މަޝްރޫއުތައް ނުނިމެނީސް، ރިބަން ކަނޑާފައި ހުރި ކަމުގެ ޝަކުވާ އެބަ ލިބޭ، އެ މަޝްރޫއުތައް ނިންމަދޭނީ އަޅުގަނޑު: މުއިއްޒު
ރައީސުލްޖުމްހުރިއްޔާ އިބްރާހިމް މުޙައްމަދު ޞާލިޙުގެ ސަރުކާރުން ރަށްރަށުގައި ކުރިއަށް ގެންދާ މަޝްރޫއުތައް ނުނިމެނީސް، އެކަން ނިމިއްޖަކަމަށް އިއުލާނުކޮށް "ރިބަން ކަނޑާފައި" ވާ ކަމުގެ ޝަކުވާ އެކި ރަށްރަށުގެ ރައްޔިތުން ކުރައްވާކަމަށާއި އެ މަޝްރޫއުތައް ނިންމައި ރައްޔިތުންނަށް ބޭނުންވާ ޚިދުމަތް ކޮށްދެއްވާނެކަމަސް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް ރ. ރަސްގެތީމަށް ވަޑައިގެން އެ ރަށުގައި ބޭއްވި ޖަލްސާގައި ވާހަކަފުޅު ދައްކަވަމުން މުއިއްޒު ވިދާޅުވީ ރަށްރަށުގައި ފަށާފައި އަދި ފަށަން ތައްޔާރުވެފައިވާ އެތައް މަޝްރޫއުތައް ހުރިކަން ޤަބޫލުކުރައްވާ ކަމަށާއި މުއިއްޒުއަށް ވެރިކަން ލިބިވަޑައިގެންނެވުމުން އެ މަޝްރޫއުތައް ނުހުއްޓުވާނެކަމަށެވެ.
އަދި އެއީ އެމަނިކުފާނުގެ ސިޔާސަތުގައި ހިމެނޭ ވަރަށް މުހިންމު ކަމެއްގެ ގޮތުގައި ފާހަގަކުރައްވަމުން މުއިއްޒު ވިދާޅުވީ ރަށްރަށުގެ އާބާދީއަށް ބަލައި އެ ރަށަކަށް ބޭނުންވާ މިންވަރަށް ތަރައްޤީ ގެނެސްދެއްވާނެކަމަށާއި އޭގައި އެއްވެސް ރަށެއް ނުވަތަ އެއްވެސް ބަޔަކު އިސްތިސްނާ ނުކުރައްވާނެކަމަށެވެ.
އެގޮތުން ރ. ރަސްގެތީމުގައި ކުރަން ހުރި މަޝްރޫއުތަކުގެ ތެރޭގައި އެ ރަށު ބަނދަރާއި އޮޑި ހެލާނެތަން ރައްޔިތުން ބޭނުންވާ ގޮތަށް ޤާއިމުކޮށްދެއްވުމަށާއި، ސުކޫލުގެ ޖާގަ އިތުރުކޮށް އަދި ސިއްޙީ މަރުކަޒުގެ ފެންވަރު ރަނގަޅުކުރައްވާނެކަމަށް މުއިއްޒުވަނީ ވައުދުވެވަޑައިގެންފައެވެ. އަދި މީގެ އިތުރުންވެސް އެހެން ރަށްތަކޭ އެއްގޮތަށް ރަސްގެތީމަށްވެސް ބޭނުންވާ އެހެނިހެން ތަރައްޤީގެ މަސައްކަތްތައް ފުރިހަމައަށް ކޮށްދެއްވާނެކަމުގެ ޔަޤީންކަން މުއިއްޒު ދެއްވިއެވެ.
ރަސްގެތީމުގެ ފުޓްބޯޅަ ދަނޑުގައި ވަށާ ޖަހާފައި ހުރި ފެންސް ހަލާކުވެފައިހުރި ވާހަކަ އެ ރަށުގެ ރައްޔިތުން މުއިއްޒު ސަމާލުކަމަށް ގެންނެވުމުން މުއިއްޒު ވިދާޅުވީ "މި ސަރުކާރުން ކަންތައްތައް ހުރީ މިކަހަލަ ގޮތަކަށް" ކަމަށާއި މިއީ މި ސަރުކާރުގެ ދޯދިޔާކަމުގެ ނަތީޖާކަމަށެވެ.
"ނަރުދަމާއާއި ފެން މަސައްކަތް ނުނިމެނީސް ރިބަން ކެނޑި ވާހަކަ، ދެތިން ރަށުން މިކަން ދިމާވެއްޖެ މިހާރު، ރައީސުލްޖުމްހޫރިއްޔާ ވަޑައިގެން ފެނުގެ ނިޒާމް ފެށްޓިކަމަށްވަނީ ކޮންމެވެސް ވަރެއްގެ ތާނގިއެއް ބައިންދައިގެން އިސްކުރެއް ބައިންދައިގެން ދޫކޮށްލީ، އެކަމަކު އެ ރަށުގެ ފެނުގެ ނެޓްވޯކް އަޅައިދީ ނުނިމޭ 70 ޕަސެންޓު ވެސް، އެކަހަލަ ރަށަކާއިވެސް ދިމާވެއްޖެ" މުއިއްޒު ވިދާޅުވިއެވެ.
އެހެންކަމުން މިކަންކަމުން ފާހަގަވެގެންދަނީ މި ސަރުކާރުން އެއްވެސް ވަރަކަށް ރައްޔިތުންނަށް ސަމާލުކަން ދީފައިނުވާކަން ކަމަށް މުއިއްޒު ވިދާޅުވިއެވެ.
