ރައްޔިތުންގެ ސިކުނޑީގައި އޮންނަނީ ދެވަނަ ބުރު، ބަރުލަމާނީ ނިޒާމުގެ ވާހަކަ ދައްކަނީ ބިރުވެރިކަން ފަތުރަން: ޝަރީފް
ރިޔާސީ އިންތިޚާބުގެ ދެވަނަ ބުރަށް ވަގުތު ކުޑަތަންވެފައި އޮއްވައި ބަރުލަމާނީ ނިޒާމުގެ ވާހަކަ ދައްކަނީ ރައްޔިތުންގެ ހިތްތަކުގައި ބިރުވެރިކަން ފެތުރުމަށްކަމަށް ޕީއެންސީގެ ޕީޖީ ލީޑަރު އަދި މަޖިލީހުގެ މަޑުއްވަރި ދާއިރާގެ މެންބަރު އާދަމް ޝަރީފު އުމަރު ވިދާޅުވެއްޖެއެވެ.
ރ. ހުޅުއްދުއްފާރުގައި މިހާރު ކުރިއަށްދާ ޑރ. މުޙައްމަދު މުއިއްޒުގެ ކެންޕެއިން ޖަލްސާގައި ވާހަކަ ދައްކަވަމުން އާދަމް ޝަރީފް ވިދާޅުވީ ރައްޔިތުންގެ ހިތާއި ސިކުނޑީގައި އޮތީ ދެވަނަ ބުރުކަމަށާއި ބަރުލަމާނީ ނިޒާމުގެ ވާހަކަ ދައްކަނީ ރައްޔިތުންގެ ހިތްތަކުގައި ބިރުވެރިކަން އުފެއްދުމަށްކަމަށެވެ.
"ރިޔާސީ އިންތިޚާބުގެ ދެވަނަ ބުރު ކުރިމަތިވެފައި އޮއްވާ، ޚިޔާލަށް ގެނެސްބައްލަވާ، ކޮން ބަރުލަމާނީ ނިޒާމެއްގެ ވާހަކަ ދައްކާކަށްތޯ މިއުޅެނީ"
"ރައްޔިތުންގެ ހިތްތަކުގައި، ރައްޔިތުންގެ ސިކުނޑީގައި މިއަދު އޮންނާނީ ދެވަނަ ބުރު، ބަރުލަމާނީ ނިޒާމެއްގެ ވާހަކަ މި ދައްކަނީ ވަރަށް ބޮޑު އޮޅުވާލުންތައް އޮޅުވާލައި، މުޅި ޤައުމުގެ މުސްތަޤުބަލާ ދޭތެރޭގައި ރައްޔިތުންގެ ހިތްތަކުގައި ބިރުވެރިކަން އުފައްދަން"
އާދަމް ޝަރީފް ވިދާޅުވީ އެމްޑީޕީއިން މިހާރު ބަރުލަމާނީ ނިޒާމަށް ތާއީދުކޮށް އޭގެ ވާހަކަ ދައްކަނީ ހަޤީޤަތުގައިވެސް ރައީސް އިބްރާހިމް މުޙައްމަދު ޞާލިޙް ދެވަނަ ބުރުގައި ފެއިލްވާނެކަމަށް ޤަބޫލުކުރާތީކަމަށެވެ. އަދި މި ދަނޑިވަޅުގައި ޑރ. މުއިއްޒުއަށް ތާއީދު އިތުރުކޮށް، ބަރުލަމާނީއަށް ނޫނެކޭ ބުނަންޖެހޭކަމަށް އާދަމް ޝަރީފް ވިދާޅުވިއެވެ.
"އެހެންވީމާ އަޅުގަނޑުމެންނަށް މިވަގުތު ކުރެވެން އެންމެ މުހިއްމުކަމަކީ މި ވޯޓުގައި ބޮޑު ތަފާތަކުން އަޅުގަނޑުމެން ކާމިޔާބުކޮށް، ހުރިހާ ގޮތަކުންވެސް، އެއްވެސް ހާލެއްގައި އެމްޑީޕީއަށް އަޅުގަނޑުމެންނާ ވާދަނުކުރެވޭވަރުގެ ބޮޑު ފަރަގެއް އަޅުގަނޑުމެން ދެއްކުން"
"އަޅުގަނޑުމެން އެބަޖެހޭ ކޮންމެ ގޮތެއް ހަދާފައިވެސް ކުރިއަށް އޮތް 5 އަހަރަކީ ޕްރޮގްރެސިވް ކޮންގްރެސް ކޯލިޝަންގެ ވެރިކަން ކުރާނެ 5 އަހަރުކަމަށް ހަދަން"
އާދަމް ޝަރީފް ވިދާޅުވީ މި ޤައުމުގެ މުސްތަޤުބަލައްޓަކައި، މި ޤައުމުގެ މިނިވަންކަމަށްޓަކައި، މި ޤައުމުގެ ސިޔާދަތު ރައްކާތެރިކުރުމަށްޓަކައި އަދި ކުދި ދަރީންގެ މުސްތަޤުބަލަށާއި އިސްލާމްދީނަށްޓަކައިވެސް ކުރިއަށް އޮތް 5 އަހަރު ޑރ. މުއިއްޒުއަށް ހޯއްދަވައިދެއްވުމަށް ހުރިހާ ރައްޔިތުން މަސައްކަތްކުރެއްވުމަށް ގޮވާލައްވާފައެވެ.
