އެކުގައި ހުރިކަމުގައި ވިޔަސް މިފަހަރު އިންތިޚާބު ރައީސް ޞާލިޙަށް ކާމިޔާބެއް ނުކުރެވުނީސް: ރައީސް ނަޝީދު

ސެޕްޓެންބަރު މަހުގެ 30ވަނަ ދުވަހު ބޭއްވި ރިޔާސީ އިންތިޚާބުގައި, އެމްޑީޕީގެ ރިޔާސީ ކެނޑިޑޭޓް ރައީސް އިބްރާޙީމް މުޙައްމަދު ޞާލިޙާއި އެކުގައި ހުންނެވި ނަމަވެސް, އިންތިޚާބު ކާމިޔާބު ނުކުރެއްވޭނެ ކަމަށް, މަޖިލީހުގެ ރައީސް, ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by Sosun Fihaara

ރައީސް ނަޝީދު މިހެން ވިދާޅުވެފައިވަނީ އިންޑިއާގެ ނޫހެއް ކަމަށްވާ "ދަ ހިންދޫ"އަށް ދެއްވި އިންޓަރވިއުއެއްގައެވެ.

އެ ނޫހުން ވަނީ މިފަހަރުގެ އިންތިޚާބުގައި, ރައީސް ޞާލިޙާއި އެކުގައި ހުންނެވި ނަމަ, އިންތިޚާބުގެ ނަތީޖާ އަނބުރާލެވިދާނެތޯ ސުވާލު ކުރުމުން ރައީސް ނަޝީދު ވިދާޅުވީ, ރައީސް ޞާލިޙް ނާކާމިބުވެ ވަޑައިގަންނަވާނެ ކަން އެމަނިކުފާނު 2020ވަނަ އަހަރުން ފެށިގެން ވިދާޅުވަމުން ގޮސްފައިވާ ކަމަށެވެ.

ރައީސް ނަޝީދު ވިދާޅުވީ, އެކަކު މާ ގިނަ ދުވަހު ވެރިކަމުގައި ހުރުމަކީ ދިވެހިން ގަޔާވާ ކަމެއް ނޫން ކަމަށެވެ. އެގޮތުން 2008ވަނަ އަހަރު ރާއްޖޭގައި ފުރަތަމަ ފަހަރަށް މަލްޓި-ޕާޓީ ނިޒާމެއް ތައާރަފް ކުރެވުނީ, އޭރު އޮތް ދިގު 30 އަހަރުގެ ވެރިކަން ނިމުމަކަށް ގެންނަންކަން ނަޝީދު ފާހަގަ ކުރެއްވިއެވެ. އަދި އެކަކު ގިނަ ދުވަހު ވެރިކަމުގައި ހުރުމަކީ ޤައުމަށް ރަނގަޅު ގޮތް ނޫން ކަމަށް ވެސް ވިދާޅުވިއެވެ.

ރިޔާސީ އިންތިޚާބުގައި އެމްޑީޕީގައި ޓިކެޓްގައި ވާދަކުރެއްވުމަށް ވެސް ރައީސް ނަޝީދު ވަނީ މަސައްކަތްޕުޅު ކުރައްވާފައެވެ. ނަމަވެސް އެފަހަރުގެ އިންތިޚާބު ރައީސް ނަޝީދަށް ނާކާމިޔާބުވެ ވަޑައިގަތުމުން, ވަކި ޕާޓީއެއް ވަނީ އުފައްދަވާފައެވެ. އިންތިޚާބުގެ ފުރަތަމަ ބުރުގައި ރައީސް ނަޝީދުގެ ޑިމޮކްރެޓްސްއިން ބައިވެރިވެވަޑައިގެންފައިވާއިރު, އެ ޕާޓީއަށް ލިބުނީ ވޯޓްގެ 7 އިންސައްތައެވެ.