ކޮމިޝަނުގެ މެންބަރަކަށް އިންޒާރެއް ނުދޭ: އޭސީސީ
އިންތިޤާލީ މަރުހަލާގައި ކަންކަން ހުއްޓުވާކަމަށް ބުނެ އެންޓި ކޮރަޕްޝަން ކޮމިޝަންގެ އެއްވެސް މެންބަރަކަށް އިންޒާރެއް ދީފައި ނުވާ ކަމަށް އެކޮމިޝަނުން ހާމަކޮށްފިއެވެ.
އެކޮމިޝަނުން މިހެން ބުނެފައިވަނީ އައްޑޫ-މީދޫ ދައިރާގެ މެންބަރު ރޮޒެއިނާ އާދަމް ކޮމިޝަންގެ މެންބަރުންނަށް އިންޒާރު ދީފައިވާ ކަމަށް ނޫހެއްގައި ޝާއިއު ކުރި ހަބަރަކާއި ގުޅިގެންނެވެ. އެ ޙަބަރުގައި މެންބަރު ރޮޒެއިނާ އިންޒާރު ދީފައިވަނީ، އިންތިޤާލީ މަރުހަލާގައި ސަރުކާރުގެ މަސައްކަތްތައް އޭސީސީން ހުއްޓުވާ ކަމަށް ބުނެ ކަމަށް ވަނީ ރިޕޯޓްކޮށްފައެވެ.
މިކަން ދޮގު ކުރަމުން އޭސީސީން މީޑިއާއަށް ދިން ބަޔާނުގައި ބުނީ، އެއީ އެއްވެސް އަސްލެއް ނެތް ހަޤީޤަތާއި ޚިލާފު ވާހަކައެއް ކަމަށެވެ. އަދި ނޫހުގައި ޝާއިއު ކޮށްފައިވަނީ ކޮމިޝަނުގެ އެއްވެސް މެންބަރެއް ފޯރުކޮށްދީފައިވާ މައުލޫމާތު ނޫން ކަމަށް އޭސީސީން ވަނީ ބުނެފައެވެ.
އެކޮމިޝަނުން ނެރުނު ބަޔާނުގައި ބުނީ، ކޮމިޝަނުގެ އެއްވެސް ކަމަކާއި މެދު ސަރުކާރުގެ އެއްވެސް ވަޒީރަކު އަދި އިންތިޤާލީ އޮފީހުގެ އެއްވެސް ފަރާތެއް އަދި މަޖިލީހުގެ މެންބަރަކުވެސް މެންބަރަކަށް އިންޒާރު ނުދޭ ކަމަށާއި، އަދި ވަކި ކަމެއް ވަކިގޮތަކަށް ކުރުމަށް އިރުޝާދުވެސް ނުދޭ ކަމަށެވެ. އަދި އޭސީސީ އިން ވަނީ އެ ކޮމިޝަނުން ތަހުގީގުކުރަމުންދާ މައްސަލަތަކާ ގުޅޭގޮތުން ހަގީގަތެއް ނެތް އަދި ކޮމިޝަންގެ މުސްތަގިއްލުކަމާއި، މަސައްކަތްތަކާމެދު އިތުބާރު ގެއްލޭފަދަ ހަގީގަތާ ހިލާފު ވާހަކަތައް ނުފެތުރުމަށްވެސް އިލްތިމާސްކޮށްފަ އެވެ.
އަދި ކޮމިޝަންގެ މެންބަރު މިދިޔަ އަހަރެއްހާ ދުވަހުގެ ތެރޭގައި މަސައްކަތްކޮށްފައިވަނީ އެއްވެސް ފަރާތަކަށް ނުޖެހި ތަޢައްސުބުން އެއްކިބާވެފައިވާ މަސައްކަތެއް ކަމަށް ކޮމިޝަނުން ބުނެއެވެ. މިއާއެކު ވަކި ފަރާތެއްގެ ރުހުން ހޯދަންވެސް ކޮމިޝަނުން މަސައްކަތެއް ނުކުރާ ކަމަށް އެކޮމިޝަނުން ވަނީ ބުނެފައެވެ.
އެސީސީގެ ބަޔާނުގައި ވަނީ އެކޮމިޝަނުގެ ނިންމުންތަކަކީ ޖިނާޢީ އަދުލުގެ ނިޒާމުގެ ހަމަތަކުގެ މައްޗަށް ތަރުތީބުކުރާ، ދިވެހި ޤައުމާއި ރައްޔިތުންގެ މަސްލަހަތު ހިމާޔަތް ކުރުމާއި އަސާސް ނެގެހެއްޓުމުގެ މައްޗަށް ބައްޓަންވެފައިވާ ނިންމުންތަކެއް ކަމަށް ބުނެފައެވެ.
