ސިނަމާލޭގެ ބްރިޖުގައި ޖަހާފައި ހުރި ސޯލަރ ޕެނެލްތައް އެތަނުން ނަގާނަން: ޑރ. މުޢިއްޒު

ސިނަމާލޭގެ ބްރިޖުގެ ދިގު ރާސްތާގައި ޖަހާފައި ހުރި ސޯލަރ ޕެނެލްތައް އެތަނުން ނަންގަވާނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

Ads by STELCO

ހުޅުމާލޭގެ ފޭސް ވަންގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ޑރ. މުޢިއްޒު ވިދާޅުވީ މާލެއިން ހުޅުމާލެ އަންނައިރު، ހައިވޭ ފެނިގެންދަނީ ވަރަށް ހާސްބޮޑު ތަނެއްގެ ގޮތުގައި ކަމަށާއި އޭގެ ސަބަބުން އެ ސަރަޙައްދުން އެ ފެންނަ ހިތްގައިމު މަންޒަރު އެއްކޮށްހެން ގެއްލިފައިވާކަމަށެވެ.

"މުޅި މި ސަރަޙައްދުގައިވެސް އަދި ފަހަރެއްގައި މުޅިރާއްޖޭގައިވެސް އެންމެ ރީތި ވިއު، އެންމެ ރަނގަޅަށް މޫދު ފެންނަން އޮތް މަންޒަރު މިހާރު މިވަނީ ބަދަލުވެފައި. އަރިމަތީގައި ޖަހާފައި ހުންނަ ސޯލާރ ޕެނަލް ޕްރޮޖެކްޓެއްގެ ސަބަބުން" ޑރ. މުޢިއްޒު ވިދާޅުވިއެވެ.

އަދި އިއާދަކުރަނިވި ހަކަތައަކީ މުހިންމު ކަމެއް ކަމަށާއި އެމަނިކުފާނުގެ ސިޔާސަތުތަކުގެ ތެރޭގައިވެސް ތިމާވެއްޓަށް ޚިދުމަތްކޮށްދިނުމަކީ މުހިންމު ކަމެއް ދެއްވާނެކަމެއް ކަމަށާއި، ނަމަވެސް ކޮންމެ ކަމެއްވެސް ކުރަން އެންމެ ރަނގަޅު ގޮތް އޮންނާނެކަމަށް ވެސް ވިދާޅުވިއެވެ.

"އަޅުގަނޑު ގަސްތުކުރަނީ އެ ދިގު ރާސްތާ ގަ ޖަހާފައި އެހެރަ ސޯލަރ ޕެނަލްތައް އެތަނުން ނަގަން. ނަގާ ރާއްޖޭގަ ކުޑަ އަދި މެދު ސައިޒުގެ، މިދެންނެވީ އެއް ރަށް ނޫނީ ދެ ރަށަކަށް އެއްކޮށް އެ ދެރަށް ނޫނިއްޔާ އެ އެއް ރަށް، 1 ރަށް ނޫނީ 2 ރަށަށް އަޅުގަނޑު ހިތުން އޭގެން ފުދޭނެ، އެއްކޮށް ސޯލަރ ޕަވަރއެއް ހިންގޭ ގޮތަށް އެތަކެތި ގެންގޮސް އެކަމަށް ފަނޑު ކުރި ފަރާތާއިވެސް މަޝްވަރާކޮށްގެން ނަގައިގެން ގެންގޮސް 1 ރަށް ނޫނީ 2 ރަށް އެއްކޮށް ސޯލަރ ޕަވަރއިން ހިންގާގޮތަށް ބަދަލުކުރުމަށް މިތަކެތި މިތަނުން ނަގައިގެން ގެންގޮސް" ޑރ. މުޢިއްޒު ވިދާޅުވިއެވެ.

އިއާދަކުރުވަނިވި ހަކަތަ ބޭނުންކުރުމަށް ހިންގާ އެ މަޝްރޫއަކީ ވޯލްޑް ބޭންކުގެ އެހީގައި ތިމާވެއްޓާ ބެހޭ މިނިސްޓްރީން ހިންގާ މަޝްރޫއެކެވެ.

އޭގެ ދަށުން ހައިވޭގައި ހަރުކޮށްފައިވާ ސޯލާ ޕެނަލްތައް މީގެ ކުރިން ވައިގަދަވެ ވިއްސައިގެން ގޮސްފައިވާތީ އެކަމާގުޅޭ ތަހްޤީޤެއްވެސް މީގެކުރިން ފަށާފައިވެއެވެ.

އެ މަޝްރޫއު ނިމުމުން އަހަރަކަށް އުފައްދާ 7.3 މިލިއަން ކަރަންޓް ޔުނިޓުން ދައުލަތުން ކަރަންޓް އުފެއްދުމަށްޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ސަލާމަތް ކުރެވޭނެ ކަމަށް ސަރުކާރުން މަޢުލޫމާތުދީފައިވެއެވެ.

ނަމަވެސް ޑރ. މުޢިއްޒު ވިދާޅުވީ ކޮންމެ ކަމެއްވެސް ކުރަން އެންމެ ރަނގަޅުގޮތް އޮންނާނެކަމަށާއި އެހެންކަމުން މިހާރު ހައިވޭގައި އެހުރި ސޯލަރ ޕެނަލްތައް އެތަނުން ނަގައިގެން އޭގެ ބޭނުން އެންމެ ރަނގަޅަށް ހިފޭގޮތަކަށް އެ މަސައްކަތްކުރައްވާނެކަމަށެވެ.