ޑރ. މުޢިއްޒު ދެއްވީ ގޯއްޗާއި ފްލެޓަށް ދެވަނަ ބުރުގައި އެދުނު މީހުންވެސް ނިކަމެތި ނުކުރައްވާނެކަމުގެ ޔަޤީންކަން
މާލެ ސަރަހައްދުން ދޫކުރާ ގޯއްޗާއި ފްލެޓަށް އެދި ފޯމު ހުށަހެޅުމަށް ހުޅުވާލި ދެ ވަނަ ފުރުސަތުގައި ފޯމު ހުށަހެޅި އެއްވެސް ރައްޔިތަކު އަދި އެނޫނަސް ޖުމްލަކޮށް އެއްވެސް ރައްޔިތަކަށް ނިކަމެތިކަމެއް ލިބޭނެގޮތަކަށް ކަންތައްނުކުރައްވާނެކަމުގެ ޔަޤީންކަން އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ހުޅުމާލެ ފިޔަވަހި 1 ގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ޑރ. މުޢިއްޒު ވިދާޅުވީ މާލެ ސަރަހައްދުން ދޫކުރާ ގޯއްޗާއި ފްލެޓަށް އެދި ފޯމު ހުށަހެޅުމަށް ހުޅުވާލި ދެ ވަނަ ފުރުސަތުގައި ފޯމު ހުށަހެޅުއްވި ރައްޔިތުންނަށް އެ ފުރުޞަތު ގެއްލިދާނެކަމުގެ ކަންބޮޑުވަންތައް ހުރި ކަމަށާއި ނަމަވެސް އެމަނިކުފާނުގެ ސަރުކާރުން ރައްޔިތުން ނިކަމެތިނުކުރައްވާނެކަމަށެވެ.
އަދި އެއީ ކެމްޕޭނުގައިވެސް އެމަނިކުފާނު ވިދާޅުވި ވާހަކައެއްކަމަށާއި މި ސރުކާރުން އެންމެ ފަހު ދުވަހާ ހަމައަށްދާންދެންވެސް ގެދޮރުވެރިކަމާއި ބެހޭ ގޮތުން ރައްޔިތުންނަށް ކޮށްދެއްވި ކޮންމެ ކަމެއްގައި އެމަނިކުފާނު މުޢާމަލާތްކުރައްވަމުން ގެންދަވަނީ ހަމަ އެއްގޮތަކަށް ކަމަށް ޑރ. މުޢިއްޒުވަނީ ފާހަގަކުރައްވާފައެވެ.
"އެއްވެސް ރައްޔިތަކަށް ނިކަމެތިކަމެއް އަޅުގަނޑުމެންގެ ސަރުކާރެއްގައި ނުލިބޭނެޔޭ، ގެދޮރުވެރިކަމަކީ އަޅުގަނޑުމެންގެ ސަރުކާރެއްގެ އެންމެ މުހިންމު ސިޔާސަތު، އެއްވެސް ހިސާބަކަށް ގެންގޮސްފައިވާ ގެދޮރުވެރިކަމެއްގެ އެއްވެސް މަޝްރޫއެއްގެ ސަބަބުން ރައްޔިތަކަށް އެއްވެސް ވަރެއްގެ އުންމީދެއް ލިބުމާ ހަމައަށް ގެންގޮސްފައިވާ އެއްވެސް ކަމެއް ބާޠިލެއް ނުކުރާނަމޭ" ޑރ. މުޢިއްޒު ޔަޤީންކަން ދެއްވިއެވެ.
މީގެ އިތުރުން ދެވަނަ ބުރުގައި ހުށަހަޅާފައިވާ އެއްވެސް އެޕްލިކޭޝަނެއް އަލުން ހުށަހަޅަންޖެހޭފަދަ ގޮތެއްވެސް މެދުވެރިވިޔަ ނުދެއްވާނެކަމަށާއި ގެދޮރުވެރިކަމުގެ މަސައްކަތްތައް މިހާރަށްވުރެ މާ ފުރިހަމައަށް އަދި އިންޞާފުވެރިކަމާއިއެކު ވީހާވެސް ގިނަ ރައްޔިތުންނަށް ފައިދާވާނެގޮތަށް ހިންގަވާނެކަމަށް އެމަނިކުފާނު ވިދާޅުވިއެވެ.
