އިފްތިތާޙީ ތަޤުރީރުގައި، ކަނބަލުންނާއި ޒުވާނުންނަށް ރައީސް މުޢިއްޒު ދެއްވީ އުއްމީދީ މެސެޖެއް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިއްޔެ ހަވީރު ރައީސުލްޖުމްހޫރިއްޔާކަމުގެ ހުވައި ކުރައްވަވައި، ދެއްވި އިފްތިތާޙީ ތަޤުރީރުގައި އެމަނިކުފާނު ވަނީ ދިވެހި ކަނބަލުންނާއި ޒުވާނުންނަށް އުއްމީދީ ވާހަކަފުޅުތަކެއް ހިއްސާ ކުރައްވައިފައެވެ.

ރައީސް މުޢިއްޒު ވިދާޅުވި ގޮތުގައި ޒުވާނުންނާއި ކަނބަލުންނަކީ ޤައުމު ހިންގުމުގެ އިންޖީނާއި، ޤައުމު ދެމިއޮތުމުގެ ހަކަތައެވެ.

"ކަނބަލުންގެ ޙައްޤުތައް އަޅުގަނޑުމެން ރައްކާތެރިކޮށްދޭނަން. ޒުވާނުންނާއި ކަނބަލުންނަށް، އާމްދަނީ ލިބޭނެ މަގުތައް ތަނަވަސްކޮށްދޭނަން. ސިޔާސީގޮތުން ބާރުވެރި ކުރުވާނަން." އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، އެމަނިކުފާނުގެ ސަރުކާރުން ޒުވާނުންގެ ހުނަރުވެރި އައު އީޖާދުތަކާއި އުފެއްދުންތަކުން ވިޔަފާރިކުރުމަށް، ޒަމާނީ ޓެކްނޯލޮޖީ މެދުވެރިކޮށް ދުނިޔެއާ ގުޅުވައިލައްވާނެއެވެ.

"އިރާދަކުރެއްވިއްޔާ، ދިވެހި ޒުވާނުންނަކީ، ކްރިއޭޓަރ އިކޮނޮމީގެ މަހުޖަނުން ކަމުގައި ހަދައިދޭނަން."

Ads by MWSC

ރައީީސްގެ ވާހަކަފުޅުގައި ދޮށީ އުމުރުގެ ރައްޔިތުންނަށް ވިދާޅުވީ، އެ ރައްޔިތުންގެ ކޮނޑުފުޅުމަތީގައި މިއަދުގެ ޖީލުތައް މިއަދާ ހަމައަށް އުފުލައިދިން ކަމަށާއި، އެއީ އަމާނާތްތެރި ހިންމަތްތެރީން ކަމަށެވެ.

ނެތް ވަސީލަތުގައި ހައިހޫނުކަމާއެކު ނުހަނު ދަތިހާލުގައި ރާއްޖެ ބިނާކުރުމުގައި އިއްޔެ އަވަދިނެތި އުޅުއްވީ އިސްރަށްވެހިން ކަމަށާއި، މިކަންކަމުގެ ތަފުސީލު، އަދުގެ ޖީލުތަކަށް ފޯރަން ޖެހޭ ކަމަށެވެ.

އިސްރަށްވެހިން ހަވާސާ ނުކުރައްވާނެ ކަމަށާއި، އޭގެ ބަދަލުގައި އެމަނިކުފާނު އުފައްދާ ސަރުކާރު ވާނީ އިސްރަށްވެހީންނާ ކަވާސާ ސަރުކާރަކަށް ކަމަށް ވިދާޅުވިއެވެ.