ވެރިކަން ބަދަލުވާ މަރުހަލާގައި އާ ޕްރޮޖެކްޓުތައް ނުފަށަން އަންގައިފި
ވެރިކަން ބަދަލުވާ މަރުހަލާ މިހާރު ހިނގަމުންދާއިރު، ރިޔާސީ ދައުރު ފެށުމާ ހަމައަށް، އާ ޕްރޮޖެކްޓުތައް ނުފެށުމަށާއި ބައެއް އެހެނިހެން ކަންކަން މަޑުޖައްސާލުމަށް ޕްރައިވަޓައިޒޭޝަން ކޯޕަރަޓައިޒޭޝަން ބޯޑު (ޕީސީބީ) އިން އަންގައިފިއެވެ.
ޕީސީބީން އިން ނެރިފައިވާ ބަޔާނެއްގައި ވަނީ އިންތިޤާލީ މުއްދަުގައި ސަރުކާރުގެ ކުންފުނިތަކާއި، ސަރުކާރު ޙިއްސާވާ ކުންފުނިތަކާއި ސަރުކާރުގެ ވިޔަފާރިކުރާ ކުންފުނިތަކުން އާ ޕްރޮޖެކްޓުތައް ފަށައި، ބޮޑު ޚަރަދެއް ނުކުރުމަށް އަންގާފައެވެ.
އެ އިދާރާއިން އަންގާފައިވާ ކަންތައްތަކުގެ ތެރޭގައި:
- ކުންފުނިން ޢާންމުކޮށް ހިންގާ ވިޔަފާރީގެ މުޢާމަލާތްތައް ފިޔަވައި މުޅިން އަލަށް އެއްވެސް ޕްރޮޖެކްޓެއް ނުވަތަ ކުންފުނިން ބޮޑު ޚަރަދެއް ކުރަންޖެހޭ އައު އެއްވެސް ކަމެއް ނުކުރުން
- ކުންފުނީގެ އާމްދަނީއަށް އަސަރުކުރާނެ ޤަވާއިދުތަކާއި އުޞޫލުތަކާއި ނިންމުންތަކަށް ބަދަލު ނުގެނައުން
- ކުންފުނީގެ މުވައްޒަފުންގެ މުސާރައިގެ އުޞޫލުތަކާއި، މުސާރައާއި އިނާޔަތްތަކަށް ބަދަލު ނުގެނައުން
- ކުންފުނީގެ މުވައްޒަފުންނާ ގުޅޭ ޤަވާއިދުތަކާއި އުޞޫލުތަކަށް ބަދަލު ނުގެނައުން
- ކުންފުނީގެ ވަޒީފާގެ އޮނިގަނޑަށް ބަދަލު ނުގެނައުން
މީގެ އިތުރުން އެ އިދާރާއިން ވަނީ އިންތިޤާލީ ކޮމިޓީއަށް ބޭނުންވާ ހުރިހާ މަޢުލޫމާތު ފޯރުކޮށްދިނުމަށާއި، އެ ކޮމިޓީއަށް ބޭނުންވާނެ ލިޔެކިޔުންތަކާއި މަޢުލޫމާތު ލުއި ފަސޭހަ ގޮތެއްގައި ލިބޭނެ އިންތިޒާމް ހަމަޖައްސައިދިނުމަށްވެސް އަންގާފައެވެ.
މި މުއްދަތުގެ ތެރޭގައި، ރައްޔިތުންގެ މަސްލަޙަތަށް ވިސްނުމަށާއި، ޒިންމާދާރު ހާމަކަން ބޮޑުގޮތެއްގައި ކުންފުނިތަކުގެ ނިންމެވުންތައް ނިންމަން ޕީސީބީން ނެރުނު އެ ބަޔާނުގައި އަންގާފައިވެއެވެ.
Ads by STO
