްކަން ކުރުމުގެ ދޮރުތައް މިވަނީ ހުޅުވާލެވިފައި: މުސްތަފާ
ވަގުންނަށް ވައްކަން ކުރުމުގެ ދޮރުތައް ހުޅުވާލެވިފައި ކަމަށް ތިމަރަފުށީ ދާއިރާގެ ކުރީގެ މެންބަރު މުހައްމަދު މުސްތަފާ ވިދާޅުވެއްޖެއެވެ.
މުސްތަފާ މިހެން ވިދާޅުވީ ޑިފެންސް މިނިސްޓްރީގެ އާ އިމާރާތުގެ މަސައްކަތަށް ބިޑް ކުރުމުގެ ހުރިހާ މަރުހަލާއެއް ނިމިފައި އޮއްވާ މާ ފަހުން ބިޑް ކުރުމުގެ އުސޫލަށް ގެނައި ބަދަލެއްގެ ތެރެއިން އެ ޕްރޮޖެކްޓަށް އެންމެ ކުޑަ އަގު ހުށަހެޅި ކުންފުނި ބާކީކޮށް ކޮރަޕްޝަނުގެ ގިނަ ތުހުމަތުތަކެއް ކުރެވިފައިވާ ދަނޑިވަޅެއްގައެވެ. އެގޮތުން މި މައްސަލައިގައި ވަނީ 5.5 މިލިޔަން ރުފިޔާ އަގު ބޮޑުކޮށް އެހެން ކުންފުންޏަކަށް އެ މަސައްކަތް ހަވާލުކުރި ކަމުގެ ތުހުމަތު ކުރެވިފައެވެ.
މުސްތަފާ ކުރެއްވި ޓްވީޓުގައި ވިދާޅުވީ ވަގުންނަށް ވައްކަން ކުރުމުގެ ދޮރުތައް ވަނީ ހުޅުވާލެވިފައިވާ ކަމަށާއި އެއްޗެކޭ ބުނެވޭނެ އެކަކު ވެސް ނެތް ކަމަށާއި ވައްކަންކޮށް މުޅި ގައުމު ބަރަހަނާކޮށް ނިންމާފައިވާ ކަމަށެވެ.
ފިނޭންސް މިނިސްޓްރީ އާ މެދު ކުރެވޭ ކޮރަޕްޝަންގެ ތުހުމަތުތައް އެމިނިސްޓްރީ އިން ވަނީ ދޮގުކޮށްފައެވެ. އަދި އެ މަސައްކަތް ހަވާލުކޮށްފައި ވަނީ އުސޫލުގެ ތެރެއިން ކަމަށްވެސް އެ މިނިސްޓްރީ އިން ވަނީ ބުނެފައެވެ.
