ހިޔާ ޓަވަރުން ވެއްޓުނު ކުއްޖާއަށް އެހީ ނުވި ޑްރައިވަރުގެ މައްސަލަ ބަލަނީ
ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްގެ ޓަވަރަކުން ވެއްޓި މަރުވި ކުއްޖާ ކާރަށް އެރުވުމާއި ދެކޮޅު ހެދި ކަމަށް ބުނާ ޓެކްސީ ޑްރައިވަރުގެ މައްސަލަ ތަހުގީގު ކުރަމުން އަންނަ ކަމަށް ފުލުހުން ވިދާޅުވެއްޖެއެވެ.
ހިޔާ އެޗް-6ގެ 12 ވަނަ ފަންގިފިލާގެ އެޕާޓްމަންޓަކުން މަގުމައްޗަށް އެކުއްޖާ ވެއްޓިފައިވަނީ މިދިޔަ ހޮނިހިރު ދުވަހުގެ ރޭ 11:45 ހާއިރުގައެވެ.
އެކުއްޖާ ވެއްޓުމާ އެކު އެސަރަހައްދުގައި އެވަގުތު ތިބި ޒުވާނުންތަކެއް ވަނީ އެކުއްޖާ ހޮސްޕިޓަލަށް ގެންގޮސްފައެވެ.
އެކުއްޖާ ހޮސްޕިޓަލަށް ގެންދިއުމަށް އެހީއަށް އެދުމުން، ފުރަތަމަ ކާރުގެ ޑްރައިވަރު އެކަމަށް ހެދީ ދެކޮޅެވެ.
މަރުވި ކުއްޖާ ހޮސްޕިޓަލަށް ގެންދިއުމުގައި ހަރަކާތްތެރިވި ޒުވާނުން ބުނީ، ކުއްޖާ އަރުވަން ޑްރައިވަރު އިންކާރު ކުރީ، ލޭ އުނގުޅި ކާރުގެ ސީޓު ހަޑިވެދާނެ ކަމަށް ބުނެއެވެ.
އެ ހާދިސާ އާ ގުޅޭގޮތުން ފުލުހުންގެ މީީޑިއާ އޮފިޝަލަކު ވިދާޅުވީ އުމުރުން 15 އަހަރުގެ އެ ކުއްޖާ ޓަވަރުން ވެއްޓުނު މައްސަލައިގެ ތެރެއިން އިހުމާލުވި ޑްރައިވަރުގެ މައްސަލަވެސް ބަލަމުން އަންނަ ކަމުގައެވެ.
ހިޔާ ޓަވަރުން ވެއްޓުނު ކުއްޖާއަށް ލިބުނު އަނިޔާތަކުގައި އޭނާ މަރުވިކަން ހުޅުމާލެ ހޮސްޕިޓަލުން ކަށަވަރު ކޮށްދިީފައިވަނީ އެ ހާދިސާ ހިނގިތާ ގަޑިއެއްހާއިރު ފަހުން އެރޭގެ 12:45 ގައެވެ.
