ބައެއް މީޑިއާތަކުން ޗައިނާއާއި ގުޅިގެން ދޮގު މައުލޫމާތު ފަތުރާތީ ފިޔަވަޅު އެޅުއްވުމަށް ޗައިނާއިން އެދިއްޖެ

ދިވެހިރާއްޖެއާއި ޗައިނާއާއި ދެމެދު އޮންނަ ރަޙްމަތްތެރިކަމުގެ ގުޅުމަށް ހީނަރުކަން އަންނަ ގޮތަށް ބައެއް މީޑިއާތަކުން ދޮގު މައުލޫމާތު ފަތުރާކަމަށާއި އެކަމާއި ގުޅިގެން ފިޔަވަޅު އެޅުއްވުމަށް ޗައިނާ އެމްބަސީއިން ރާއްޖޭގެ ސަރުކާރުގައި އެދިފިއެވެ.

ޗައިނާ އެމްބަސީން މިއަދު ކުރެއްވި ޓްވީޓެއްގައި ވިދާޅުވެފައިވަނީ ރާއްޖޭގެ ބައެއް މީޑިއާތަކުން ޗައިނާއަށް އަމާޒުކޮށް ދެ ގައުމުގެ ދެމެދުގައި އޮތް ވަރުގަދަ ގުޅުމަށް ހީނަރުކަން އަންނަ ގޮތަށް ދޮގު ހަބަރުތަކެއް ފަތުރަމުންދާ ކަމަށާއި މިފަދަ ޚަބަރުތައް ފަތުރާ ފަރާތްތަކަށް ފިޔަވަޅު އަޅައި އެކަންކަން ތަހުޤީގުކުރުމަށް ދިވެހި ސަރުކާރުގައި މިހާރު އެދިފައިވާނެކަމަށެވެ.

މީގެ އިތުރުން، އެފަދަ ހަޤީގަތެއް ނެތް ޚަބަރުތަކުގެ ސަބަބުން ރާއްޖެ އާއި ޗައިނާގެ ވަރުގަދަ ގުޅުމަށް އެއްވެސް ހީނަރުކަމެއް އަތުވެދާނެކަމަށް ޤަބޫލުނުކުރެވޭ ކަމަށާއި ޗައިނާއިން ޤައުމުތަކުގެ ދާޚިލީ ކަންކަމާއި ނުބެހޭނެކަމަށް ޗައިނާ އެމްބަސީން ވިދާޅުވެފައިވެއެވެ.

Ads by Sosun Fihaara

އަދި ޗައިނާއިން ރާއްޖޭގައި މިކުރާ މަސައްކަތަކީ، ރާއްޖޭގެ އިޤްތިޞާދީ އަދި އިޖްތިމާޢީ ކުރިއެރުމަށް ޓަކައި ކުރާ ކަންތައްކަމަށާއި އޭގެ ސަބަބުން ދިވެހި ރައްޔިތުންނަށް ވަރަށް ބޮޑު މަންފާއެއް ލިބިގެންދިޔަކަމަށެވެ.