"އަދި މިސާލަކަށް މިދައުރު ނިމުމުގެ ކުރީގައިޗވެސް އެބޭފުޅުން އެއްކޮށް ޕްރޮސެސް ނިންމާ، ފައިނަލް ލިސްޓު ނެރެ، ރައްޔިތުންނާ ހަމައަށް އެކަމުގައި ޔަޤީންކަމެއް ދެވޭ ހިސާބަށް ގެންގޮސްފިއްޔާ އެ ގެންދިޔަ ހިސާބެއްގައި ހިފަހައްޓާނަމޭ. އަޅުގަނޑެއް ނުވާނަމޭ މި ސަރުކާރުން އައިއްސާ ކުރީގަ ރައީސް ޔާމީންގެ ސަރުކާރުގައި ގެދޮރު ލިބޭނެކަމަށް ލިޔުންދީ ދާއިމީ ގެޒެޓް ކުރެވުނު މީހުނާ ދޭތެރޭގައި ކަންކުރެވުނު ގޮތަށް ކަންކުރާނެ މީހަކަށް. އެފަދަ ކަމެއް ނުކުރާނަން، އެފަދަ ކަންބޮޑުވުމެއް ނުބާއްވާ" ޑރ. މުޢިއްޒު ވިދާޅުވިއެވެ.
އެހެންކަމުން ހުރިހާ ރައްޔިތުންނަށްވސް ގެދޮރިވެރިކަން ހޯއްދަވައިދެއްވާނެކަމަށާއި އެމަނިކުފާނުގެ ޕްލޭނުގައި އޮތީ މިއަށްވުރެ މާފުޅާކޮށް އެކަން ކުރެއްވުމަށްކަމަށް ޑރ. މުޢިއްޒު ވިދާޅުވިއެވެ.
"އަޅުގަނޑުމެންގެ ޕްލޭނުގައި އޮތީ މިއަށްވުރެ މާފުޅާކޮށް މިކަންކުރަން، މިގޮތަށް 10 ވަރަކަށް 20 ހާސް މީހުންނަކަށް ނޫން އަޅުގަނޑުމެންގެ ޕްލޭންގަ އޮތީ، މި ސަރަހައްދުން އެކަނި، ގްރޭޓާ މާލެ ރީޖަނުން އެކަނި 65000 ރައްޔިތުންނަށް ގެދޮރުވެރިކަން ޔަގީންކޮށްދިނުން އަޅުގަނޑުމެންގެ ޕްލޭންގަ އޮތީ" ޑރ. މުޢިއްޒު ވިދާޅުވިއެވެ.
އެގޮތުން ފޮށިދިއްގަރު ފަޅުގެ ޕްރޮޖެކްޓަކީ އެމަނިކުފާނުގެ ސަރުކާރުގައި ރައްޔިތުންނަށްޓަކައި ހިންފާ އެންމެ ބޮޑު މަޝްރޫއުކަން ފާހަގަކުރައްވަމުން ޑރ. މުޢިއްޒު ވިދާޅުވީ އެ ފަޅު ހިއްކުމުގެ ޢަމަލީ މަސައްކަތް އެމަނިކުފާނު ހުވާކުރައްވުމުގެ ދެތިން މަސްތެރޭގައި ފަށްޓަވާނެކަމަށާއި އަދި ވެރިކަމުގެ ފުރަތަމަ އަހަރުގައި އެ މަސައްކަތް ނިންމަވާނެކަމަށެވެ.
ތިގޮތައް ކުރިޔަށް ދިއުމަށް އެދެން
އަސްތާ ހެޔޮނުވާނެއޭ ތިޔާ ސޯލަރޕެނަލްސް ތައް ރާއްޖޭގައި އޮތް އެންމެ އަގުބޮޑު ރަށް ހުޅުމާލެ އަދި ދުނިޔޭގައި އޮތް އެންމެ އަގުބޮޑު އެއާރޕޯރޓް ކަމަށްވާ ވެލާނާ އެއާރޕޯރޓް ގާތު ތިޔާ ޕެނަލްސް ތައް ޖަހާފައި ބަހައްޓަން އަދި ތިޔާ ފެނަލްސް ތައް ތިރި ކަމުން ތިޔާ ޕެނަލްސް ތަކުން ކަރަންޓް އުފެއްދަން ފެށުމުން ތިޔާ ޕެނަލްސް ތަކުން ނިކުންނަ ރޭޑިއޭޝަންގެ ސަބަބުން ހައިވޭ ގައި ދަތުރު ކުރާ މީހުންގެ ސިއްހަތަށް އިއާދަނުކުރެވޭ ވަރުގެ ގެއްލުންވާނެއޭ ހެޔޮނުވާނެއޭ ނަގާ ނަގާ ނަގާ އެއްލާލާ އެއްލާލާ އެއްލާލާ އެއްލާލާ އެއްލާލާ އެއްލާލާ…
ރައްޔުތަކަށް ލިބެން އޮންނަ އެއްޗެއް ލިބުމަކީ ދިނުމަކީ ތިމާޔަށް އެއްޗެއް އުނިވާނެ ކަމެއްނޫން ﷲ އިތުރު ކޮށް ދެއްވާނެ !